India-in a khua leh tuite beih nan thlawhna hmang lo

April ni 6-ah khan Chhatisgarh-a Dantewada District-ah Maoist te'n an lambun avangin 62nd CRPF mi leh sa 75 leh Chhattisgarh Police pakhat an thi a nih kha. He chhiatnaah hian mawh inbelin India ram home minister P Chidambaram chuan banna a thehlut nghe nghe. Mahse, prime minister-in a pawmsak lo thung.

Chidambaram hian a tuk April ni 7-ah banna hi a thehlut a, puanzar nghal erawh a ni lo. April ni 9-ah New Delhi-ah CRPF te'n Valour Day an hmannaah thu a sawi a, Dantewada chhiatna chungchang hi sawichhuakin, "Dantewada chhiatnaah hian tuin nge mawh phur tih thu hi kawng hrang hrangin min zawt reng a ni ber mai. Keima mawh liau liau a ni tih hi ka zep reng reng lo," tiin mawh a inbel thu a sawi a, April ni 7-ah banna a thehluh thu a sawichhuak a ni.

CRPF te khan Maoist (Naxalite)-ho kha an beilet lo nia sawi chungchang chu thu dik lo nia sawiin, "Kan intelligence report-ah chuan Naxalite lamah khan mi 8 an thi tih a ni," a ti.

Heti taka Maoist-ho an chet nat avang hian Indian Air Force pawh hman mai a nih rinna a awm a, mahse, indo thlawhna hmanga beihlet tumna a awm rih lo.

Indian Air Force chief Air Chief Marshal PV Naik chuan an ralthuamte chu ramri pawna hmelmate beihna tur tiin a sawi a, "A nihna takah chuan Naxals-ho hi kan khua leh tuite an ni," tiin indo thlawhna hmanga beih a duh loh thu a sawi.

Indian Air Force (IAF) chief air chief marshal PV Naik hian April ni 7-ah thuthar lakhawmtute kawmin, "Kan ralthuamte hi ramri pawna hmelmate beihna tur a ni," (The weapons that we have are meant for the enemy across the border) a ti.

"Chuvang chuan, Naxal buaina ang chi-a Air Force hman hi kei chuan tul ka ti lo,"Therefore, I am not in favour of use of Air Force in situations like the Naxal problem) tiin a chhunzawm a ni.

Air Force chuan van sang atangin, metre 1500-1800 vel atangin an bei dawn tih a sawi a, chutiang atang chuan an tum (target) an fuh chat chat thei lo tih pawh a sawi. An tum an fuh chat chat dawn lo a nih chuan mipuiin an tuar dawn tihna a ni.

Ram chhungah Air Force hman a dik lo tih sawi nawnin Naik-a chuan, "A tlem berah kan intelligence 120% hian anni (Naxals) hi kan hmelma tiin min hrilh ang, mahse, kan ram chhunga Air Force hman hi a dik lo," (it is not fair to use Air Force within our borders) a ti.

"A bul berah chuan Naxals-te hi kan khua leh tuite an ni," (The basic thing is Naxals are our own citizens) tiin Naxalite-te bei tura indo thlawhna hman a nih loh tur thu a sawi.

March ni 5, 1966-a indo thlawhna hmanga Zoram beih a nih khan, Mizoram hi ramri pawn a lo ni tihna? Mizoram-ah chuan metre 1500-1800 vel-a sang atangin an tum (target) an fuh chat chat thei tihna?

Naxalite chu tute nge?
Hel pawl tia hriat lar an ni a, silai leka rammu pawl pakhat, India rama pawl hlauhawm berte zinga mi an ni.

An pawl hming - 'Naxalite' tih hi thingtlang khaw pakhat - Naxalbari khaw hming atanga lak a ni a, West Bengal-a thingtlang khaw te tak te, Naxalbari-a khawtualmite lungawi lohna atanga he pawl hi chhuak a nih vanga Naxalite tia hriat lar zui an ni.

1967-ah khan West Bengal-a party pakhat, Communist Party of India (Marxist), CPI(M) tia hriat larte chu an pawl chhungah an khi a, Charu Majumdar leh Kanu Sanyal te kaihhruainain a lungawi lo lamte chuan tharum an thawh ta hial mai, chu chu he pawl lo indin tanna chu a ni.

May ni 25, 1967 kha he pawl rawn irhchhuah ni taka ngaih chu a ni. India ramah mihausa tlem tein ram zau tak tak an nei thin; chutiang mihausate chu landlord/feudal lord ti tea koh an ni a, an hnuaiah mirethei, ram nei ve lote an inhlawh thin. He'ng miretheite dinhmun hi a chhe hle a, landlord-te chuan sal chhawrin an chhawr a ni ber. Chutianga mirethei tam takin ram an neih loh laia a thei fal te'n hman sen loh ram an nei duai duai thin chu an paidam thei lo a, Naxalbari khawmite tih ngaihna hre lo chuan Majumdar-a hovin May ni 25, 1967-ah hian tharum hmangin hma an la ta rup mai a ni.

