Chhung Rual

Chhungkaw khatah mi 160 an awm a, an tlangvalte pahnihin nupui an neih avangin an chhungkaw member hi 162 a ni ta!


Ram pawn media te pawhin an ngaihven hle tawh thin; Lalpa Kohhran Thar hotupa Ziona leh a nupui fanaute chanchin hi.

Ziona te chhung hi Mizorama chhungkaw hung ber an ni awm e; a khawvel huapa thlir pawhin anni aia chhung rual hi an awm bik lo mai thei. Member 160 an ni a, puitling ringawt pawh 100 vel an ni. June ni 10-ah khan Ziona fapa upa ber, Parliana fapa Hmingthanzauva leh Ziona fapa bawk, Lalramchuana fapa Rochuhzela te'n nupui an nei a, 162 an ni ta.

Ziona hian nupui 38 a nei a, fa pawh 94 a nei. A nupui fanaute leh a tute nen Baktawng Tlangnuama an inah an khawsaho a, inngeih loh an nei ngai lo niin an sawi hlawm.

"Naupang na na na chuan han inhauh chang te chu an nei ve a, chutiang chu chhungkaw dangah pawh thil nihphung ve reng a ni a, chutiang bak chu inhmuh thiam loh leh han inngeih loh engmah kan nei ngai lo. Kan awm dual dual a, kan hlim lutuk," tiin Ziona tunu Khumtiri chuan a sawi.

Pa ber Ziona hnenah an pawisa thawhchhuahte an chhungkhawm a, ani'n khawsak a lo rel thin. A nupui hmasa ber hi 'nu ber' tiin an sawi mai a, a nupui dangte pawhin chutiang chuan an sawi mai. Ani hi Ziona tha chhang dawltu ber a ni.

Ziona leh a chhungte chenna in hi a lian hle a, chhawng ruk zet a ni. TV pawh 13 ngawt an nei a, mobile phone awm zat phei chu an chhiar seng lo! Vawksa Kg 30 vel hi an vawi khat ei a ni. Kg 35 ei chang te pawh an nei!

Ziona tute hi an puithiam Engthangpuia'n a inneihtir a, a lawmna pawh a pui khawp mai. Chhun lamah an chheih a, naupang pawh an lam nasa hle. Tlaiah ruai an theh a, amah Ziona ber erawh inneih inkhawmah bak a tel lo. Kum 66 mi Ziona hi hnathawh loh ni-ah chuan a mu hahchawl thin niin a hote chuan an sawi.

Ziona leh a pawlte
Khaw pakhat, in 350 vel leh mihring 3000 chuang awmna, rinna lama thu khat vua an awm i ring em?

'Baktawng Tlangnuam' tiin an khua chu hriat a ni a, 'Khuangtuaha pawl' tia hriat thin, chumi hnua 'Chana pawl' tia hriat, 'Ziona pawl' tia hriat hlawh tate chenna hmun a ni chu hmun chu.

Ziona chu hotu ber a ni a, 'hotupa' tiin an ko thin. Nupui 38 a nei a, fa pawh 94 a nei. A aia fa ngah hi an awm ang em?

A nupui zinga fa hrinsak hnem ber chuan pariat lai a hrin sak a, a dang chuan an hrinsak tam lutuk hlawm lo.

A nupui neih hmasak ber atanga chhutin kumin hian inneih Golden Jubilee an lawm thei tawh. A nupui hmasa ber hi chhungkhat nu ber anga ngaih a ni.

Hotupa Zion-a chu July 21, 1944 a piang a ni a, a birthday hi ropui takin kum tin an lawm thin.

A pawlte chuan an ngaina hle a, an pawl kalphungah pawh Ziona chu an zah hle tih a hriat theih. Hotupa a nihna chu Ziona pawhin tlin takin a kengkawh a ni.

Duh hun huna hmuh theih a ni lo a, duh hun huna biakpawh theih a ni lo. Baktawng Tlangnuam khua chu inthununnain a hneh khawp a, felfai takin engkim kalpui a ni.

Communism leh Socialism a taka a luan dunna tia sawi theih a ni a, chutih rual chuan democracy a langsar hle thung. A duh tan chuan 'dictator' awmna hmun ti pawhin a sawi theih ang.

Chu’ng zawng zawng chu Mizo pa kutchhuak a ni a, Mizo pa, ram leh hnam hmangaih tak ti pawhin a sawi theih ang.

VC hrang an nei a, an zingah political party hrang hrang- MNF, ZNP, MPC, MPCC leh BJP te an awm. Khaw pakhat engkim awmna hmun, mahse, thuthlung pakhat vuan tiin a sawi theih mai awm e.

Ziona tupa pakhat chuan tun hnai lawkah a pu Ziona chu Aizawl-ah a hruai a, Aizawl khawpui an fang chip chiar lo, kawng dungah an tlan a ni mai a, mahse, Ziona chuan Aizawl khawpui a khawngaih.

Duat hlawh lo Aizawl khawpui a lainat tih a tawngkam atangin a hriat theih a, “Aizawl hi neitu an awm lo a nih hi” tiin a tute hnenah a sawi hial.

Baktawng Tlangnuam chu a khua a ni a, a ngaina a, a hmangaih bawk. A khaw tan chuan a thawhhlawk a, Mizo pain a phak tawk chin ruahman chu a ti vek emaw tih hial tur a ni.

Harsa takin a khaw chhungah fur lai pawha an buai loh nan lung a phah chhuak vek a, chu chu hna hautak tak a ni. Mahse, Baktawng Tlangnuam chuan chirhdiak vanga buai an nei ngai lo.

