Mizoram University nge Mi Zoram University?

Kum 8 chu a kal liam ta; 2001-ah Mizoram University din a ni a, 'Greater deeds remain' tih thupui hmangin he university hi a kal mek. Hmasawnna tam tak a nei tawh a, chutih rual chuan sawi leh sel pawh a hlawh fo.


He university din a nih dawn khan 'state university nge central university tha zawk?' tih thu-ah inhnialna a chhuak a, a din hma hauh atangin he university hian inhnialna a chawkchhuak tiin a sawi theih awm e.

Central university duhtu lam an chak tiin a sawi theih ang; Mizoram University pawh chu central university a ni ta reng a ni.

Din a nih tirh atangin inhnialna a chawkchhuak zui zel a, tun hnaiah he university-a zirtir hna thawk tur lak chungchangah inhnialna a lo chhuak leh ta a ni. Chu chu tunlai titi lar a ni a, mipui nawlpui pawhin university thil meuh mah ni se an ngaihven hle. Chu inhnialna chu eng nge a nih chiah? Chhiar rawh le...


BHU Factor hi Hindutva propaganda a ni thei mai em?
India ram university-ah hian sakhuana nena inthlunzawm a awm nual a, Aligarh Muslim University (AMU), Muslim University ti-a sawi leh Benaras Hindu University (BHU), Hindu university tia sawi thinte hi a langsar pawl an ni a. Kristian university tia sawi te pawh a awm ve bawk.

Hindu kulmuk Bajrang Dal, RSS, etc., kan tih mai ten Ayodhya-a Muslim sakhaw hmun pawimawh (Historical Mosque) Babri Masjit an tihchhiat atanga, BJP-in sorkarna an chelh hnu khan Hindu ni lo sakhaw dang betute chunga hleilenna (atrocities against minorities) a hluar hle a, Australian Missionary Graham Staines-a leh a fate pawh rapthlak takin Hindu firfiakte'n an hal hlum a nih kha.

Hindu kulmukte hi Gujarat, Orissa leh state dangahte hma an che fo a, tun hnaiah pawh Orissa-ah chuan Kristiante tawrhna a thlen kha. Hindu-ho (RSS, Bagrang dal, etc.,)firfiakte hian thu ken pawimawh tak an nei a, chu chu ‘One language, one religion, one nation’ tih hi a ni. India ram hi tawng thuhmun hmang, sakhaw pakhat (hindu) vuantute chenna rama siam chu an tum a ni.

Mahse, Kristiante hi tihduhdahna leh tharum hmanga hneh chi an ni lo tih an hria a, Hindu sakhaw thehlarnan ‘One language, one religion, one nation’ chu hmang chung zelin tih dan an thlak ta a, institution kal tlangin, zirna hmanga Hindu sakhua thehdarh chu an tum a ni.

Hmarchhak hi Kristian tamna a ni tih hi Hindu-ho hian an hai lo a, Mizoram hi India Kristian tamna a ni hi an hai lo. Hindu sakhua-a an hnam tha- Brahmin-ho tan chuan Mizote hi khawih thiang lo (untouchables) an ni.

NEHU-a tribal professor senior pakhat inah pawh a deparment-a a thawhpui Brahmin chu thu zawh fiah duh a neih pawhin a lut duh ngai lo. NEHU chu kum 35 chuanga upa a ni tawh, MZU erawh a la naupang hle. NEHU-ah khuan he Hindu institutionalization tum ran-a thil tih a awm thei tiin mi thenkhat chuan an sawi thin.

"Vai-ho sakhua ber chu Hinduism a ni a, ziak leh chhiar thiam tamna state, Kristian tamna state-ah hian a chekhnawk an rawn tir lo ang tih chu ngaihdan awm thei a ni. Hindu caste system-a an Pathian biak Brahmin-ho hi an hmatheh tur chu an ni. 'Chumi khami chu kal rawh se' tih lam a ni lo, institution kaltlangin thiam takin an che ang a, kum 30-40 vel hnu-ah a rah kan hmu ang a, chumi hunah chuan Khasi ho ang khu kan ni em lo ang chu maw!," tiin Mizoram University-a thawk pakhat chuan Zozam Weekly a hrilh.