He khuaa tribal miretheite chu court-in dan hmangin ram a pe ve a, mahse, milianhoin an ngaithei bau lo thung. Chu'ng miretheite ram chu chhuhsak tumin an bei a, miretheite'n lo beiletin, tharum thawhna a thleng ta a ni. Mahse, thla hnih emaw lek chhungin police te'n he buaina hi an thelhdai hlauh.

Naxalbari khaw buaina chu lang thei lamah chuan a dai tawh a, chhungril lamah erawh a intan dawn chauh. Naxalbari thingtlangmite chet dan leh ngaihdan chuan vahchap kang ang duai duaia chakin hmun hrang hrang a fang zui a, rei lo teah West Bengal mai ni lo, India ram hmun hrang hrang a dap chhuak ta mai. 1970 velah chuan chhim lamah Andra Pradesh leh Kerala te a thleng tawh a, chhak lamah Bihar, hmar lamah UP leh Punjab te a thleng der tawh.

Andra Pradesh-a khaw pakhat, Srikakulam hi an hlawhtlin hmasakna hmun a ni. Ram neitu mihausate hnehin miretheite chuan an duh danin ram an enkawl ve a, a hnu lawkah Bihar leh UP velah pawh miretheite kutah ram neitu nihna a lut ve ta nual bawk. Miretheite chuan tun hmaa an ram ni thin, mihausate'n eng tin tin emawa an neihsak te chu an neilet leh a, an thlaitharte mahni in ngeia an han phur haw ve chu an hlim hle.

Majumdar-a hi China ram hruaitu Mao Zedong-a ngaisang rumruttu a ni a, sorkar leh mithiltitheite paihthlak tulti burmi a ni. Mao Zedong chu kan hre awm e; China ram hruaitu lar a ni a, a hming dik tak chu Mao Tse-tung a ni. Saphoin Mao Zedong tiin an ziak a, Aizawl hi Aijal an ti tlat ang deuh kha a ni awm e.

Mao Zedong hian intluktlanna chu thupuiah a neih a, thingtlangmite ngaihthah an nihzia hriain, an tan a bei thin. A thurinte chu China rama an communisim innghahna pawimawh ber ber a ni hlawm. Khawvel hmun hrang hrangah ngaihsan a hlawh hle a, a thih hnuah phei chuan a hnuzuitute chuan Maoist an inti ta hial. Independence sual ni lo, ram inrelbawlnaa lungawi lo mirethei ralthuam lekte hi Maoist an ni duh hle.

Mao Zedong-a thih hnuah hian a thurin tidanglam si lovin thurin dang nen a hnungzuitute chuan an her hret hret a, Marxism-Leninism hi a lo chhuak ta a ni. CPI (M) atanga irhchhuak Naxalite pawh hi kum hnih hnuah chuan Communist Party of India (Marxist-Leninist)-ah an chhuak zui ve nghe nghe.

An thil tum chu loneitu leh thingtlang miretheite dinhmun siamthat a ni. Karl Marx-a leh Lennin-a zirtirna zuitu an ni bawk a, a tul a nih chuan tharum thawh chu thiangah ngaiin, tharum hmanga thuneihna semzai chu an tum a ni. Mihnuaihnung ber berte tan dingah an inchhal a, anmahni pawh mihnuaihnung tak tak - Adivasi, Dalit, mi hnuaia hrehawm taka inhlawhfa thin, tribal leh mirethei ber berte an ni.

1960s leh 1970s vel kha an vanglai a ni awm e. Chu'ng lai chuan college leh IIT te thlengin an (Maoist/Naxalite) awm a ni ber. Zirna in tha leh hmingthangte chu an zirtirna zuitu leh anmahni tantute thuneihna hmun a ni deuh zel. Tunah chuan chutiang an ni tawh lo.

India sorkar chuan an hlauhawm tih hriain he pawl hi theihtawpin hmehmih a tum reng a, 1972-ah khan engemaw chen chu a tudai nghe nghe. Hemi kumah hian an hotupa Mazumdar-a pawh police te'n an man a, July ni 16, 1972-ah khan West Bengal Police te kutah a thi a ni. India sorkar chuan hma a la zui zel a, 1973-ah chuan India ram jail hrang hrangah Naxalite-mi 32,000 an tang hial.