Chu khaw inrelbawlna chu a fuh hle. Naupang chu Inrinni leh Pathianni zan tih lohvah chuan zan dar 6 hnu lamah pawna an chhuah phal a ni lo.

Society tha tak din an tum a, an thu laimu chu intodelhna leh inthununna tiin a sawi theih ang. Chuvanga vawiin thlenga pawl pakhata a huhova awm thei an nihna pawh niin a lang.

Zalen takin dan hnuaiah an leng a, tihluihna leh nawrluihna a awm lo.

Mi tinin an duh an ti thei a, an duh danin an khawsa thei. Ziona pawl tih vanga danglam ta hu-a ngaih tur an ni lo, chutiang a ni lo.

Chu’ng zawng zawng 'manage'-tu chu Ziona a ni a, pa ropui leh chhuanawm a tling. Kuthnathawh an ngaisang a, zirna pawh a ngaisang a, hmasawnna pawh a dahsang.

A hote huikhawm turin a fing a, hmahruai turin a taima tawk a, rorelna kengkawh turin a huaisen bawk.

2002 atanga Baktawng Tlangnuama awm tan Ziona pawl-a mi chuan, “Ka awm tirh ata buaina siam an awm ka la hre lo,” tiin Zozam Weekly a hrilh.

“Zu in te pawh an awm ve a, zu zuar kan awm lo thung a, a induh chuan hmun dang an pan mi thin. Mahse, zu vanga buaina kan neih a awm lo,” a ti.

“Buaina a la awm miah lo a, insual buai leh inhau an awm ka la hre lo,” a ti bawk.

Chuti khawpa khaw thianghlim chuan 2007-ah khan ‘khawfai lawmman’ an dawng hial reng a ni. Chu chu India sorkar pek a ni a, an khua lah chu a fai reng bawk.

Hnathawh chu an thupui a ni a, thingtlang khaw dang ang lo takin zelthel hmuh tur an awm lo. Tute pawh chuan rim takin hna an thawk a, an hnathawh chu Mizoramin a hmelhriat a, tukverh frame leh suan atanga bel siam thlengin, Mizoram hian a hmelhriat phah a nih hi.

Khawilama mi nge hmanah heng hi?
Hmanah chuan Khuangtuaha a awm thin. Khuangtuaha pawl tia hriat lar an ni a, kal sual anga sawi pawh an ni.

Hmawngkawn khuaa awm thin an ni a, mahse, an rinna a dan deuh avangin Hmawngkawn khua atanga hnawhchhuah an ni.

Ramhnuaiah bu an khuar a, chu chu June 12, 1942 daih tawh kha a ni.

Bawkte an sa a, hnawhchhuah an nih avangin buk an siam a, chuta tang chuan vawiin thlenga an hman Bawkte Kut chu an la urhsun a, an kohhran din ni angah an la ngai ta a ni.

Bawkte Kut chu an ngai pawimawh hle a, ruai thehin a khaw pumin an lawm thin a, a ropui thei ang berin Bawkte Kut chu an hmang thin.

Khuangtuaha chuan fapa Chana a nei a, Chana hruaina hnuaiah 'Chana pawl' tia hriat lar an ni a, Chana thih hnuah pawh a fapa, a aia a ruat Ziona hming chawiin 'Ziona pawl' tia hriat lar an ni ta a ni.

Chana piancham pawh an lawm tho a, mahse, Ziona piancham (July ni 21) chu an lawm pui ber. Krismas te pawh an lawm tho bawk.

An kohhran chu 'economy'-ah a innghat tih an hrechiang hle. Chumi a nih avang chuan an taima em em a, an tih tawhah chuan a tha ber nih an tum thin.

Naupang an enkawl dan pawh a dangdai khawp mai. Zing dar 4:30-ah Beginner atanga Senior thlengin kawtthler tinah ram tan an tawngtai thin. Ram tan an tih hian Mizoram tan a ni.

Thununna chu an chakna a ni a, tih loh tur chu an ti lo mai a, tih tur chu an ti mai.

Zirna an ngai pawimawh em em a, middle school leh high school hi anmahni din a ni. Exam hnuhnung berah khan high school-a an regular candidate-te chu an pass kim vek.

Sikul naupangte pawhin tih tur an nei, khaw chhunga zun in leh khawlai zawng zawng an thianfai thin.

Kum tinin football tournament tum hnih an nei thin. An football ground lah chu anmahni sensova an laih a ni a, sorkar hnuaiah chuan ni se a nuai tel senga an laih tur a ni.

Hotupa Ziona chuan kum 66 zet tling tawh mah se football a la khel dur dur peih!

Kum khatah tournament tum hnih an nei thin. An tournament te chu a satliah lo a, thupui nei ngat a ni thin.

Kum tin December thlaah ‘Thil siamte hun chan’ tournament an nei thin. Chu hun chu rannungte tihnat loh hun a ni a, inzirtirna hun a ni bawk. Chu tournament-ah chuan mak tak maiin vakulte pawh an inlar thin niin an sawi.

Chu tournament hriatrengnan chuan thinga tuk ramsa chi hrang hrang lem chu field chhungah pholan thin a ni.

Tournament dang an neih leh chu ‘Pindan lehlamte hun chan’ tiin an vuah. Chu chu kum tin Febraury ni 6-ah an nei thin. Hei hi anmahni pawl chauh ni lo mitthi tawh hrim hrimte hriatrengna pual a ni.

An tournament hi a ropui thin khawp mai a, thla khat a daih changte pawh a awm thin.

Khaw inlungrual tak an ni a, tu te pawh innei se awmni khamin an lawm thin.

Zirna leh infiamna an uar a, dikna leh faina an inzirtir nasa hle.

Related Posts :