Mizoram-ah foreigner an pung

Aizawl khawlaiah sap emaw khawchhak lam unaute emaw an tei lawp lawp fo a, khaw dangah pawh hmuh tur an awm leh nawlh thin. Tun hnaiah foreing atanga Mizoram tlawhtu an pung a, mipui nawlpui pawhin khawlai vela foreigner hmuh changin mak an ti vak ta lo niin a lang.

2010 January-March chhung khan foreigner 240-in Mizoram an tlawh a, kum dang ngaihtuah chuan Mizoram tlawhtu hi an tam hle. Tun hnai kum 5 chhung enin 2010-ah kum tir thla 3 chhunga Mizoram tlawhtu an tam ber a, a dawttu chu 2008 niin, hemi kum January-March chhungin foreigner 161-in Mizoram an tlawh a ni. Hemi kum hian mautam vanga Mizoram tlawhtu an tam ve reng reng tih thu dawn a ni.

2006 January - March chhungin foreigner 142-in Mizoram an tlawh a, 2007-ah 144, 2008-ah 161, 2009-ah 123-in Mizoram an tlawh a ni.

Kum 10 chhunga (1999 atanga 2009) Mizoram tlawhtu foreigner zat, Foreigner Registration Office-a an chhinchhiah danah chuan kum 10 chhung hian foreigner 3721, mipa 2344 leh hmeichhia 1377-in Mizoram an tlawh a, 2009 chu Mizoram tlawhtu foreigner an tam ber kum niin, mi 545-in Mizoram an tlawh a ni.

He'ng foreigner-te hi ram hrang hrang 82 atanga lo kal an ni a, American an tam ber. Kum 10 chhung hian American- mipa 598 leh hmeichhia 362-in Mizoram an tlawh a ni.

Australian-in an dawt a, mipa 245 leh hmeichhia 198-in Mizoram an tlawh. Mizorama Kristianna puluttu ran, sakhuana thil vanga Mizoram rawn tlawh reng reng thin British-in an dawt leh a, mipa 313 leh hmeichhia 199-in kum 10 chhungin Mizoram an tlawh.

Kohhran thilah an rawn lan ngun avangin British-ho hi tam ber turah an ngaih theih mai thei a, an tam ber lo hi thenkhat chuan mak an ti deuh mai thei. Mahse, an chunga mi- American leh Australian zingah pawh hian Kohhran thil avanga Mizoram tlawhtu an tam a, British dawttu Canadian leh German-ho zingah pawh sakhuana thil avanga Mizoram tlawhtu an tam.

American, Australian, British, Canadian leh German te tih lohah ram thianghlim (Israel) atanga rawn kal an tam ber a, hei hi Isua pianna ram-a mite'n "Kristian ram" Mizoram an tlawh chak vak ni lovin, Zofate zingah Israel rama pem an tam vang zawk a ni.

Mizoram atangin Israel hnam bo nia inhriaa Israel-a pem thla mi 1000 chuang an awm tawh a, chu'ng mite chu Mizoramah an rawn kal changin, passport leh VISA a ngaih avangin Foreigners Registration Office-a chhinchhiah an ni thin a ni.

Khawchhak lam unaute hmel hmuh tur Mizoramah awm ve ta fo mah se sapho nena khaikhin chuan Mizoram tlawhtu zingah an tam lo hle; India sorkarin Look East Policy hmangin khawchhak lam hawi tum mah se khawchhak lam unaute hian Mizoram lam an la rawn hawi lutuk lo a ni mai thei.

Kum 10 chhunga Mizoram tlawhtu zingah khawchhak lam unaute zingah Japanese an tam ber a, mipa 114 leh hmeichhia 13 an awm. Japanese zingah hian thil pawimawh ti tura Mizoram sorkarin a chahluh an tam. Korean 108 an awm a, mipa 63 leh hmeichia 45 an ni. Korean zingah hian Kohhran thila rawn kal an tam a, a huhova rawn zin an tam bawk. Mizoram tlawhtu Korean-te hi S Korea atanga rawn kalte vek an ni a, N Korea lamin Mizoram an la rawn tlawh ngai lo hrim hrim niin a lang.

Japanese leh Korean tih lohvah chuan Malaysian an tam leh a, mipa 114 leh hmeichhia 18-in 1999-2009 chhung khan Mizoram an rawn tlawh a ni. Taiwanese, Thai, Vietnamese, Chinese, Filipio, Indonesian, Singaporean leh Burmese te an awm bawk.

Mak ang reuh deuh chu- kum 10 chhunga foreign atanga Mizoram tlawhtu hnam hrang hrang zingah Burmese 8 chauh an awm hi a ni. Foreigner Registration Office-a an chhinchhiah dan chuan 2002-ah 1, 2005-ah 2, 2006-ah 2, 2007-ah 1, 2009-ah 2 Burmese-in Mizoram an tlawh a ni.

