Kal thei lo, thawnthu ziak thei nula chu

June ni 2-ah khan art and culture minister PC Zoram Sangliana chuan a rualin lehkhabu 5 a tlangzarh a, hetia a tlangzarh lai hian lehkhabu ziaktu chu a bulah an lo ding thap. Mahse, pali chauh an ni.

An zinga pakhat a ding ve thei lo a, a sirah a lo thu. A ding thei lo mai a ni lo, a kal thei lo. Mahse, thawnthu a ziak thei.

Ziakmite hi khawvelin a ngaisang a, mi chungchuangah a pawm thlap. Mi naran tan thu leh hlaa kutchhuak neih hi tih mi a ni lo, mi tam zawk ngaihdanah chuan piangphunga vanduaite tan phei chuan a tuma tum mi pawh a ni lo hial mai; Muantei erawhin chu ngaihdan chu a thaichhia a, kal thei lo ni mah se 'novelist' a ni thei tlat!

"Ka tuina a nia, ka naupan lai atangin thawnthu hi chu ka ziak ka ziak ve thin. Hetia a bu-a tihchhuah a lo ni ta hi ka lawm khawp mai, mak ka ti hial," "My Destiny" ziaktu Muantei chuan a ti.

Muantei hi a hmingpum chu K Lalmuanpuii a ni a, Khawzawl nula a ni. A kal thei lo a, a tawlh thei. Mi tam zawk tih theih loh- thawnthu pawh a ziak thei. Chu a thawnthu- "My Destiny" chu June ni 2-ah khan art & culture minister PC Zoram Sangliana'n a tlangzarh a ni.

A vanduaina hi chetsual vanga a tawn a ni lo, a pianpui a ni. A naupan lai atangin tawlh bakin a chesawn thei lo a, puak zel a ngaih avangin lehkha pawh pawl sarih thleng bak a zir thei lo. Chuti chungin hrehawm a ti lo a, a vui hek lo.

"Sikul ka chawlhsan tirhah khan hrehawm ka tia, a bak chu hrehawm ka ti lo. Ka naupan lai khan hrehawm ka ti thin bawk a, tunah chuan hrehawm ka ti lo a, ka vui hek lo," tiin The Aizawl Post a hrilh.

A naupan lai atangin thawnthu ziah hi nuam a ti a, a thiante chhiar turin awmhmunah a ziak melh melh thin. Chu'ng a kutchhuak tam zawk chu midangin an hmu ang tih hlauvin a thiante'n an chhiar zawhah a pawtchhe thin a, mahse, engemaw zat a pawhchhiat hnu-ah, thil awmze hre rual a nih hnu-ah a pawtchhe phal ta lo; 2006 February-a a ziah zawh- "My Destiny" pawh chu a pawtchhe phal ta lo. Mahse, a bu-a tichhuak turin a ngaihna a hre lo a, a dahtha ve tawp. Gilzom Press te thahnemngaihna avangin a bu-a tihchhuah a lo ni ta a, a kutchhuak chu a thiante chauh ni lo a duh apiangte chhiar theih tura tlangzarh a lo ni ta.

He thawnthu hi phek 141-a chhah a ni a, nula leh tlangval inhmangaihna chungchang a ni. Kal thei lo a nih avangin a ziaktu hian a thim zawngin khawvel thlir ta se thil mak a ni lo ang; mahse, chutiang a ni lo, "My Destiny" hi a thim lo a, hlimawm takin a tawp.

"Thil hlimawm hi ka duh. A hlimawm zawnga thlir tlat ka tum," Muantei chuan a ti a, a thawnthu ziah tawh reng reng a hlimawm zawngin a tawp zel tih pawh a sawi.

Mi angin kein kal thei lo mah se a hlim a, hlim hi a tum pawh a tum, hlim loh a duh lo. "Hlim hi ka duh. Hlim hi tum ila kan hlim a ni mai. A hlimawm loh zawnga thlir hi ka duh lo a, engkim hi a hlimawm zawnga thlir zel ka tum," a ti.

"Ka bula awm apiang hi ka hlim chhan a ni mai," ti ngam khawpin a hlimawm zawngin a thlir a, vanduaina tukdawl zawh loh Muantei hian a hlimna hi a tum vanga a neih tih a zep lo; "Ka tum em a, ka hlim a ni, hlim hi tum ila kan hlim mai," a ti tawp!

"Harsatna tawk tur angah inngai ila hlimna hi a hlimawm bik. Harsatna tawk tur anga kan inngaih chuan hlim lo mah ila kan tuar thiam bik," tiin a ngaihtuah dan a sawi.

Muantei chuan sawi zawmin, "Khawvelah hian harsatna tam tak a awm a, mihring nih chuan hlimna te, lungngaihna te, engkim hi kan ta a ni, chutiang chu tawk thei vek kan ni. Chuvangin harsatna tawk thei kan ni tih hi hria ila, eng pawh tawk thei vek kan ni tih hria ila, thil hlimawm kan tawnin a hlimawm bik a, thil hlimawm lo kan tawh pawhin kan tuar thiam," a ti.

Muantei hian Pathian zara a dam chuan thawnthu dang pawh ziah zel a tum a, mahse, sum leh pai leh intihlar tumna lam erawh a rilru-ah a awm lo; "Ka tuina a nia, ka tuinaah ka kal a ni ve tawp. A rem chuan tih zel ka tum," a ti.

Related Posts :