Hmeichhe kutthlaktu police a zalen

Police SI pakhat chuan mi ramah a training-pui hmeichhe pakhat kut a thlak a, home minister chuan House-ah member-te leh mipuite hriat turin he police hi bantir a nih tur thu leh chhawr chhunzawm a nih loh tur thu a sawi a, mahse a thlawn mai a ni; home minister thusawi hian awmzia a nei ta lo.

October ni 20, 2009 khan North Eastern Police Academy (NEPA) Umsaw, Shillong, Meghalaya-ah 2.2.2009 atanga 35th Basic Training Course beitu Cadet SI Lalchhuanawma chuan a training pui SI C Rosangpuii chu kut a thlak a, NEPA director chuan kutthlaktu hi a hnawtchhuak.

Hetih lai hi 6th Mizoram Legislative Assembly 4th Session neih lai a ni a. He thil thleng chanchinbu-a tarlan chungchang hi home minister chuan House-ah sawichhuakin, "A zahthlak ka ti khawp mai. Khatiang kha khulaia an principal te paw'n an duh tawh loh an ni a. Training chhuah hma hmaa zu ruih avanga hmeichhiate va sawisa kha chu MHIP te pawh hian a hrana lak vun vak loh a thain ka hria a, ban mai tur an ni. Khang kha chu kan chhawr chhunzawm lo ang tih kan sawi nghal duh a ni," tiin a sawi a ni. He thu hi House Member Lalduhoma'n chiahpuam chungchang a zawhna a chhannaah home minister chuan a sawichhuak a ni.

He thil thleng chungchangah hian home deptt lam chuan engtin nge action lak chhunzawm a nih dan vawi hnih a zawt tawh a, mahse chhanna a awm lo niin thudawn chuan a sawi.

Hemi chungchanga thil kal zel dan RTI Act, 2005 hmanga The Aizawl Post-in Information a dil chhanna a hmuh dan chuan DIG (Trg.) Mizoram, Aizawl chuan Nov 10, 2009 khan Show Cause Notice a chhuah a. NEPA-a training SI Lalchhuanawma, rui chunga hmeichhe hostel-a luta a training-pui hmeichhia kut a thlak chungchangah Rule 1044 of Mizoram Police Manual, 2005 hnuaia a chunga hremna (Removal/Dismissal) kenkawh a nih lohna tur chhan ni 10 chhunga sawifiah turin hriattir a ni.

Hei hi SI Lalchhuanawma chuan November ni 11, 2009 khan dawngin November ni 19, 2009 khan a insawifiahna lehkha chu DIG (Trg) hnenah a thehlut a. A insawifiahnaah SI Lalchhuanawma chuan training zinga hmeichhe pakhatin a zarbuai nia sawiin, pawmlai nei a nih avangin hmeichhia chu nei thei lo a nih dan chipchiar taka sawiin, hmeichhia hian intihhlum hial tum anga thu a dawn avanga hmeichhe hostel lama kal niin a insawi.

Hostel chhunga lo awm hmeichhiate hian chhuak turin an lo nam a, an lo beng bawk niin a sawi a ni.

Hmeichhe pakhat a zawn lai hmu tura lut mai nia insawiin, lo tibuai lo tura a hrilh paha talchhuah a tum laiin Rosangpuii chu a tlu ta mai niin a sawi bawk.

Hemi hnu hian Rosangpuii chhungte hnenah a chhungte chuan ngaihdam dilin Pathian hmingin an lo ngaidam niin a sawi nghe nghe.

SI Lalchhuanawma hian November ni 19, 2009 khan insawifiahna lehkha hi a ziak a, hetih lai hian AIG-I, Mizoram, Aizawl chuan November ni 16, 2009 khan SI Lalchhuanawma chu 20.10.2009 atanga hlawh la lo turin Order a chhuah a ni.

Hemi hnu ni18, 2010 khan DGP, Mizoram Aizawl chuan Order a chhuah a; SI Lalchhuanawma hian a insawifiahnaah thiam a intih loh thu leh a chunga zahngai tura a ngen ang hian zahngaihna lantir a ni a, Departmental Enquiry hi kalpui a ni lo ang, tiin Order-ah chuan tarlan a ni. Hei bakah hian a hlawh pawh pek leh a ni ang a, hlawh hrensak a nih atanga a hlawh tur ang pawh pek leh vek a ni ang, tiin Order-ah chuan tarlan a ni a; NEPA Authority-in an remtih chuan training chhunzawmtir a ni ang, tiin Order-ah hian tarlan a ni bawk.

May ni 26, 2010 khan DIG (Trg) chuan NEPA Director hnenah training chhunzawm phalsak tura ngenna a thawn a, mahse NEPA director hian a lo remtih loh avangin June ni 18, 2010 khan Police Training Centre, Dergaon, Golaghat dist. Assam-ah Basic Training phalsak turin ngen leh a ni a, chanchin buatsaih lai hian chhanna hriat a la ni lo a ni.

Hemi chungchangah hian kuttuartu lam chuan, "SI Lalchhuanawma hi suspend a ni lo a, a chungchangah Departmental Enquiry din a ni lo a, hlawh la lo tura tih pawh a lak loh ni atanga la leh tura tih a ni a, training chhunzawm tura dilpui leh mek a ni a, a chungah hian eng action mah lak a ni lo tihna a ni a, hriatthiam harsa kan ti," tiin an sawi.

SI C.Rosangpuii pa chuan sorkar thuneitute kalphung chu mak a tih thu sawiin,"Home minister-in House zahawm takah a member puite leh mipui hriat ngeiah SI Lalchhuanawma hi police atan chhawr chhunzawm a nih loh tur thu a sawi a. Home minister thusawi kha kan ring tawk a, FIR pawh thehluh ngai lo tur leh lo inrawlh chhunzawm tul lo turah kan ngai a, mahse, heti ang hian thil a thleng leh si," a ti a ni.