Inzawn Hi

¢ M Lalmanzuala

Sialsuk khaw mipuite chuan kan chief minister, an khaw tlawha zin chu, a nupui nen an lo zawn a ni tih chanchinbu atangin kan lo hriain an zawn lai thla te pawh kan hmu a. Hetiang hi tih dan tha lo ni-a a lan avangin ngaihdan kan han sawi ve a ni.

Kan Pathian thu chuan mihringte hi Pathianin a anpuia a siam kan ni tih min hrilh a. Pathian anpui chu a ropui a, thil a ti thei a, a zahawm a ni. Hei hi hriain Pathian rawngbawltu tha Mother Teresa chuan kawngpui sira bawlhhlawh zinga phar thi lek lek tlusawp renga awm chu amah anga Pathianin a anpuia a siam a nih avangin hmangaihna thinlung dik taka khawngaihin a pawm haw a, khumah a muttir a, a tifai a, ei tur leh in tur a pe a, amaha mihring zahawmna (human dignity) awm chu a humhalhsak a ni. Chutianga tih chu Pathian thu a nih dan dik taka zawm dan tha a ni.

Pathian anpui mihringin a mihringpui a zawn chuan amaha mihring zahawmna awm kha a tizahawm lo a, sakawr emaw sabengtung emaw ang velah a inchan tihna a ni.

Hetiang dinhmuna mahni mihrinpuite dintirtu pawh a dik chuang lo- a tel ve tlat avangin. Kan Lal Isua pawh kha tum khat sabengtung chunga a chuan bak kha chu kal pangngaiin a kal ve mai thin a nih kha.

Kan Sialsuk unaute tih dan hrim hrim pawh kha hriatthiam har lai deuh chu a awm. Mizoram khaw 813 zinga hmasawn lo ber ni-a inngai an nih thu te kan lo chhiar a. Chu chu tak tak a nih chuan chutiang dinhmuna an dinnaah chuan kan Chief Minister neih tawh zawng zawng chu mawhphurtu-ah kan ngai tur a ni ang. Chuti a nih laia an zinga pakhat chawimawina sang tak lo pek a, ‘thangchhuah’ nihna lo hlan lawi si chu thil inhmeh vak niin a lang lo. Hmathlir an thiam viau a nih chuan thu dang ni se.

Hetiang thu kan sawi rual hian hemi nena inkungkaih, mimal inngaihsan lutuka Pathian ang thaw thanga indah, Sap tawnga 'personality cult' an tih hi, hruaitu dinhmuna dingin ram leh hnam tana thil tha leh tangkai a tih avanga hruaitu nihna a neih theih zelna ni lova a zar zo pha chin leh amah fakdertu (sycophants) hmanga mahni intihlar leh intihitawma nihna neih zel dan kawng zawnna a ni a, politics-a thil duhawm lo leh hlauhawm tak a niin, hetiang thilah hian ka fimkhur hle a tul a ni.

Democracy kalphung dik tak, mipui lalna leh pawimawh berna nen phei hi chuan a inmil lo-in a inpersan tlat a ni tih kan hriat fo a tha.

Kan Mizo danah chuan mitthi ruang leh dam lo kan zawn thin a; mi dam tha pangngai chu kan zawn ngai lo a ni lo’m ni kha?

Related Posts :