"Mizoram-ah hi chuan hmarchhak state dangte angin hma an la vak thei lo pawh ani mai thei, mahse kan zirna insang neih chhun Central University a ni kan tih duah hluahah hian a rawn intan lo vang tih hi a sawi theih loh," a ti bawk.

Meghalaya khu Mizoram leh Nagaland tih lohah chuan Kristian tamna state a ni a, chuti chungin 'Institutionalisation Of Hindu Religion' hi an kalpui nasa hle tawh. Khasi-ho pi pu sakhua ‘Seng Khasi’ khu thiam takin an vulh a, he sakhaw zuitute hian, thingtlang lamah phei chuan Hindu sakhua nen danglamna a awm vak loh avangin 'Hindu kan ni e' an ti mai thin. Thingtlang lama an thalaite khu an retheih denchhenin thiam takin sumin an lei a, Hindu kulmukho chuan an missionary-ah an hmang thin a, a thente phei chu Hindu sakhua an zirna tur senso zawng zawng tumsakin an lam tangah an siam hial tawh a ni. Mizoram-ah Hindu kulhmuk-ho 'sponsored'-a lehkhazir an awm nual tawh.

Meghalaya-ah khuan Hindu puithiamte chawmlen, Mizo tlangval, an temple-a hnathawk a awm nghe nghe. Shillong-ah ngei khuan a ni, an Bhagwan Gita (Hindu lehkhabu) pawh Mizo tawnga lehlin a ni tawh a. Sanskrit/urdu thiam tak leh Mizo tawng thiam tak tan lo chuan chu chu tih theih a ni lo. Engtin nge chu mizo tlangval chu an lo thlem a, khawiah nge an zirtir a, engtinnge a awm tak zel a, khawiahnge a awm tak zel hi uluk taka kan ngaihtuah zui tur a ni.

MZU Vice Chancellor zirchhuahna BHU hi Varanasi-a awm a ni a, lui lian tak mai Hindu-ho tan chuan an inthen faina/tihthianghlimna a luangtlang a, Hindu university awmna awm tak pawh a ni reng a ni. Hindu kulmuk mithiam tak tak pawh an kawl nual a, Hindu kulmuk tak tak pawh a hringchhuak ngei ang. BHU University Objectives-a point khatna leh palina chu hei hi a ni:

"(i) To promote the study of the Hindu Shastras and of Sanskrit literature generally as a means of preserving and popularizing for the benefit of the Hindus in particular and of the world at large in general, the best thought and culture of the Hindus and all that was good and great in the ancient civilization of India.
"(iv) To promote the building up of character in youth by religion and ethics as an integral part of education."

Heta religion an tih khi Hindu sakhua a nih a rinawm, chutiang motto nei tlat zirtirtu neih teuh chu a fuh mai lo mai thei a, a fuh lo lo mai thei bawk.

MZU chungchangah 'BHU' hming a lang ta fo a, thenkhat chuan inven tul an ti a, thenkhatin tul an ti lo. Ayodhya chuangchang chhuina kal zelah BHU mi leh sa inrawlh an awm nia hriat a ni.

MZU Vice Chancellor hi BHU chhuak a ni a, BHU-a zirchhuak MZU-a thawk an tam viau mai hi mi thenkhat ngaihtuah tithuitu chu a ni. MZU Annual report 2008-09-ah 10th Plan hnuaia zirtirtu lak zat tarlan hi chutiang ngaihdan neite tanchhan pakhat a ni.

BHU atanga lo kal professor senior pahnih, contract-a lak an ni a, tunah chuan an 'retire' ve ve tawh a ni awm a, pakhat zawk phei hi chu he MZU annual report-ah hian a la chuang tel nghe nghe. MZU-a an awm lai khan academic-ah chuan nihna pawimawh tak tak, an awmna department head leh School hrang hranga Dean nihna an chelh ve ve. Chu mite pahnih nen chuan BHU atanga chhuak MZU-a thawkte hi an vaiin 15 (11.45%) an ni a, MZU chhuak zat aiin 0.76% chauhin a hniam.

