Chanchin Maksak 69

Mi hre lo ve te!
Lemchan thiam hmingthang Miles Malleson-a kha lehkha chhiar nasaa sawi a ni a, 1920 chhovah phei kha chuan khawvel library hmingthang Bristish Library-ah a tap chawt mai nia sawi a ni.

He library hi Russia rama communist hotu pakhat, khawvela hming dai tawh lo tur Lenin-a pawh khan a tlawh kur dup thin a ni awm e. Vawi khat chu Malleson-a khan chu library-a a awm lai chuan Lenin-a'n chu hmun a ngainat thin thu a hrechhuak thut a, tichuan, chu hmuna kum 30 chuang zet lo thawk tawh putar mai hi Lenin-a chanchin han zawh a tum ta a ni.

"Ka pu, he hmuna Lenin-a rawn kal thin lai kha i la hre thei em?"

Chu putar chu a'n inngaihtuah vang vang ; "Lenin-a a? Ngawi teh, tumah hi an hming atang ringawt hi chuan ka hre reng thei hlawm lo."

Chutah Malleson-a chuan 'Lenin' chu politics-a a hming a ni tih hrechhuakin, "Chu'ng lai chuan Lenin-a a la ni lovang... a hming tak chu Ulyanov a ni a... Pu Ulyanov-a i hre ngai em?" a'n ti leh a.

Chu veleh putar chuan, "Aw... Pu Ulyanov-a kha maw, hre teh reng mai. Pa ngainatawm tak, bula awm nuam tak a ni asin. Gentleman dik tak a ni kha pa kha. Eng nge a tih tak i hre mial zawk lo maw?" a lo ti let haw a!



Tlawmna nun
Scientist ropui Albert Einstein-a kha pa inngaitlawm leh mawlmang taka khawsa thin a ni. vawi khat pawh, USA-a khaw pakhatah Kohhran pakhat, Riverside Church hian scientist zinga la dam lai mi pariat lim din an tum a, chutah chuan Einstein-a pawh a tel. Eng nge a ngaihdan an zawh chuan, "Tun atang chuan thilsual ti tawh lo turin ka fimkhur viau ang," ti zawngin a chhang.