'We Are the World'; Hmân leh Tun

¢ BCh-a

Thian thenkhat chuan 'We Are the World' version thar hi ropui an ti viau a, chutih laiin thenkhat chuan a original-a tel lo rap part, guitar part leh Auto-Tune te telh a ni ta hi an ngaithei lo hle thung.

'We Are the World' hi 1985 khan Africa-a tam tuarte chhawmdawlna tura record a ni a, 'USA for Africa' tih a ni nghe nghe, Michael Jackson leh Lionel Richie te phuah, Quincy Jones produce a ni. Tuna a 'remake'-ah hian rap part hi will.i.am phuah a ni a, Wyclef Jean, Rickey Minor leh RedOne te pawh producer-ah an tel ta.

Hla hlui thenkhat hi chu khawih danglam lohva a awm hian a ropui zawk ni te'n ka ngai thin a, chutiang hla ropui bik zingah chuan 'We Are the World' pawh hi ka telh thin. Tuna a version thar ka ngaihthlak hmasak tum chuan ngaihdan ka siam thiam lo, ka mengphawk viau ringawt!

Hmana ka hriat 'We Are the World'-ah kha chuan Bob Dylan-a aw danglam tak khan min hneh viau thin kha a nia, tunah erawh rapper Lil Wayne-a'n a thlak ta a, auto-tune a hmang lehnghal. Tihian ka rilruah thu a lo thleng- "Lil Wayne, Bob Dylan i ni lo chiang," tih tê mai hi.

A 25th anniversary remake hi a 'timing' a fuh a, Grammy Awards sem zawh hlim, Los Angeles-a zaithiam rualte fuankhawm vanglai tak a ni a, chutih rualin January ni 12-a Haiti lirnghing na takin a sawi vanga chhiatna rapthlak tuarte chuan tanpuina an mamawh hle bawk. He hla thara thawh hlawk tak Wyclef Jean, Haitian-American songwriter, singer leh rapper, Fugees atanga kan lo hmelhriat tawh khan English leh Haitian Creole a han chawhpawlh kual a, a aw han ti tial vel chuan a rawn chawrchhuahna Afro-Haitian a tarlang chiang khawp a, mahse a lungkuai ru riau.

A video hrim hrim hi chu a hmuhnawm zawk ka ti. Director Paul Haggis hi 2004-a film lar tak 'Crash' director kha a ni a, tunah chuan studio pawnlam te pawh tihlan a ni ta a, Haiti-a chhiat nasat dan te, chhawmdawl hna thawktute'n mipui hnenah beisei nung an tuh a ni tih hriat theih ngei tura Caribbean ni êng hnuaia mihang naupang hlim taka an nui te chuan rilru a hneh khawp mai.

1985 ang bawk khan chart topper rual an inlan leh a, kum lama upa deuhte pawh an tel ve leh tho, Tonny Bennett leh Carlos Santana te. Santana guitar khawih hi chu a nalh chiang alawm. Mahse hranghluiho aw leh thangtharte aw chu a inang lo khawp mai: Jennifer Hudson, Pink, Barbra Streisand (ani hi chu thangthar han tih rual chu a ni tawh lo, mahse 1985 khan a tel lo), Mary J. Blige, Celine Dion, Toni Braxton, Jennifer Nettles (Sugarland), Nicole Scherzinger (Pussycat Dolls) leh Fergie (BEP) te aw leh 1985-a tel Dionne Warwick, Tina Turner, Diana Ross, Kim Carnes leh Cyndi Lauper te aw hi khaikhin chi chu a ni miah lo. Streisand-i aw dam thlap mai, pui ru riau si dawt chiaha teenypop Miley Cyrus te aw han chawhpawlh vel hi chu fuh lo riauvin ka hria.

Mipa lam line-up ve hi le. Opening verse, Linoel Richie part kha tleirawl kum 15, Justin Bieber-a'n a rawn chang ta tlat. Kenny Rogers pawh Josh Gorban-a'n a thlak a, Adam Levine (Maroon 5) leh Enrique Iglesias ten Stevie Wonder an thlak ta bawk. Chutah Usher pawh Michael Jackson tih dan zir niawm takin a lan ve bawk kha. Tichuan, auto-tuned mi ropui pathum: Lil Wayne chauh a ni bik lo a nia, Akon leh T-Pain te an intlar leh a. Uluk taka ka ngaihthlak hian Justin Bieber-a aw pawh hi computer-assisted a ang deuh chuan ka hria, mahse ka chiang ngam lo! T-Pain kha han thlur deuh bik ila, a zaitha thawkhat, mahse a hla nen khan a in mil chiah lo em aw, te chu ka ti deuh. Midang zai ai khan a 'emotional' lo riau ten ka lo hre ve a!