Mi 8 chauh chhinchhiah ni mah se Mizoramah Burma atanga rawn kal an tamzia chu tlang hriat a ni. Amaherawhchu, Mizoram-a rawn kal zawng zawng deuh thaw hi raltlan leh tlanchhia an ni a, dan zawma rawn lut tura beisei theih an ni lo. Chu lo rengah pawh India leh Burma-ah hian a lehlam lehlamah, ramri atanga Km 40 chhung chu passport leh VISA tel lova zalen taka kal theih a ni a, chu chuan Burma ram atanga Mizorama kal a tiawlsam bawk. Tin, Burma atanga Mizorama rawn kalte hi Zofa an ni tlangpui a, mahni unaute hnena tlanchhia an nih avangin dan an zawm diak diak kher lo ni pawhin a lang. Mizoram atang pawhin dan zawm lova Burma rama kal an tam ve tho. A thu hrimah Burma rama Zofate hian Burmese tih pawh an duh chiah lo, a la hmu lo zingah pawh Mizoram ngaia lungleng an tam mai. Chuvangin, Burma atanga Mizorama kal mi 8 chauh chhinchhiah an ni hi thil mak a ni lem lo, a that leh that loh chu thuhran ni se.

Mizoram thenawm- Bangladesh atang pawhin kum 10 chhungin Mizoramah mi 54 chiah an rawn kal! Bangladesh atanga Mizoram tlawhtu, Foreigners Registration Office-a an chhinchhiahte hi Buddhist puithiam an ni tlangpui a, Mizoram chhim lam Chakma-te hnena zin an ni tlangpui bawk. Mi 54 chauh ni lo, Bangladeshi tam tak Mizoramah an rawn kal nia sawi a ni a, dan zawm lovin an rawn kal nasa tihna a ni thei ang. Chutih rual chuan Bangladesh-ah hian Zofa engemaw zat an awm a, anni pawh hi Burma atanga rawn kalte ang deuh khan, dan zawm diak diak lo mah se "ka ram" tia an sawi thin- Mizorama zin an ni, Bangladeshi tih pawh an duh lo. Amaherawhchu, Zofa ni lo, Bangladeshi dik tak Mizorama dan zawm lova rawn lut hi chu an tam ang tih chu ngaihdan tlanglawn a ni.

Nepali pawh an tlem khawp mai; kum 10 chhunga Foreigners Registration Office-in an chhinchhiah chu mipa 2 chiah!

Kum 10 chhung hian Maradona te ram atangin mi 7, mipa 5 leh hmeichhia 2-in Mizoram an tlawh a, Ronaldinho te ram atangin mipa 3 leh hmeichhia 2 an rawn kal bawk. Christiano Ronaldo te hnam hi an reh khawp mai; 2008-ah khan mipa 1 a rawn kal ve a, chu chauh chu Mizoramin Portugese a mikhual a la ni.

"Switzerland of the West" atangin mi 57, mipa 18 leh hmeichhia 39-in kum 10 chhungin Mizoram an rawn tlawh a, Romeo leh Juliet-i te ram- Italy atang pawhin mipa 11 leh hmeichhia 1-in kum 10 chhungin Mizoram an tlawh. Romeo leh Juliet-i te ram atangin mi 12-in Romawia leh Zoluti te tual chaina ram an tlawh tihna! Heh!

Tun hnaia lirnghingin a sawisak zek- Haitian-ho pawh an 'nil' lo; 2002-ah mipa 1 a rawn zin ve e.

Arestotle-a te ram, democracy chingchhuaktu Greek-ho leh democracy ram lian ber-a state ralmuang ber inti Mizoram hi an intlawhpawh tawn vak lo khawp mai; kum 10 chhungin Greek hmeichhe 2-in Mizoram an tlawh a, chu bak chu philospher ropui tak tak chawrchhuahna ram Greece atangin ziak leh chhiar thiam ram-a zin an awm lo.

Indopui Pakhatna-a kan pute rammutna ram pawhin Mizoram an rawn tlawh nasa lo khawp mai; lawmthu rawn sawi te pawh tul an ti lo emaw'n teh reng ni! 1999 atanga 2009 thleng khan 'Feren' mi 40, mipa 28 leh hmeichhia 12-in Mizoram an tlawh.

Kumin chhungin, Foreigners Registration Office te'n an chhinchhiah dan chuan, April ni 26 thleng khan foreigner 319-in Mizoram an tlawh tawh a, he'ng mi 319-te hi ram hrang hrang 32-a mi an ni.

Kumin chhunga Mizoram tlawhtu foreigner zingah hian American an tam ber a, 84 an ni. Australian 47 an awm a, British 28, Thai 21, Canadian 19, Filipino leh Korean 18 ve ve an awm. Mizoram thenawm Burma atanga Mizoram tlawhtu an la awm lo a, Bangladeshi erawh 5 an awm tawh.

Isreal atangin kuminah mi 9-in Mizoram an rawn tlawh tawh a, anni hi Mizoram atanga pem thla, rawn haw/zin an ni tlangpui.

