Chhungkaw 1,20,000 tan NLUP

Mizorama chhungkaw 2,07,971 zingah chhungkua 1,59,399 te'n NLUP guideline dungzuia tanpuina an hmu thei tura ngaih a ni a, mahse lo ruahman tawh sa angin chhungkaw 1,20,000 buaipui phawt tura ruahman a ni, NLUP Implementing Board vice chairman PL Thanga sawi danin.

April ni 8-ah khan NLUP Implementing Board vice chairman hian NLUP kalpui tum a nih dan leh an sem tlai chhan te sawiin thuthar thehdarhtute a kawm a, NLUP pawisa turah Planning Commission-in Centrally Sponsored Scheme kal meka pawisa awm belhchhah a duh avangin ruahmanna thar siam a duh niin a sawi a, helaiah hian an innek rei deuh avang leh pawisa petu tur central norms zawm ve a ngaih avangin NLUP a khawtlai phah ta niin a sawi.

"Central scheme hnuaia model scheme kal mek chu a bikin hmarchhak state te'n kan hmang dik lo deuh vek a, Mizoram chu a hmang tha ber kan ni zawk a ni," a ti.

He'ng scheme hnuaia tanpuina pawisa an sem leh a ram huam chin tura bituk chu a intu lo hle a, sum an pek te hi a rawn thleng a, ram leilung thar theih zaa 10 vel chauh a thar a, hei vang hian scheme tihdanglam ngai 60 chuang a awm tiin a sawi.

NLUP hnuaia dahluh tel tum a nih hlawm avangin he'ng scheme-te hi central project, central pawisa-a tih tur, state duh dana tih danglam ngai, central pawmpui theih tura siamthar ngai te niin, hei hian hun leh remruat thiamna a mamawh avangin 'convergence' leh 'model scheme' siamthar nan hun rei tak buaipui a ngai ta niin a sawi bawk.

Tuna central scheme awm mek pawisa an rawn pek atanga NLUP-a sum hman turah NREGA a\angin 52%, Technology Mission leh Medicinal Plant Mission-ah 17%, Bamboo Mission-ah 26%, Watershed Development Project-ah 55% leh a dangte 18% a ni.

April ni 6, 2010-a chief minister hova NLUP Apex Board thukhawm chuan NLUP beihpui thlak dan tur hi a ruahman fel a, khaw 813-ah village level NLUP Committee leh Monitoring Committee bakah, district level committee pawh an din fel a ni.

PL Thanga chuan, NLUP hi sorkarin hlawhtling ngei tura a duh avangin mimal scheme dawn tur bakah infrastructure develop-na tur leh project enkawlna senso tur telin NLUP project hi siamthat leh a ni tiin a sawi a, "Kum 5 chhung atana central sorkar sum mamawh zat chu Rs. 2526.98 crore a ni a, a hmu tur te tha hah man chhiar telin a vaiin Rs. 2907.90 crores a ni," a ti.

Kum 5 chhunga chhungkaw 1,20,000 an thlan lai hian he programme hnuaia trade thenkhat chu cheng nuai khat aia tam dawn theihna te a nih avangin pawisa pawh hi a tam phah ta niin a sawi.

NLUP chu ranvulh leh lo hmunnghet neihna ni satliah mai lovin ei leh bara buai tawh lo tura 'Mizoram thar' siam theih nana ruahmanna fel tak a ni tiin NLUP Implementing Board vice chairman chuan a sawi. Ram ngaw leh lui tui tam zawk neih theih lehna turin ruahmanna fel tak siam a ni, a ti bawk.

Ruahman dan chuan ram leilung hman dan tur hi zaa 60 chu ram ngaw dur siam nan, zaa 15 chu lo leh huan nghet siam nan, zaa 10 chu vantlang reserve atan, zaa 10 dang chak lakna atan, zaa 5 khua leh kalkawng, industry etc. dinna atan te tih a ni.

"NLUP hi hlawhtling taka kalpui theih a nih chuan ram economy kum tina 2.37% - 7% vela thang chho hi kum 7 hnuah chuan 16% thlenga thlang thei tura beisei a ni a. Per capita income Rs. 7088/- vela thang thei tura beisei a ni. NLUP scheme dawngtute sum lakluh hi tuna an dinhmun atanga a let 5-10 vela thang thei tura beisei a ni bawk," PL Thanga chuan a ti.