Chanchin Maksak 79

Thiante kuta sa hrang hmu lian

'Melody Queen' tia sawi Lata Mangeskar hi thlalak (photography) lama tui, thla la thiam deuh mai a ni a, tun thlenga a tuina, a hobby pawh a la ni. Mahse, mi thla lak tha deuh a hmuh atangin a ti tha duh tawh lo!

June ni 18 zanah khan Marathi lehkhabu "Chehre" (Faces) tlangzarhnaah Lata hian thlalak a tui thu hi a sawi a, a sawi tui hle.

1946 velah khan thla a la nasain nuam a ti thin hle tih a sawi a, thiam pawh a inti ve hle thin niin a sawi.

"1946-ah khan rolleiflex camera ka lei a, thla ka la nasa thin khawp mai. Thiam ka inti khawp mai a, mahse miin ka thla an lak erawh ka duh ngai lo," a ti.

Thlala thiam hmingthang (milarte thla la thintu) Gautam Rajadhyksha nena an intawn dan sawiin, "Gautam-a'n min rawn bia a, ka thla a lak duh thu a rawn sawi a, mahse ka hnar char char," a ti bawk.

Salil Chaudhary-a studio-ah Bengali hla a thun (record) a, Gautam-a chuan a kal chilh ta a ni awm e. Gautam-a chuan a thla chu nalh deuh deuhin a la a, chu'ng thlalak vel a hmuh atang chuan a insit ta niin Lata chuan a sawi.

"Chu'ng laia Gautam-a'n ka thla a lakte chu hmun hrang hrangah an tar a, hmuhnawm ka ti khawp mai. Mahse, ka thla lak aiin Gautam-a thla lakte chu a nalh zawk tih ka hrechhuak a, chuta tang chuan ka bansan ta a ni," a ti.

Gautam Rajadhyksha ngei pawh hian Lata-i chu thla la thiam tiin a fak a, a thiam avang hian ama thla lak pawh a har phah nia sawiin, "A thla hi lak a har lutuk, photographer tha a nih avangin. Photography a hre lutuk a, min tibuai," a ti.



I upatna tuman ngainep suh se
US president hlui Ronald Reagan-a kha pa rilru chak, mi han chhan vel zung zung thiam zet mai a ni a, amah chhaih buai tumtu te hi a 'dang' zawkah an tang leh thin.

1980-a President-a thlantlin a nih khan kum 69 zet a ni a, President upa ber a ni nghe nghe. Term dawt leha a'n ding leh chu a khingpuite chuan a upatna hmang chuan an bei nasa hle. A khingpui Walter Mondale nen TV-ah debate an neih tumin zawhna zawttute hian term khat dang president han ni leh turin upa a inti em tih an zawt a, ani chuan kum lam thil sawi a duh loh thuin a lo chhang var a.

A sawi zawm zel a, "Ka khingpui pa naupanna leh tawnhriat neih lohna hi politics-a hlawk nana hman ka duh lo" a ti et!