Chhiarpui boruak leh kan nunkhua

Hetia kan unau thenkhatin chhiarpui leh sakawlh an hmehbel hian kan zia- eng eng emaw a lo lang a.

Theology lama kan dinhmun a lang a, theologian ni lovin an hriatthiam dan dana Pathian thu an hrilhfiah thinzia leh mipuiah hralh a tlak thinzia a lang awm e.

Kan tlangval thenkhatin "khaw'nge, ka hman bawk a, kan Kohhran zaipawl zir tur hla ka'n letling teh ang" tia an talent a nih leh nih loh pawh ngaihtuah lova an hel nuai thin ang hian, 'ka thiamzawng a ni em?' tih te, 'a zirmi ka ni em?' tih te ngaihtuah lo lekin kan duh duh kan ching pawr ve chawr zel mai. Kan Mizo literature pawh hi writer emaw inti, poet emaw inti tu tu emaw hian a than an tithu a, a tlar hma chang thei theiah an tang emaw lehnghal ni! Thil hrang hrangah chutiang chu sawi tur a tam ang. Pathian thu-ah pawh hian chutiang deuh chu kan ni awm e; a zirchhuak emaw, thlarau pawlna thuk tak chang emaw inti, a hrilhfiahtu ni tlata inhria kan thahnem hle a, theologian te phei chu ro pawh kan ti thin nghe nghe mawle!

Mipuiin Pathian thu kan hriatna hnar lian ber berte hi theologian-te ni lovin, evangilist leh Upa-te an ni zawk mai thei. Kan tlangval piangthar tam zawk hi theologian ni lo ke bula piangthar an ni mai thei. Chu chu eng vang nge ni ta ang? Kan theologian-te hi an ro lutuk nge mipui hian theologian kan mamawh lo ve hrim hrim? A zirchhuak chauh rin tur tihna a ni chuang lo; a zirchhuak pawh ni lo mah se thlarau pawlna tak tak chang an nih chuan a tha hlei hlei pawh an ni ang, tin, certificate hlawhchhuah kher pawh a ngai lo a, mahni inzir peih ve hrim hrim te pawh a awm theih. Mahse, zirchhuak lo, mahnia inzir chuang lo, thlarau pawlna pawh chang tak tak chuang lo chunga zuitu nei duah thei engemaw zat kan nei deuh reng niin a lang a, hei hi theologian-te chuan mualphona a tling.

Chu lo lehah chuan, sakhuana la urhsun kan lo la ngah hle tih a lo lang a, thil lawmawm lam a ni. Kan politician- mipui zah lo Pathian hlau lo te'n min tidal zo tawh emaw tih laia sakawlh thawhpui aia hrehawm tawrh thlang zawk mi heti zat kan lo la nei hi a lawmawm. Kan milian te'n nawmsakna leh sum leh pai hi emaw dam chhan an tih laiin kan unau thenkhat erawhin sakawlh rim nama intahluh ai chuan sorkar atanga hamthatna te pawh dawng lova hrehawm taka awm an thlang zawk hi a ropui a ni, chhiarpui an hriat dan a dik leh dik loh chu thuhran ni se. Ram hruaitu dawt sawi chingte hian hun hnuhnung chungchang leh sakawlh chungchang te hi ngaihven ve deuh se, an tan leh ram tan pawh chu chu a tul asin!

Tlema mi chuanhnuai leh berh deuh, khawvel thila innghahna nei ve lote hi thil eng emaw a lo thlen chang hian an hriat thin. Kan mihausa leh tlema a awm thei deuh chinte hian chhiarpui hi sakawlh a ni lo tih an hrechiang a ni bik lo ang; he khawvelah hian an ralmuang a, hlauh tur an nei lo mai zawk a nih a rinawm. Theology dik an hriat bik vang a ni vek hauh lo ang. Chhantu mamawhte hi an nghing hma a, chutiang mite chuan Pathian pawh an au ngun ang, tin, hun hnuhnung chungchang te pawh an ngaihtuah nasain a rinawm. Kan thil tawn mekah pawh hian, zaa za chu ni lo mah se engemaw chenah chuan chhantu mamawhte dinhmun a lo lang ang tih a rinawm.

Sakhuana thil a ni a, lak vung theih deuh mai a ni. Mi ramah pawh hetiang thil leh a kaihhnawih thil eng eng emaw a thleng fo. Kan ngaihsan em em USA-ah te khuan rinna lama an kalsual avanga intihlum an awm thu chanchinbu-ah a lang fo a, Kohhran chakna ram S Korea-ah te ngei pawh Isua nghaka chaw ei lova inkhungkhawm an awm fo. Kristian zingah lo pawh, Hindu leh Mosolman zingahte pawh chutiang lam hawi chu a thleng fo a, mihring zingah a thleng thin ti ila a fun kim mai awm e. Chutiang chu kan zingah a lo thleng ve a, mawl intih chiam chiam tur a ni lo ang, a tha e tihna ni lovin. Mihring zinga thleng thin kan zinga a lo thlen ve chang hian- a thawk a phit-a mawl intih vak kan ching thin a, chu chuan min tilungrual lo ta thin, a pawi khawp mai.

Related Posts :