Hlemhletna lawmman chu

Akbar-a hun lai khan, a kawngka vengtu hi a hlemhle em em mai a, lal in-a lut turte hnenah pawisa a lo khawn thin a ni awm e.

Tum khat chu lalber kawngkapui vengtu-in lal chenna ina lut turte hnenah pawisa a lo thing teuh teuh thin tih thawm Birbal-a chuan a lo hria a, Kawngka vengtu chu hrem dan tur a dap ta a ni.

Tuk khat chu a inchei danglam a, zaimi angin a inthuam a, lal in luhna kawngkapui bulah chuan a va kal a, lal in chhunga luh chu a dil ta a.

"Ka pu, zaimi ka ni a, lalber hla saksak turin ka lo kal a, khawngaihin min luhtir thei ang em?" tiin a dil a.

Kawngkhar vengtu chuan luh manah rangkachak pawisa tlang 20 a lo dil a, zaimi chuan pawisa a neih loh thu a sawi a, mahse lalber hnen atanga lawmman a dawn ang apiang a zatve a pek theih thu a hrilh ve thung.

Lal kawngka vengtu duham tak chuan lawm takin a pawm a, lal in chhungah chuan a luhtir ta a ni.

Birbal-a chu a inchei danglam hneh em avangin lal khawnbawl upate leh lalber Akbar-a thleng pawh chuan an hre lo.

Birbal-a chu aw tha tak nei, zaithiam tak a lo nih bawk avangin lalber chuan zai thiam a ti hle a, a lungawi ngang mai.

Eng nge lawmmanah pek a duh a zawt ta a, chu zaimi Birbal-a chuan eng dang dil lovin "Vawi za min vaw rawh u" a ti a, vawi za vuak chu lawmman atan a dil ta tlat mai!

Lalber chuan mak a ti em em mai. Eng vanga vawi za vuak chu dil tlat nge a nih a zawt ta a ni.

Birbal-a chuan lal in kawngkapui vengtuin pawisa a lo dil thu te, pawisa pek tur a nei lo tih te a hrilh a, lalber-in lawmman a lo pek ang apiang zatve chu a pek theih thu a sawi avanga lal in chhunga luhtir a nih thu te chu a sawi ta vek mai. Chuvangin a lawmman dawn vawi za vuak zatve vawi sawmnga vuak chu lal in kawngkapui vengtu hnena pe ve turin a ngen nghal a ni.

Chu thu a hriat chuan Akbar-a chu a thinrim ta ngang mai. Kawngka vengtu chu man turin a sipaite chu thu a pe ta nghal a.

Lal Akbar-a hnenah chuan kawngka vengtu chu an rawn hruai a, kawngka vengtu chu a mangang ngang mai. Ngaihdam a dil chiam a, mahse a lawmman dawn tur vawi sawmnga vuak chu Akbar-a chuan a hlawhtir a, vawi sawmnga a hnungzanga an vuak hrep hnuah rip chhungah a khungtir zui bawk.

Akbar-a chuan zaimi chu lawmthu a hrilh a, a lal in chhunga hlemhletna lo inphumru haichhuaktu a nih avangin zaimi chu thilpek pek a duh a. Chutia an dinkhawm lai chuan mi tin mak tih tur thil dang a lo thleng leh ta. Zaimi chuan a thawmhnaw inbel chu a hlip a, Birbal-a a lo ni reng si a, "Lalber thilpek dawng turin ka inpeih e," a ti a.

Chu zaithiama chu tu dang ni lovin Birbal-a a lo ni reng tih an hriat chuan khawnbawl upate chuan mak an ti hle. Akbar-a chu a lawm em avangin Birbal-a tan lawmman hlu tak a thehchhuak ta a ni.