Senior tawh tak an nih avangin university rorelna sang ber Executive committee leh academic council thlenga thu vaivung thei tak an nih a rinawm. Retired Professor contract-a lak pakhat zawk phei hi chu Vice Chancellor ngaihsan tak (a guru) niin an sawi a, UGC regulation thara kum 65 thleng Professor te chhawr chhunzawm theih a ni a, mahse, a chawlh hun a lo thlen khan UGC regulation thara University-in tha a tih chuan kum 70 thleng chhawr chhunzawm zel theih an nih thu changchawiin VC hian rawih chhunzawm leh a tum a, mahse Mizo Professor chutiang dinhmun ang chiaha ding ve tho a chhawr chhunzawm duh tak loh avanga dodalna avangin he professor hi MZU-ah a awm chhunzawm lo ta chauh a ni.

A vaiin 10th Plan hnuaia MZU-a zirtirtu lak zawng zawng hi 131 an ni. MZU-a zirtirtu lak takte hi India rama University hrang hrang 39, Central Luzon state University, Phillipine university pakhat leh Queens university, UK University pakhat atangtein an ni.

MZU awm hmaa Mizote university chu NEHU a ni a, Mizote lehkha zirchhuahna ber a ni thin. NEHU atanga zirtirtu lak (36 atang hian 5 hi Mizo ni lo, hnam dang an ni) tam ber anga lang khi chu a awm viau a ni. MZU chu university naupang tak ni mah se, MZU atanga chhuak, qualify an lo awm ve ta nual a, pahnihna a hauh pha hi a lawmawm viau a ni. Ph.D Degree neia lut 11 zingah hian pali vel chu lecturer an nih hnua Ph.D degree hmu an ni. BHU kal kanin Manipur University (MU) khi han en ve leh ila, MU atang hi chuan a tam zawk hi OBC leh SC quata atanga lut an ni. Local (Mizo) chuh ve theih chi a ni lo.

MZU hnuaia science zirna department hrang hrangte hi a la thar viau hlawm a, zirtirtute pawh mithar an ni hlawm. 2006 hnu lamah science-ah hian department hrang hranga zirtirtu an lak zingah Benaras Hindu University chhuak mi 6 an awm a, retired professor 2 an chhawr bawk.

Percentage-wise chuan MZU hnuaia science lam bikah hian zirtirtu 53.33% hi BHU chhuak an ni. Non-teaching staff-ah pawh he university chhuak hi an awm nual. BHU chuan MZU-a zirtirtu lak tawhah pathumna an hauh pha hial a, India hmar lam university pakhat atanga heti zat zet mithiam an lo chawlut hi thenkhat mit mimimtu chu a ni.

Science zirna ngau ngauah chuan Indian Institutes of technology (IIT’s) te leh Institution dang (BARC, etc.) tha tak tak a tam tehlul nen, MZU-ah hian Science zirtirtu ah IIT (Madras) atangin zirtirtu 2 chiah an awm anga tarlan a ni.

'An rawn dil lo miau alawm' tiin a sawi theih ang. Mahse, 'retired professor' pawh BHU atang khera an kochhuak leh zel hian mak tih a hlawh a ni.

MZU-a thawk pakhat chuan BHU chhuakho chu, “English an thiam lo, an subject-ah pawh an chuti teh ual lo” tin Zozam Weekly a hrilh.

“Leave an ngaisang a, MZU hi chu stepping-stone atan chauh hman an duh ti ila a dik ngei ang. Hmun dang atanga hnam dang hrim hrim lak kan sawi lo, BHU atanga MZU zirtirtu atana lak vak te hi local (Mizo, anmahni aia thahnemngai fe zawk) te aiin Quality education chhenfakawm tak an neihna bik eng nge an neihna kan hre lo,” a ti bawk.

"India ram leh ram pawn atanga MZU-in zirtirtu a lakah hian BHU hi a sang lawr lak a, Mass Migration dik tak a ni. Eng vanga Hindu University chhuak zirtirtu chu duh ta viau nge maw kan hotute hi an nih le?" MZU zirtirtu dang pakhat chuan a ti.

