JF Laldailova hming a dai lo

Parliamentary secretary Lalrinmawia Ralte chuan JF Laldailova chu "mi-bik" a ti a, "A tih lamah chuan hriat thamin a che zel," a ti.

Mizo literature tana a thawhhlawk em avangin thang leh tharte pawhin an hriatreng tur thu a sawi a, a dictionary vang ringawt pawhin hriatreng a nih tur thu a sawi bawk.

June ni 8-ah I&PR Auditorium-ah JF Laldailova kutchhuak thenkhat khungkhawmna- "German ral run leh thu ngaihnawm dangte" tih chu ziakmi L Keivom-in a tlangzarh a, Padma Bushan leh Padma Shri chawimawina dawngtu Zofa 19-te chawimawi an ni bawk.

"Chawimawina dawn tum an ni lo a, an thil tih avanga chawimawina dawng zawk an ni," tiin he huna khuallian, Lalrinmawia Ralte chuan Padma awardee-te a fak a, "Hetiang mite hi thangtharte hian ngaisang se ka duh a ni," a ti bawk.

"German ral run leh thu ngaihnawm dangte" tih bu thlirtu (preview)
Lalhruaitluang Chawngte chuan, JF-a kha journalist leh writer ni kawp thei a ni,” a ti a, Mizo literature leh Mizoram journalism tan a sulsutu tiin JF-a a fak.

He lehkhabu-a JF-a thawnthu tawi lehlin chungchang sawiin, “Translator tha ni tura neih ngai chu JF-a khan a nei vek a ni. A ziaktu pawh tibo miah lovin a letling thei thin,” a ti.

JF-a thawnthu lehlin chungchang sawiin, “A ngaihnawmna hi JF-a ropuina vawrtawp a ni lo. A let tha a, a let dik a ni,” a ti bawk.

PL Liandinga'n 'JF-a leh kei' tih a sawi a, JF-a chu Mizo literature tana a thawhhlawk em avanga fakin, Mizo tawng leh Mizo literature-in kawng dik a zawh theih nan sawiselna dawn pawh huamin theihtawp a chhuah tiin a sawi.

PL-a hian a tleirawl laiin JF-a'n a thawnthu lehlin busket pawl-a a khai lai a hmun thin thu a sawi a, mahni thawnthu lehlin busket-a khaikual a chak ve phah thin tih a sawi.

JF-a a hmuh phak avanga a lawm thu leh a vuinaa a tel ve avanga vawiin thlenga a lawm thu a sawi bawk.

"German ral run leh thu ngaihnawm dangte" tih tlangzarhtu L Keivom chuan JF-a ropuina tak tak chu thangtharin an la hre dawn chauh tiin a sawi.

Padma chawimawina dawngtute aiawhin Prof Laltluangliana Khiangte-in thu a sawi a, thangtharte'n Padma chawimawina dawngtute chawimawi nachang an hria chu fakin, Fak an phu angin keini a chawhnu lam tawh hote hian kan naute hi chawk phur thiam mah suh ila, an rilru awm Zo hnam chawi leh voh zui duhna vulh lian zawnga kam hnih-khat han sawi erawh zawng kan ba ni hian a lang si a, rulh ngal dan zawn a ngai a ni," a ti.

He hun hi Zolife editor Remruata Varte-in a kaihruai a, "German ral run leh thu ngaihnawm dangte" tih editor Mafaa Hauhnar-in kalkhawmte lawmna thu a sawi a, C Lalawmpuia Vanchiau-in lawmthu sawina hun a hmang a ni. JF Laldailova leh Padma chawimawina dawngtute ngaisangtu, hall-a leng lo khawp an pungkhawm a ni.

Related Posts :