Mahse, an la chak hle a, an la hlauhawm hle bawk. State 15-a district 170 velah an inzarpharh nia hriat a ni. Times of India, May ni 10, 2005-a chhuak chuan "Naxalism: biggest threat to India" a ti kuau mai. India ram prime minister Manmohan Singh-a pawh hian 'ram chhung tiralti bertute' tiin a sawi. Naxalism hi India tana thil hlauhawm berah ngaih a ni chawk reng a ni. Jharkhand, Chhattisgarh, Madhya Pradesh, Maharashtra khawchhak lam, Andhra Pradesh hmarthlang lam, Orissa khawthlang lam leh West Bengal vel chu an chetna leh an hranna deuh te a ni a, hmun kilkhawr leh hrehawm, hmasawnnain a thlen ve lohna hmun nia ngaihah an tal tlangpui. Pawl hming hrang hrang an nei a, Naxalite tih leh People's War Group tih te chu koh dan tlanglawn an ni, Mao Zedong-a thurin pawmtu an nih avangin 'Maoist' tih an ni bawk. Suamhmang hmingthang Verapaan-a leh a hote pawh kha he pawlah hian chhiar an ni.

Mizo sipaite pawh an lo rammut tawhna, Chhattisgarh state hi November ni 1, 2000-a piang a ni a, Naxalite-ho hran berna state pakhat a ni. State sorkar chuan Naxalite-ho hmetmit tur hian hma a la reng a, mahse, police leh sipaite rawng taka an chet chang a awm avang leh hmun thenkhatah sorkarin industry a din luih thin avangin Naxal-hoin tan an hlawh phah a, beih an harsat phah thin niin media thenkhatah chuan hmuh tur a awm. Union home ministry chhut dan chuan, tun ang renga an kal a nih chuan 2010-ah chuan Naxalite-ho hian Chhattisgarh ram zaa 60 vel an awp thei ang tih a ni a, he state ram zaa 60 an awp ta em tih chu hriat ni chiah lo mahse, CRPF mi leh sa 75 leh Chhatisgard Police pakhat an thah avangin India ram chuan titi berah a neih ta chu a nih hi.

He state-a thingtlangmi, tribal-te hi an rethei hle a, hmasawnnain a thleng pha lo chiang hle. Sikul, damdawi in leh kawngpui takngial pawh an nei lo a, hnathawh tur an nei lo hle bawk. Chutih laiin an innghahna pakhat, forest leh mining (leilung hausakna haichhuah) lamah dan khirh tak tak a piang zut reng a, human rights activist-te chuan he'ng vang hian tribal-te'n an rights an chang thin niin an sawi. Chutianga thinrim tribal lungmawlte chuan Naxalite-te hi an zawm thin nia ngaih a ni.

Hetih lai hian Naxalite chetna state hotute chuan an thenawm state an puh deuh zel thung. Chhattisgarh Police hotute ngei pawh hian an state-a Naxalite-ho hran chhanah Andhra Pradesh an puh. Chutih laiin Jharkand Police hotute chuan Bihar leh West Bengal te an puh thung. Hetianga bureaucrat-ho an inpuh tawn lai hian political level-ah pawh a chhan leh vang hi a thuk hle nia ngaih a ni; entirnan, Chhattisgarh chu BJP rorelna a ni a, an thenawm - Andhra Pradesh, Orissa leh Jharkhand te chu Congress, Biju Janata Dal leh UPA te sorkarna hmun a ni thung. He'ng party hrang hrangte hian thumum an nei thei lo a, an tangho thei lo tih chu chanchinbumite leh politics chikmite ngaihdan a ni.



Memory Lane

"Zanin chu ka lunglen min hnem turin
Ram chhung leh pawn telephone bute ka han thlir a..."
- Zorock

Mi ramah zawng, lunglen a na a ni ang e, Naxalite-ho beia rammu Mizo tlangvalte paw'n telephone an chuh chung mai!

Kum 100 dawn liam tawhah khan German ral lian tawn turin Mizo tlangval engemaw zat kan lo thlahliam tawh a, Mizote'n a huhova khawvel ram dang kan tlawh hmasak tum, khawvel kan daidar tanna pawimawh a ni a, vawiin thlengin kan sawi bang lo. Khami tum khan Naga tlangvalte pawh German do tur hian Feren-ah an kal ve a, anni chuan kha hun kha Naga Nationalism intanna niin an hre nghe nghe. Engpawhnise, Feren ram kal Mizote tlangvalte chu an lungleng a, London khawpui ai pawhin an sumhmuna arbawm chhe let reng pawh an thlahlel zawk a nih kha! Naga tlangvalte pawh chutiang tho chu an ni.

Nikumah Naxalite ral lian tawn turin Mizo tlangval 700 chuang kan thlah leh a, anni chungchang pawh hi kan tuipui hle. An zinga thenkhat ban (tlanbo?) thu ringawt pawhin a hun lai chuan chanchinbu a luah hneh a nih kha. Chutah, kum khat chuang a liam awrh tihah bomb chilpuakin mi 10 an han thi leh ta nghal a!