BHU chhuak MZU-a an tam chhanah Vice Chancellor Prof AN Rai-a hi BHU chhuak a nih vang ni-a ngai an tam hle.

11th plan hnuaia MZU zirtirtu 117 posts lai mai hna lak leh mekah hian, engzat chiah nge BHU atang hian lak an nih ang tih ngaihtuaha hlauhthawnna nei an awm fur. Interview koh tawh chinah BHU chhuak an awm nual nghe nghe.

Four First Class
Hei hi MZU-in zirtirtu hna lak tur-a tehkhawng (Criteria) a siam a ni.

He tehkhawng hi University-in a duh chuan a siam thei a, a sut leh thei bawk. Central university kher lo private, state, IIT etc te pawhin duh chuan an siam thei. India ramah hian hetiang criteria siam kher lo unverisity quality sang tak tak a tam mai. Central university tam zawk hian hetiang tehkhawng hi an siam lo.

NEHU khu academic lamah leh infrastructure lamah chuan India rama University langsar a ni a, kum thum vel kal taah khan India rama Central university tha ber ber pasarih UGC-in a thlante zinga 'proficiency of excellence' hmu pha a ni. Four first class an changchawi lo.

Central University hi UGC rules leh regulations zulzuia kaihhruai tur a ni a, university-in tul a tih dan angin statues/ordinance chu UGC guidelines angin a siam ang a, academic council leh executive council-in a nem nghet tur a ni.

“The direct recruitment o the post of Assistant Professors, Associate Professors and Professors in the Universities and Colleges shall be on the basis of merit through all India advertisement and selections by the duly constituted Selection Committees as per the guidelines prescribed under these Regulations to be incorporated under the Statutes/Ordinances of the concerned university. The composition of such committees should be as prescribed by the UGC in these Regulations.”

Basis of merit tih hian Four first class a kawk kher lo a, University chinah chuan zirtirtu hna dilte teh nana UGC regulation-in merit a tih chu 'high Educational Qualifications' a ni mai. University zirtirtu hna lak chungchangah hian UGC-in fel takin dan a nei a, chu chu a tehfung sang ber tur ni awm tak a ni. A tawi zawngin, UGC chuan 'High educational qualifications with NET or Ph.D' a ti a, chumi hnuah PDF leh publications, books, teaching experience etc weightage te ni tur awm tak a ni. Master degree-ah 55% aia hniam lo (5% relaxation for SC/ST and differently disabled) a ni leh mai.

Matric atanga bachelor degree thlenga tihthat hi a pawimawh khawp mai, mahse UGC regulations chuan a pawimawh berah a dah lo. UGC regulation chuan Master degree-ah ngei pawh 55% a ti a, SC/ST and differently disabled tan '5% relaxation' a ti. Chuvang chuan 'high educational qualification, M.Phil with NET emaw Ph.D' hi UGC chuan criteria pawimawh berah a dah niin a lang.

"University-in tul a tih chuan chumi zulzui chuan criteria a siam mai tur a ni. Four First class hi Post-graduate chin zirtirtur leh research scholars kaihruai tur atan tehfung tha ber a tih theih ngawt loh, tehfung pawimawh tam tak zinga pakhat tiin a sawi theih ang," tiin MZU zirtirtu pakhat chuan a sawi.

"Four First class criteria hi thiam taka a ram leilung fate tih tlin lohna tura ruahmanna thuk tak a ni thei mai em?" a ti bawk.

10th plan hnuaiah pawh khan 'high educational qualification' nei, a ram leilung fate hnawl an lo ni tawh. Tun tum interview neih tawhah pawh sawi thawm a awm leh a, interview la neih tur atan pawh hian hei hi thil thleng thei reng a ni.

10th plan-ah khan Physics department-ah ram leilung fa hnawlin a aiah hnam dang lak a ni. He mizo candidate hi candidate satliah ni lovin vai mithiam zingah pawh awm se, an chung en ngei tur a ni ang.

Khatah khan four first class hman a ni lo a, high educational qualification plus points pawh en a ni hek lo. Mizo tha lo zawk leh vai tha zawk ang fova sawi hi a dik lo.

