Maradona leh Messi

¢ Hmingsanga

Maradona chu khawvela footballer thiam ber tia sawi a ni a, Argentina tana a thawh ropui em em vang leh a tihhmingthat em avangin Maradona hnua Argentina atanga footballer tha leh ropui tura an rin apiang chu an hming lemah 'New Maradona' tiin an vuah thin. Chung zingah chuan Ariel Ortega, Marcelo Gallardo, Juan Román Riquelme, Pablo Aimar, Andrés D'Alessandro, Javier Saviola, Carlos Tévez, Lionel Messi, Sergio Agüero te hi an langsar hlawm hle. Mahse Maradona meuh zawng an tluk zo lo deuh chu a nih hi. An zingah hian amah Maradona ngei pawhin 'ani chu ka tluk lo' ti emaw 'kei aiin a thiam zawk' ti emawa a sawi chu tuna Argentina tana World Cup khel mek Lionel Messi hi a ni.

Messi hi chu khawvel pawhin Maradona tluk nia an pawm tlan deuh thup a ni ti tih ti ila kan sawi sual awm lo e. A sawi uar deuh phei chuan Maradona aiin a thiam zawk niin an sawi hial. Argentina chhul chhuak footballer pahnih Maradona leh Messi te hi i'n bihchiang teh ang.

Club Level
Messi hi Newell's Old Boys's youth team-ah 2000-ah a lut a, chumi hnu kum linaah La Liga-ah Barcelon tan a khel thei a, Messi hian 2004–05 season-ah khan La liga-a khel player naupang berte zinga mi a nih bakah goal thun thei zinga naupang ber nihna record a rawn siam nghal. Hei mai ni loin goal thun tam zingah a hming a lang phak nghal bawk.

Season ruk chhungin Barcelona tan vawi 147 a khel a, goal 127 a thun. La liga ah vawi 4 champion an ni a, champions league ah vawi 2 champion a nihpui bawk.

1982-ah European club zawmtu Maradona ve thung chuan season ruk chhungin goal 143 a thun. Europe-a a kal hmain Argentinos Juniors leh Boca Juniors te chu Argentine Primera Division-ah champion a nihpui. Season hnih chhung Barcelona-ah a khel a, game 58 emaw vel a khel a, goal 38 a thun a, nunphung danglam leh mak tak neitu Maradona hi a che pui hle.

1984-91chhungin Napoli-ah a khel a, Napoli a khelh chhung hian Neapolitans te chuan 'pathian' hmuhin an hmu a ni ber a, a be lo chauh a ni. 1987-ah Napoli chu Italian league-ah a champion-pui a, hemi hnu hian 1990-ah champion a nihpui leh bawk.

Maradona hian a vanglai hun a hman tamna club Napoli-ah hian player riopui leh tha tak tak Careca, Alemao, Ciro Ferrara leh Bruno Giordano te an khelhpui a, an chetthat phah ti ila a dikna chen pawh awm bawk mah se Maradona tel lo chuan eng teh ual an ni lo. Chutiangin Messi pawhin tuna a khelh mekna Barcelona-ah hian Xavi, Andres Iniesta, Dani Alves leh Zlatan Ibrahimovic te a khelhpui a, Messi tel lo chuan heng player-te an che hlei thlei lo ti ila a dik awm e.

International Level
Messi hi tluang taka a inkhel zel thei a nih chuan Maradona aiin a dinhmun hi tha zawk turah ngaih a ni.

Maradona hian 86 World Cup khan Argentina chu champion a nih pui a, khami tum khan England leh Belgium lamah goal ropui tak tak a thun a nih kha. Maradona hi 1978 World Cup-ah Argentina tana khel turin koh a ni ve a, mahse final selection-ah paih a ni leh. Kum 22 mi a nihin 82 World Cup-ah a khel a, red card a hmu a, 86 World Cup ah champion a nihpui a, 90 World Cup-ah final-ah an chak lo. 94 World Cup-ah erawh damdawi hman phal loh a hman avangin mualpho takin a che a ni kha.

Messi hian 2006 khan World Cup a khel ve a, khatih lai khan kum 19 mi chauh a ni. Kum 22 a nihin khawvela thiam ber tia hriat a ni tawh. Maradona kha 86 World Cup-ah khan kum 26 mi a ni a, world champion a nihpui thei. Messi hian kum 22 a nih kumah Argentina hi World champion a nihpui thei ang em tih chu zawhna pawimawh tak a ni.

Goal thun & siam
Messi hian Argentina tan game 43 a khelh tawhah goal 13 a thun a, World Cup-ah goal 1 a thun tawh. Barcelona tan goal 119 a thun tawh bawk. Maradona khan Argentina tan vawi 91 khelin goal 34 a thun a, World Cup-ah goal 8, club-a a khelh tawhna zawng zawnga a khelh zat chu game 590 niin goal 311 a thun. Hetiang a nih chuan Messi hian Maradona record hi a khum theih ngei beisei a ni.

Nungchang leh khawsak phung
He mite pahnih hi an nungchang leh an khawsak duh dante khaikhin a nih chuan an inletling thawk ti ila a dik awm e.

Maradoan chu pa tawng duh leh khawsak phung danglam tak a ni. A thin a chhe ang reng hle. Messi ve thung hi chu pa awm nem, tawng tam lo leh mi inthuk ru chi deuh a ni thung.

Khelh dan phung
He mite pahnih hian inan riauna an nei; an palian lo ve ve a, ke vei lam an hmang thiam thlawt a, ding lam erawh an 'khawr' dun hle. Heng- skill, dribbling, pace, agility, acceleration, balance, determination, crossing leh finishing-ahte hi chuan a tu zawk nge tha zawk tih sawi thiam a har viau. Mahse, Messi hian heng tehna hrang hrangahte hi chuan a khum deuh zawk em aw a tih theih ang.

Messi hi palian ni lo mah se Maradona ai chuan ball a 'head' thei zawk nia sawi a ni. Chutih laiin Maradona hian set piece lamah chuan fak a hlawh zawk. Maradona hi Messi ai chuan attacking lamah a chak zawk nia sawi a ni bawk.

Leadership quality lamah chuan Maradona hi a sang zawk ngei ang. Messi chu leadership quality nei a ni ve lo.

Kum 22 mi an nih lai ve ve atanga chhut chuan Messi hi ropui zawk a ngaih theih a ni. Kum 22 mi a nihin Messi hi khawvela thiam ber tia chhal ngam a ni tawh. Maradona chu kum 22 mi a nihin 82 World Cup-ah Brazil nen an inkhelh tumin Brazil player Batista a rah luih avangin hnawhchuah a ni.

Engpawhnise New Maradona leh Maradona tak tak hi khaikhin chhunzawm zel an la ni dawn chauh. Maradona nge Messi tih chungchang hi chu inhnialna tawp thei lo a la ni chhunzawm zel ang. Nakinah Messi hian football khelh a chawlhsan hunah mumal zawk leh khaikhin remchang zawk hun a la thleng ang. Chutih hunah chuan a ropui zawk leh che tha zawk chu a hriat theih a rinawm.