November ni 29 a ni a, Mizoram IR sipai 10-te chu lungmuang takin Konta-ah an bazar a nih kha. An bazar zo, an awmna Banda panin an let. Eng nge an tawn dawn reng an hre lo. A ri dur mai, bomb puak ri a ni! Jeep-a chuang IR sipai 10 leh khawtualmi - driver leh a handyman te an thi vek.

Vanduaina tawk sipaite hi Rosangliana (Zorock) ang mai an ni, "Mi ramah chuan, lunglen a na e..."

Const. Vanlalhruaia chu Naxalite bei turin Chhattisgarh-ah a thawkchhuak a, a nupui fanaute chuan an ngai thei hle. A kal dawn pawhin a nupui C Vanlalhriati chuan kal lo mai turin a duh a, mahse, duhthlan theih a ni si lo.

Ani pawhin a nupui hi a ngai hle; ni khatah vawi thum te a phone thin. December ni 13-ah a chhuti dawn a, chu hun chu nghakhlel takin chhungkuain an thlir mek. Mahse, bomb vanga thi zingah a tel ta si!

Hruaia hian khami ni khan an nu hi vawi 6 a phone a, an inbiak hnuhnun ber chu chhun dar 1 vel a ni. Konta bazar atangin a phone a, a chhuti huna a thil hawnsak tur te pawh a hrilh nghe nghe. Bazar-ah khan a lei fel tawh.

Havildar Ralliantawna pawhin bazar atang khan a nupui a phone; chhun dar 1 vel a ni a, an bazar zo tawh, Banda lama an let hmain a nupui hi a phone a nih kha. A nupui Lalvangi chuan khatih lai khan an pa aw a hriat hnuhnun ber a ni dawn tih a hre lo.

Lalduhawma (IV Grade) pawhin khami ni khan an nu a phone. Bazar-a an kal hma, zing dar 9 leh dar 10 inkar velah khan Duhawma hian a nupui Zonunmawii a phone a, "Bazar atangin emaw, camp thlen hunah emaw kan rawn phone leh ang che," a ti lawm lawm a nih kha.

Const. Laltlanzova pawhin a nupui Lalruatsangi chu bazar atangin a phone a, bazar atanga phone tih takah, a bengchheng lutuk a, an inbe hlei thei lo. Tlanzova chuan Banda an thlen huna biak leh a tiam a, mahse, Ruatsangi hian a nghak chhuak zo dawn ta lo a nih hi.

Tlanzova hian a nupui hi a thianpa Zaihmingthanga pawh a biaktir ve nghe nghe. "A tel lova awm hi ka huphurh... a thianpa Zaihmingthanga pawhin min rawn be ve luam," tiin a pasal nena an hun hnuhnung chanchin a sawi a ni.

Amah Const. Zaihmingthanga pawh hian khami ni khan a chhungte a phone. A chhungte chuan, "Zantin deuhthaw kan inbe thin," an ti.

Const. TK Gina pawhin khami ni khan a nupui a phone a, bazar atanga biain, a thil hawnsak tur te a hrilh a ni.

Const. Biakrolala erawh tlangval a ni a, biak tur nupui a nei ve lo. Mahse, a chhungte a be thin. Bazar an kal hma lawk pawh khan a chhungte hi a bia a, hlim takin an inthlah a ni. Chhungte ngaihsakmi a ni a, a u fate thlengin a rem phawt chuan a phone thin.

Chhattisgarh-a rammu, 2nd IR Bn. mi leh sate chuan dinhmun hlauhawm takah an awm lem lo niin an sawi a, fimkhur erawh a tul an ti thung. "Naxalite-ho chu a changin an hrang a, a changin an hrang lem lo," an ti.

Phai chanchinbu thenkhatah Mizo sipaite chu human rights bawhchhiaah puh an ni a, hemi chungchanga zawhna chu, "Tun hnaiah chuan chutiang a awm lem lo," tiin sipai pakhat chuan a chhang. 'Tun hnaiah ni lo a lo awm tawh thin tihna em ni?' tih zawhbelhna chhangin chu sipai chuan, "Kan thlen hlim te kha chuan thil awmzia kan hre lo a, Mizorama kan tih danin, Mizo mipain nula kan han chhaih anga lo ti tawk te kha kan awm a, mahse, culture leh hnam nun a lo inang lo nasa si a, khang kha an sawi punlun ta thin a ni. Kan han fiam mai mai emaw kan tih te kha an han sawi tak tak chuan pawngsual tumah te min puh ta thin a ni ber," tiin Zozam Weekly a hrilh a ni.n

(Zozam Weekly December 5-11, 2007 issue-a mi chhuah nawn a ni)