Ministry of Labour & Employment-in a chhinchhiah danin Mizoramah hian 1981 chhiarpui atangin naupang kum 5-14 inkar, sikul kal lova hnathawk zat hi chhinchhiah tan a ni a, hemi kum hian 6314 an awm. 1991 chhiarpuiah naupang hnathawk hi 16411 an tling ta a, 2001 chhiarpuiah chuan 26265 an ni tawh. 2001-a inchhiarna ang chuan India rama state leh UT 35 zingah Mizoram aia hniam hi state/UT 11 chiah an awm a ni.
NGO pakhat, Centre for Peace and Development leh Assam University te chuan Child Labor chungchangah survey an nei a, hnathawhna hmun 200 an tlawhah naupang hnathawk 80 an hmu.
"Child Labor hi Mizoramah 'a nasa lutuk' tiin kan sawi phal rih lo," tiin Centre for Peace and Development secretary Angela Ch Ralte chuan a sawi a, mahse, "Naupang thawh theihna awmah chuan naupang an thawk deuh zel thung. Naupangte thawh theihna hmun hi pung ta se naupang hnathawk hi an pung dawn tihna pawh a ni thei," a ti thung.
Miin naupang rethei an khawngaih avangin an chhawr thin a nih pawhin, an chhawr hian an tanpui ni lovin an retheihna kawng an sialpui a ni zawk tih chu an ngaihdan a ni.
"Naupang rethei, tanpui ngai an awm a nih chuan tanpui tur an ni a, sorkar, Kohhran, khawtlang leh thenawm khawvengte mawhphurhna a ni ang. Chhawr tur an ni lo. Naupang kan chhawr hian an hriselnain a tuar thei a, an puitlin hunah hna an thawh theih loh phah zawk thei. Tin, lehkha an zir loh phah a, naupang thanlenna atana hmun tha lovah an thanlen phah bawk. Kan tanpui emaw kan tih laiin kan tichhe zawk a ni," Angela chuan a ti.
No comments:
Post a Comment