Michael Jackson pawh thlarau ramah cheng tawh mah se a rawn inlan ve tak kha! Hmana Diana Ross nen an zai dunnaah khan tunah chuan a nau Janet Jackson nen an rawn lang dun. Celine Dion pawh a che tha viau nain a original ngaithla tawh tan chuan Cyndi Lauper a copy a ang thei tlat nia. Dik taka sawi chuan version thar a mi te hian a hmasa a mi te kha an entawn deuh lo thei lo ve bawk a ni!

Kum a liam a, hun a inthlak. 1985-ah chuan rock-in vanglai a chen a, pop leh R&B te chuan themtlengtê zawk chan an la chang, mahse 2010-ah chuan chutiang a ni tawh lo, a inletling thawk. Rock a chuai a, R&B leh hip-hop pawhin vanglai an chen a, 'pop' chan an chang ta. 'We Are the World' hmasa zawkah kha chuan a lungkuai takin Bruce Springteen, Stevie Wonder, Ingram leh Ray Charles ten a tawpna an siam kha a nia, mahse anniversary version-ah chuan rap-in an khar ta tlat.

Kanye West solo atangin Will.i.am kaihhruai rap kan hmu a, rapper rual LL Cool J, Will-I-Am, Snoop Dogg, Busta Rhymes, Swizz Beatz ten: “Someone to help you move the obstacles you stumbled on/Someone to help you rebuild after the rubble’s gone,” an ti dual dual a nih kha. A tir lamah rap kha a inhmeh lo ka ti dawn viau nain, a ropui ka ti ta telh telh! A tawpna kha, Haiti a lo lang a, Haitian carnival tradition tawtawrawt sei pui pui leh khuang a rawn lang a, chutah Wyclef Jean-a'n:
Ayiti, Ayiti, Ay, Ay, Ay, Ay, Ay
Ayiti, Ayiti, Ay, Ay, Ay, Ay, Ay
Ayiti, Ayiti, Ay, Ay, Ay, Ay, Ay
tiin a khar ta a nih kha.

He hla hi an tihchhuah atangin original version nen khaikhin a hlawh nghal hle. T-Pain, Akon leh Lil Wayne te hian auto-tune hi rawn chhawpchhuak kher kher lo se? Heng mi zozai hi enge maw an tel a tulna le? Talent nei tha tak tak te hian a hlui, ropui tawh sa, khawih danglam lo hian, a thar tha zawk an phuah thei mai lo em ni dawn le? A enga pawh chu lo ni se a siam chhan hi a ropui a, he video hian donation tam tak khawn chhuak sela, tih hi ka duhthusam a ni e.
Nou se mond la
nou se timoun yo
(We are the World)
(We are the children)

Hei le 'We Are the World 25 for Haiti' artist te chu:

Conductors: Quincy Jones & Lionel Richie

Verses: Justin Bieber, Nicole Scherzinger, Jennifer Hudson, Jennifer Nettles, Josh Groban, Tony Bennett, Mary J. Blige, Michael Jackson, Janet Jackson, Barbra Streisand, Miley Cyrus, Enrique Iglesias, Jamie Foxx, Wyclef Jean, Adam Levine, Pink, BeBe Winans, Usher, Celine Dion, Janet Jackson, Orianthi, Fergie, Nick Jonas, Toni Braxton, Mary Mary, Isaac Slade, Lil Wayne, Carlos Santana, Akon, T-Pain, LL Cool J, Will.i.am, Snoop Dogg, Busta Rhymes, Swizz Beatz, Iyaz, Kanye West

Chorus: Patti Austin, Bizzy Bone, Ethan Bortnick, Jeff Bridges, Zac Brown, Brandy, Kristian Bush, Natalie Cole, Harry Connick Jr., Hayden Panettiere, Kid Cudi, Faith Evans, Melanie Fiona, Sean Garrett, Tyrese Gibson, Anthony Hamilton, Keri Hilson, Julianne Hough, India.Arie, Randy Jackson, Taj Jackson, Taryll Jackson, TJ Jackson, Al Jardine, Jimmy Jean-Louis, Ralph Johnson, Joe Jonas, Jordin Sparks, Kevin Jonas, Gladys Knight, Benji Madden, Harlow Madden, Joel Madden, Katharine McPhee, Jason Mraz, Mýa, Freda Payne, A. R. Rahman, Nicole Richie, Raphael Saadiq, Trey Songz, Musiq Soulchild, Robin Thicke, Alex Williams, Rob Thomas, Vince Vaughn, Verdine White, Ann Wilson, Brian Wilson, Nancy Wilson, Nipsey Hussle, Fonzworth Bentley.