Lung leh tiauvut

Philosphy professor pakhat hian a zirlaite hmaah thil a entir a. Ngawi rengin bur lian tak mai hi a hung lang a, lungte inches 2 vela lian hi a thun mawlh mawlh a, zirlaite chuan an lo thlir thap a.

A khah hnu chuan a rawn hawi chhuak, zirlaite hnenah chuan bur chu a khat em tih a zawt a. An vai chuan 'Aw, khat e' tiin an chhang dual a. Chutah professor chuan bur chhungah chuan lungnawi a chhunglut leh ta a. Bur chu a sawi nawk nawk a, lungte karah chuan a nawi chu a lut zel a.

Zirlaiho hnenah chuan bur chu a khat em tih a zawt leh a, an vai chuan 'Aw, khat e' tiin an chhang leh a. An zirtirtu pa chet dan avang chuan thenkhat chu an nuih a za ang reng viau tawh a.

Professor chuan bur pakhat hi a rawn phawrh leh a, a chhungah chuan tiauvut/balu a awm a. Burah chuan a chhunglut leh ta a, lungte leh lungnawi kar awl chu balu chuan a hnawhkhat ta vek a.

Professor chu a ding chhuak a, "Tuna in thil hmuh hi in nihna leh in nunphung nen a inang tih hriattir che u ka duh a ni. Lungte hian an entir chu in tana pawimawh em em - in chhung te, in kawppui te, in hriselna te, in fate, leh a dang te an ni. Heng hi in chan emaw in hloh emaw a nih chuan in tuar na em em dawn a ni".

"Chutiang bawkin, lungnawi te hian in dam chhunga in tana pawimawh thil dang - eizawnna hna te, chenna in te, lirthei te, leh a dangte a entir thung a. Tiauvut hi chuan a bak thil dang zawng zawng, a pawimawh lo zawkte a entir a ni".

"Dam chhung khawsak rel fel hi thiam a ngai hle a. A tir berah bur chhungah hian balu hi chhung khat ta ila, lungte leh lungnawite hi a leng dawn miah lo. Chutiang bawk chuan in thahrui te, in hun hlu tak te, in thiamna leh finna te kha thil pawimawh lo leh tangkai lo zawk atan in hman zawh vek chuan thil pawimawh zawk atan hman tur in nei lo mai ang".

"Chuvangin, lung lian zawkte dah hmasak tur a nih angin in dam chhung atana thil pawimawh zawkte hi ngaih pawimawh phawt tur a ni. A pawimawh apiang ti hmasa thin ang che u."

(Rocks & Sands tih lehlin a ni - Lalthlamuana Ralte)

Related Posts :