10th plan hnuaiah khan Mizo candidate tho science department pakhata mi, Ph.D nei international publications pawh 12 vel lai nei hnawlin (hnawl a nih hnu pawh hian Spain-ah PDF-in a kal a, a zawh hnuah tunah hian Ireland-ah PDF tho tiin a awm mek a ni), M.Sc with NET, Ph.D pawh la nei lo lak a ni bawk a, a aia lak chu BHU chhuak tho a ni. Chutiang thil a thlen tawh avang chuan, quality education changchawia MZU thuneituten four first class an tlangupui hi mawihnai taka a ram leilung fate hnawlnaah mi thenkhatin an ngaih phah lehzual tiin a sawi theih ang.

Expert koh dan chungchangah pawh MZU hi ngaihven tham a ni. University zirtirtute hi VC leh registrar dungzawng an nih vanga tling chu an ni lo, mahse expert-in a tling lo zawk an thlan miau chuan! University VC leh registrar te chuan chutiang a thlen loh nana lo ven that awm tak a ni.

Four first class criteria hi inhnial theihna tak a ni a, a siam tute 'accountability' four first class that leh that loh teh nan en a tul ang tih chu mi thenkhat ngaihdan a ni.

MZU leh MSU Aggrement chungchang
Mizoram University leh Mizo Student Union ten 15th September, 2009 khan Pachhunga University College a meeting an nei.

MZU hi central institution/autonomous body a ni a, inrelbawlna hran, autonomy nei a ni. Mimal, state officials/politicians, NGO’s te an duh hun hunah an rawn inrawlh ngawt thei lo. A tul dan azirin, suggestion/advice te chu an pe theiin University lam pawhin a rawn thei bawk tura ngaih a ni.

Nikum khan tuna MZU Assistant/Associate Professors hna lak mek advertisement chungchang thuah MSU in 7th July, 2009 khan MZU-in advertisement an lo chhuah tak chu siamtha turin lehkha registrar hnenah lehkha a ziakin an thlen a.

Hun engemaw chen boruak a daih hnuin, MZU lamin hma an lak tak loh avangin, MSU-in MZU VC hmuh an tum a, inchhanna mumal pawh awm lovin VC chuan MSU te chu a lo hmu duh lo a, (VC hi academic head a ni a, hmuh tumtute hi local NGO ni mah se zirlai pawl an ni). A lo hmuh duh tak lohah chuan MSU hian August ni 19-ah August ni 21, 2009 hma ngeia advertisement inngahna roster siamtha turin VC ziakin an hriattir nawn leh ta a ni.

MZU thuneitute chuan an bawhzui lo a, September ni 8, 2009 khan VC chu September ni 15, 2009 hma ngeia MZU leh Mizoram Chhuahsan turin Ultimatum pek a ni ta a ni.

Chutianga boruak a kal takah chuan, VC hian MSU te hi biak a tum a, mahse MSU hian ultimatum an lo pek tawh avangin an hmu duh bik ta lo. Hun a kal leh hret a, MZU lam hian MSU nena inbiak an rawt ta a, September ni 15, 2009-ah Pachhunga University College-ah an inbe ta a ni.

He meeting-ah hian minute pawh ziah a ni a, MZU registrar leh MSU president-in an sign hnan a, a hriatpuituah MZU atangin professor senior pahnih leh MSU Gen. Secy. te'n an sign ve bawk.

Meeting Minute sign tu chu ni lo mah se he meeting-ah hian MZU VC bakah PUC principal, MSU OB te leh executive member pathum leh MSU patron pakhat an tel.

An inrem theih tak avangin VC ultimatum pawh chu tiamchin awm lovin (indefinite) pawhsei a ni ta a ni. Chu inremna (aggrement) chu MZU thuneitute chuan an bawhchhiat leh tak avang in buaina a awm leh ta a ni tiin MSU lam chuan an sawi.

