CBI-in Tuirial Project chhui dawn

Hun engemaw chen titi a luah ta; politics-a inbeihna ber pakhat a ni a, mipui titi lar a ni bawk, Tuirial Hydel Project hi.

Gauhati High Court chuan Tuirial Hydro Electric Project chungchang hi CBI lamin chhui se tiin thu a titlu ta.

Hna engemaw zat thawh a nih hnu-ah Tuirial HEP hi a thawktu Neepco lamin an chawlhsan a, an chawlhsan chhanah hian compensation a tam vang tih te, inpuhna hrang hrang a awm. SOSA (Society for Social Action) te'n Gauhati High Court-ah PIL an thehlut ta a, March ni 26, 2008-ah pawm a ni. Court hearing te neia a ngaihtuah hnuah April ni 21, 2010-ah khan thu titluin, CBI chhui turin a ti ta a ni.

"CBI-in an chhui chuan hun a duh rei kan ring lo, document leh thil pawimawh dang kan nei sa a, rei lo te chhunga an chhui fel mai kan ring," SOSA president SL Sailova chuan a ti.

"He thilah hian thil dik lo a awmin kan hria a, tin, inpuhna neuh neuh a awm bawk a, court-in chhui se ram tan a that kan rin vangin PIL kan thehlut ta a ni," tiin PIL an thehluh chhan a sawi.

Tuirial Hydro Electric Project hi 1991 khan a siam dan tur ruahmanna engkim peihfel (Detail Project Report-DPR zawh fel) a ni tawh. 1992-ah techno-economic clearance neih niin, 1994-ah forest clearance neih a ni a, 1996-ah chuan hna tan theih a ni tawh.

A senso lam chu Japan company pakhat Overseas Economic Cooperation Fund tum tur niin, chumi atan chuan inremna pawh siamfel a ni. Tui khuap a nih dawn avangin sorkar chuan tui chim tura ruahman huam chhungah ram pata neih phal a nih loh thu hriattirna (notification) March 3, 1997-ah chhuah a ni.

Hemi hma, DPR peih hnu si, 1992-ah khan Land Settlement and Revenue deptt. pawhin Saipum leh Saiphai vel chu sorkarin thil tula a hman theih turin protected area-ah a lo puang tawh bawk. Notification chhuah a nih lai hian ram pata nei chu mi 48 vel chauh nia hriat a ni. Tichuan, 1998-ah khan hmarchhaka electric power siamchhuah hna thawk tura din North Eastern Electric Power Corporation (NEEPCO) chu hna thawk tura tih niin foundation phum a ni ta a ni.

Hna thawh dan tur ruahmannaah chuan Mizoram sorkarin ram a ngaihtuahsak tur a ni a, compensation pek turte chu NEEPCO hnenah hian Mizoram sorkarin a thlen ang a, NEEPCO chuan compensation hi a lo pe tur a ni.

July ni 31, 1999 ral hmaa ram lak (land acquisition) hi tihfel hman tur, tih a nih laiin NEEPCO chuan compensation pek turte chu pek tih ni reng a nei ta lo. A nihna takah chuan November ni 7, 1997-November ni 12, 1997 chhung khan ram lak turte a hmunah enfel a ni tawh a, January ni 6, 1998 - January ni 16, 1998 chhung khan ram lak turte hlutna pawh chhut fel vek a ni tawh si.

Inremnaah chuan OECF hian NEEPCO hnathawh dan chu a enzui reng ang, tih a ni. Ram lak fel a nih loh avanga NEEPCO-in hna an thawk mumal thei lo chu an ngaihdan a ni lo a, an tur reng nghe nghe. NEEPCO mangang chuan March ni 22, 1999 khan ram lak hi tifel thuai thuai turin Mizoram chief secretary hnenah lehkha an thehlut ta nge nge a, July ni 31, 1999-a tih fel theih hram an inbeisei a ni.

Mahse, Mizoram sorkar chuan August ni 20, 2001 khan ram acquire-na tur notification a'n chhuah leh hnuhnawh a! Hemi tum hian ram 'pata' nei hi mi 1026 an lo tling hman nia thu dawn a ni. Compensation atana senso tur pawh OECF nena inrem hnua estimate revise a niha cheng vaibelchhia 4.31 tura ruahman chu cheng vaibelchhia 47.97 a kaichho ta dawrh mai. Tichuan, "Lal chhungkua" tih tawngkam te a lo chhuak ta a ni.

Compensation pek dan tur ruahmannaah chuan tui khuahna hmun (dam site) Mauchar leh Saipumah Rs 34,00,000 pek tur a ni a, hei hi pek fel nghal pawh a ni. Tui luan tirna tur (borrow area) Mauchar leh Saipumah tho Rs 68,52,716 pek tur a ni a, hei erawh pek an la ni lo. Hemi pahnih hi chu thil a kal fel a, compensation dawng leh dawng turte pawh Mauchar leh Saipum mi vek, mi tlem tê niin thudawn chuan a ti.

Environment & forest deptt. hnenah hian compensatory afforestation (tuikhuahin ramngaw a tihchhiat thleng nana ramngaw dang siamna tur), anti-poaching scheme leh catchment area treatment plan (afforestation & soil conservation) atan te cheng vaibelchhe 24.45 pek tura tih a ni. Environment & forests deptt. hian cheng vaibelchhia 7.94 an dawng daih tawh. Hetih lai hian Tuirial Compensation Claimants Association (TCCA) lam chuan environment & forests deptt. hmalakna chu lungawi thlak an tih loh thu leh he thilah hian inhnamhnawih lo mai tura an duh thu an sawi uar thin hle.

Chutianga thil a'n kal hnuaah chuan Tuirial hydel project siam nana senso tur ruahman cheng vaibelchhe 368.72 atanga cheng vaibelchhe 47.97 chu compensation atana ruahman a ni ta hial a, chu chu 13% chuang a ni pha daih!

He Hydel Project atana senso tur ruahmanah (estimate) hian 1991-a siam estimate hmasa, 1997-a ennawn a nih khan compensation tura sum dah chu tlem lo tak a ni tawh reng reng. 1991-a senso tur estimate, cheng vaibelchhe 129.63-a cheng nuai 31.93 chu compensation atana ruahman (land - 10.14, environment & ecology - 21.79) a ni a, chu chu senso tur pumpuia .24% chauh a ni. Mahse, 1997-a estimate revise a nih khan compensation atan cheng vaibelchhe 4.31 dah a ni a, estimate pumpui pawh 368.72-a tihsan a ni. Tichuan, compensation atana senso tur chu project estimate pumpui atanga 1.16%-ah a kai chho ta dawrh mai a ni. Chumi hnuah 13% a kaichho leh bawk.

He hna hi June 2004 atanga chawlhsan a ni a, tun hnaiah hna thawk turin Mizoram sorkar leh NEEPCO te hi an inrem leh tawh. Chutih laiin court chuan a tih tur a lo ti a, CBI chhui turin a dah ta a ni.