Ram danga inbengbel Zofa thenkhat chu an inbenbelna ramah khua leh tui nihna dilin, a ram mi an ni thin a, anni ang pawh hi Mizorama an rawn haw changin Foreigner Registration Office-a in-report zel tur an ni. Zikpuii Pa fanu Margaret Lallianpuii, Australia-a inbengbel erawhin, 'Mahni rama rawn haw changa foreigner nih ka duh lo,' tiin Australia-ah hian a theih chhung chu khua leh tui nihna (citizenship) dil a tum lo a, a inbenbelna ramah mikhual cham rei a la ni ta reng.


Kum 10 chhunga foreigner-in Mizoram an tlawh dan
1999 - 216
2000 - 256
2001 - 151
2002 - 187
2003 - 232
2004 - 386
2005 - 306
2006 - 470
2007 - 413
2008 - 568
2009 - 545

Total - 3721


Kum 10 chhunga Mizoram mikhual ngah deuh deuhte
American - 960
Australian - 443
British - 512
Canadian - 400
German - 194
Israel - 165
Japanese - 127
Korean - 108
Malaysian - 132


Kum 10 chhunga Mizoram tlawhtu khawchhak lam unaute
Japanese - 127
Korean - 108
Malaysian - 132
Chinese - 23
Filipino - 22
Thai - 18
Taiwanese - 11
Indonesian - 8
Burmese - 8
Vietnamese - 7



Mizo zingah chhinchhiahna ngai pawimawh lo

Mizoram hi Protected Area a nih avangin Mizoram tlawhtu foreigner reng reng Mizoram leilung an rah atanga darkar 24 ral hma ngeiin Foreigner Registration Officer/SP, CID (SB) hnenah an in-report tur a ni a, Mizorama an cham chhunga an awm dan tur, tih tur leh tih loh tur an permit-a inziakte an zawm ngei tur a ni. Dam zawm lote chu man-a hrem theih an ni. Chutiang a nih laiin Mizoram tlawhtu foreigner sponsor-tu zingah dan ngai pawimawh lo an awm thin.

"A foreigner-ate hi chuan an ngai pawimawh a, a sponsor-tu Mizote zawk hian an ngai pawimawh lo thin a, a buaithlak khawp mai," thudawn chuan a ti.

"Mizote hi kan ngaih a sam thin nge, mahni mikhualte emaw in-report kher tul ti lo an awm thin a, foreigner nupui/pasal-a nei zingah pawh an nupui/pasal te in-report kher tul ti lo te an awm thin. Hei hi hnam tan a pawi thei a, Mizorama foreigner rawn kalte uluk taka chhinchhiah thlap thlap loh hian thil tha lo a thlen thei a ni tih kan hriat tlan a tha khawp mai," thudawn chuan a ti bawk.

Foreigner Registration Office-a chhinchhiah zat hi sorkar laipui-ah thawn thlak a ni thin a, chhinchhiah kim a nih loh hian thil a tibuai chuar thei tiin a thawkte chuan an sawi.

Foreigner Registration Office te'n an chhinchhiah dan chuan kuminah Taiwanese 1 Mizoramah a rawn zin tawh a, chutih laiin Chapchar Kut-ah khan Mizoram sorkar mikhual Taiwanese panga vel chu Lammual-ah hmuh tur an awm si! Mizoram sorkarin present te pawh a pek nghe nghe kha.

Govt of India Order 1958 (Under the Foreigners Protected Areas Order 1958) hmangin he'ng hmunte hi Protected Area-ah puan a ni:

(i) Arunachal Pradesh pum
(ii) Himachal Pradesh hmun thenkhat
(iii) Jammu & Kashmir hmun thenkhat
(iv) Manipur pum
(v) Mizoram pum
(vi) Nagaland pum
(vii) Rajasthan hmun thenkhat
(viii) Sikkim pum
(ix) Uttaranchal hmun thenkhat.

Protected Area hi foreigner-in an tlawh dawn a nih chuan Protected Areas Permit (PAP) a ngai a, PAP dil tur hian a tlem berah mi 4 tal nih a ngai. Nupa tan a dil theih bawk. PAP hi sorkar laipui hnuaia ministry of home affairs-ah dil tur a ni a, chu chu state sorkar/sorkar laipuiin travel agency, PAP buaipui tura a tih (Mizoramah chuan Omega Travels) kaltlangin state sorkar hnuaia home department-ah thehluh leh tur a ni.

Phalsak an nih chuan home deptt. chuan ni 10 chhung atan PAP a lo siamsak ang a, chumi hnu-ah chuan Protected Area-ah an lut thei chauh a ni.

Mizoramah chuan Lengpui Airport an thlen veleh foreigner-te lo dawngsawng tura dah- police te hnenah an in-report nghal tur a ni a, motor-a an rawn kal a nih pawhin Vairengte Police Check Gate-ah an in-report tur a ni.

Mizoram leilung an rah atanga darkar 24 chhungin Foreigner Registration Office/SP, CID (SB) hnenah document kimchang nen an in-report leh tur a ni. Dan zawm lote chu dan bawhchhia, man-a hrem theih an ni.

Related Posts :