"The meeting between Mizo Students Union (MSU) and the Authorities of the Mizoram Univeristy on 15th September, 2009 at Pachhhunga University College (PUC) Aizawl made the following agreement," tiin an ziak a, "The appointment of various teaching posts of MZU as per the demand of MSU was agreed upon. The sentiments expressed were that qualified local candidates should be given a sympathetic treatment and everything being equal they may be given preference,” an ti a, Annexure-aah pawh, “The selection of various posts of Asst. Professor (Post graduate & under Graduate) under MZU screening and interview should be considered in such a way that QUALIFIED LOCAL (Mizo) candidates would be given preference. A minimum of six (6) local candidates would be called for interview in one post, if they are eligible to apply the same.” tih a ni.

Tun MZU Zirtirtu hna lak chungchanga MSU te nena buaina lo awm ta hi chu an aggrement a point pakhatna hian a sawi fiah thei hle ang. Inbiakremna zawm lohnain a ti buai a ang ta viau.

MZU-in MSU aggrement an neih pui danah chuan:-
(a) MSU demand angin MZU chu zirtirtu lak chungchangah a kal tur a ni. (The appointment of various teaching posts of MZU as per the demand of MSU was agreed upon.)

(b) Qualified local candidate te chu non-local nen an qualifications/Academic record a inan chuan, duhsak zawk ni se.

(c) Screening committee-in qualified local candidate te chu a duhsakin interview thei ngei turin a ngaihsak tur a ni.

(d) UGC-in guidelines a siam anga ram leilung fate university a apply thei chinte chu Post tinah interview face turin paruk (6) aia tlem lo koh ni rawh se.

He point of Aggrement hi chuan MZU zirtirtu lak chungchangah hian local candidate tling lo chung chunga lak luihtir a kawk lo. Qualified local candidate-te chu an qualifications leh academic record-ah non-local nen a inan chuan ram leilung fate chu screening-ah emaw interview ah duhsak ni se a ti mai a ni.

UGC Regulation-in University zirtirtu ni thei tura qualification a zam anga local atanga apply theite chu Post khatah paruk (6) aia tlem lo interview turin koh ni se a ti bawk. A khawi laiah mah hian Mizo qualify lo chung chung emaw Mizo local chauh inthun, localized tumna a lang lo.

Tun tuma local candidate MZU registrar-in 'an qualify lo' a tihte hi chu, UGC regulations ni lovin, MZU four first class criteria-a an tlin loh vang emaw post khata mi paruk zel screen tlin tura an tel phak loh vang emaw a ni ang. Chu pawh chu lo ni tehreng se MSU nena MZU-in aggrement an ziahah chuan 'The appointment of various teaching posts of MZU as per the demand of MSU was agreed upon' a ti a, chu aggrement chuan 'A minimum of six (6) local candidates would be called for interview in one post, if they are eligible to apply the same' a ti a ni. Merit lists-a MZU criteria anga local candidate-in an lo qualify lo a nih pawhin, aggrement ang chuan posts khatah UGC Regulation in apply thei chin a lo siam ang a, Local candidate apply te chu (NET or Ph.D neite chu) posts khatah paruk (6) interview hmachhawn turin an ko mai tur a ni.

"Hei hian lak an ni dawn emaw lak ngei tur tih emaw a kawk lo. Experts-in tha an tih chuan lak a ni thei tih chauh a ni. Chuvang tak chuan he aggrement, MZU thuneitute ngeiin an koh leh an sign hnan bawk si an zawm leh tak loh hi tun buaina intanna tak chu ni ta ni berin a lang," thudawn pakhat chuan a ti.

MZU hian autonomy a nihna anga ama duhthua kal a duh a nih chuan engatinge MSU nena inbiakna nei turin a koh? Engatinge MSU te Aggrement a sign pui? Aggrement a sign pui hnuah an zawm leh duh si lo, engatinge an inbiak lai khan an theih loh thu an sawi ve mai loh? UGC regulation lo kalh pawh chu ni se engatinge a sawi ve mai loh? Zawhna a tam mai.

"MZU thuneitute'n MSU nena an aggrement an tihlawhtlin lo hian thil thui tak a sawi a, mahni thutiama ding nghet lo (four first class criteria-ah pawh an ding nghet lo reng a), students body te pawh zah lo a ni," MZU zirtirtu pakhat chuan a ti.

Vai an tha ber kher lo
MZU hnuaia post ruak 118-ah hian Professor 19, associate professor 25, Assistant Professor 73 lak tur a ni.

Heng teaching posts-ah hian professor leh associate professor hna 44-te hi mizote zingah dil thei tlemte chauh an awm a, hnam dang deuh vek lak a ngai dawn hrim hrim.

Assistant professor atan hian department thenkhatah Mizo dil tur an awm mumal lohna a awm bawk.

Asst. professor atana Mizo qualify an tamna leh post zat vel chu UR posts 27 (UR posts zat 35 atanga mizo diltu awm mang lohna 8 (UR paih then leh ila) leh S/T posts 5, a vaiin posts 32 (27UR + 5 ST) vel chiah a ni ta a ni.

"Heng posts 32-te hi posts awm zawng zawng zat atanga chhut chuan hmun li-a thena hmun khat chauh a ni. A bak posts 86-te hi chu sawi buai ngaihna pawh a awm lo, hnam dang deuh vek an lut dawn tho tho. Asst Professor post 32-ah tal hi chuan ram leilung fate duhsak ve ni rawh se tiin zirlai pawl ten an nawr hi thil tih awm tak a ni," tiin MZU zirtirtu pakhat chuan Zozam Weekly a hrilh.

"Hei hi mi thenkhatin Mizo hrim hrim inthun luh tumna anga an ngai hi an hriat chian loh vang niin a lang. Heng post-ah te hian ram leilung fate qualify te duhsak ni ta se, kan University quality hian a chhiat phahna tur awmin a lang chuang lo. A chhan chu All India level-a qualifying exam NET emaw PhD nei lo tan dil theih a ni lo a, he'ng Mizo dilte hian NET/ PhD nei vek an ni. India sorkarin University-a thawk thei tura exam a buatsaih an paltlang vek tawh a ni. Tumahin University a thawk turin qualify lo luh tir an tum lo, UGC in qualify a tih te chauhin heng hnate hi an dil a ni," a ti bawk.

"Four fisrt class vangin interview a koh loh an awm a nih kha! Kan University-ah mah hetianga hnawl an nih si chuan khawi University-ah nge hna an hmuh chuan ang? A ram leilungfa te atanga nawrna (local pressure) hi chu University leh Central sorkar hnuaia zirna in dangah te pawh a awm ve tho. Chu chuan zirna quality a tih chhiat kan hre chuang lo, NEHU-ah te pawh KSU te’n thil hrang hrangah local pressure an siam fo, zirna hmun tha a ni reng tho," a ti bawk.

"Tuna tehna an hman four first class hi hman zel tur a nih dawn chuan kan MZU hotute pawh hian an zirlaite tun ai hian mark tha zawk pek dan ngaihtuah pawh ala tul mai thei," MZU zirtirtu dang pakhat chuan a ti.

"Kan college/undergraduate-a subject thenkhatah phei chuan first-a pass awm loh kum a awm nual a, subject thenkhat phei chu first-a pass theih loh hrim hrimnaa ngaih a ni hial. NEHU hi India ram University zinga tha pawlah a tel pha a, mark hmuh that erawh a har hle. Chuvang chuan NEHU-ah chuan BA atanga MA/MSc zir tur an thlan dawnin NEHU chhuakte chu 10% an pek belh thin. Chumi tel lo chuan University dang atanga lo kal, mark tha tak hmute an tam avangin NEHU atanga chhuak zirlai tam tak tan seat chan a har em em a ni," a ti bawk.

Hnam dang, mark tha tak tak neite hi an thiam vek bik chuang lo. Hman deuha PU College a zirtirtu atana lak vai thenkhat zingah sap tawnga tawng hlei thei lo an awm, chu chu zirlaite pawhin an complaint hial. Principal hmasa pawh khan dahngheh (confirm) a hreh hle nghe nghe nia sawi a ni.

"MZU-ah hian vai zirtirtu nep ve tak tak leh thahnemngai lo, zirtirna aia paper publication ngai pawimawh, chawlh lakna tur hre tak leh chhuanlam eng emaw hmanga a huna rawn let loh ching an awm nual. Chung hunah chuan Mizote bawk hian zirlaite kan lo enkawl thin," MZU zirtirtu pakhat chuan a ti.

Related Posts :