State Ralmuang, Hmasawnna Muang

¢ Lalthlamuana Ralte

Chapchar Kut pualin lemziak thiamte kutchhuak leh thlalak chi hrang hrang pholannan Art Festival huaihawt a ni a, Vanapa hall luhka hnuai leh a chunga mipui hmuh tura lemziak mawi tak tak leh man to ang reng fe fe an tarte chuan mit a titlai hle. Lemziakte hi a ziaktu rilru chhungril tarlanna a nih avangin hmanhmawh taka en liam puat puat chi a ni lo tih hre mah ila kan kal lawr dun dun a, mitla zual bik erawh dinchilhin kan thlek vang vang thin.

Chutia kan thlir kual lai chuan Directorate of Information & Public Relation lam thlalak hlui, fiah ang reng takte chuan ka ngaihtuahna a hruai thut mai. Chu'ng thlalakte chu a tarna tur bika siamah felfai takin an bel a, thlalak inkarah chuan MIZORAM 1974 tih ziak fiah taka hmuh tur a awm bawk. Thlalakte chu black & white vek a ni a, ka mit la ber leh ngaihtuahna tithui ber chu thlalak pathumte chu an ni. A hmasa berah chuan pa pakhat, thirdeng ni ngei tur hian thir a chher a, a bulah pakhatin pumin mei a lo chhem a, an kiangah chuan luahlum tih hriat ngawih ngawih di in hlui lam hi a ding bawk.

Chumi sirah chuan nu pahnih, feh tur ni awm tak, tawlailira chuang thlalak a intar a. Pakhat zawkin a khalh a, a nui var var nghe nghe. Em ruak pahnih an phurh avangin an feh kal lam a nih ka'n ring ringawt a, kawng kama di in pathum thla a lang bawk.

Chu'ng thlalak pahnih hnuaiah chuan nuho feh haw lam thla, hnung zawnga lak a awm leh a. An dawrawn leh paiem phurh bawr tak atang chuan hah-thi-kula nilenga hna an thawk chung pawhin an haw kawng chhukchho pawh ngaihtuah thei loin thahnem an ngai niin a lang. Nuho lo sul haw thlalak phenah chuan loneitute thawhrimzia a hmuh theihin ka hria. Bianga thlantui luang zawih zawiha ni sensa hnuaia rim taka hna an thawh hnuah niin a daih si lo a, khua a tlai hmaa in thlen hman tumin motor kawngpui dungah hmahmawh takin ritphur chungin an inzui diah diah a...

Thlalak : Aizawl 1974 (A chung), Aizawl 2010 (A hnuai)


Heng thlalakte hi kum 35 liam taa mi kha a ni hlawm, a rei tawh viau mai a, thlalak hlui anga ngaih a ni hial tawh. Mahse, ka ngaihtuah neuh neuh a, chu'ng thlalak hrang hrangah chuan thil hlui hmuh tur a awmin ka hre lo tlat mai. A thlalak hrim hrim chu a hlui tawh a, rambuai laia mi daih tawh kha a ni a, colour pawh a ni lo, thlalak hlui eng tin tin emawa an siamthat leh a nih te ka ring. Han en mai chuan a hmanlai deuh tawh te pawh a ni mai thei, khawpui lun laia chengte tan phei chuan thlalak hlui hmuhnawm lem lo tak pawh a ni ngei ang.

Mahse, 1974-a kuthnathawktute nunphung leh kum sangbi thara kuthnathawkte nunphung a la danglam thui lo hle tih heng thlalakah hian a hmu theih. An hmanrua- tuthlawh, hreipui, chem, favah a la ngai reng a, hmeichhe feh kalin em an la phur a, mipain iptepui an la ak reng. Kawla ni chhuak chhiarin, a sur a sa hnuaiah, vangvat leh thosi, tho-mitchhaih karah rim takin hna an la thawk reng. Kum tluanin awl lai nei mang loin hna an thawk a, thuneitute'n lo neih dan tha zawk, hlawk zawk leh hahdam zawk sawi thin mah se chu'ngte chu an hmuh phak loh thil a ni a, an ban phakah a awm hek lo.

India ram bung pakhat ni-a union territory kan nih tirh atanga vawiin thleng hian kan ram rorelna fawng vuantute an inthlak nual tawh a, political party hrang hrangte pawhin thawm ring tak tak an chhuah thin. Loneitu lungmawl te tete hipna atan hian rawtna tha deuh deuh an siam a, tawktarh itawm pui pui an tlangaupui thin. An penglengpung thawmah hian hahchawlhna zawnga van ruai ruai loneitute'n beng an chhi a, hlawk lo taka an thawhrimna hreng ata tlanchhuah thuai duhin lungsi takin, beiseina sang tak nen roreltu an thlang thin. Mahse, kum tam tak liam hnuah pawh loneih dan phung thlak danglam a la ni lo a, loneitute tan dinchhuah ngaihna a la awm ta chuang lo a nih hi.

He hnam hian Pathian a au fo thin a, ram hruaitu inthlan dawnah phei chuan ngenngawl takin roreltu tha kan dil thin. Chutiang hunah chuan ram hruaitu nih tuma beitute pawhin Pathian hming an lam zing malh malh hle a, tlawmna nun nen mipui khawngaihthla la tur berin tan an la a, ram tana inhuam thui em em angin an insawi a, kuthnathawktu rethei tak takte'n lei rem an rah theihna tura ruahmanna an neih thatzia te awihawm takin an sawi chamchi thin.

Mahse, lalthutthleng an han luah tak hnuah chuan a hmaa an thusawi zozaite kha an hre reng tawh lo a, khawpui laili atangin Mizoram an thlir a, an in chhung lum atangin ngaihtuahna an seng a, an pisa nuam tak atangin budget (mipui sum) an chalai kual vel a. Chutih hunah chuan thingtlang loneitute chu hla takah, hmuh phak lohah an lo awm tawh thin a, loneitute tan hnaih ngam rual lohin an ropui a, inthlan dawn lai vela an thusawi zozaite chu boruakah a thamral zui ta thin a ni. Chutiang vel chu kan ram min hruai dan a nih avangin UT nih tirh atanga vawiin thleng hian vawi sawm tam Mizoram budget pharh ni tawh mah se thingtlang loneitute leh kuthnathawk berh tak takte tan dinchhuah ngaihna a la awm lo a nih hi.

Kum tin khawpui hrang hrangah Chapchar Kut ropui takin kan lawm thin a, sorkarin sum tam tak a seng thin. He kut ropui tak avang hian hnam rohlu kan humhim phah a, hnam lam leh hnam incheina mawi tak takte pholanna remchang a ni bawk a, chin zui zel tlak a ni. Lehlam zawnga thlir chuan Chapchar Kut hi Mizo hnam pum huapa kutpui ni mah se a nihna takah chuan loneitute pual a ni bik zual. Kum tluana hah taka hna rum an thawh tur ngaihtuah chang lova an lo vah sa phoro paha hlim taka an hman thin a ni. Chutiang chu ni mah se tunlai hunah chuan a neitu bera ngaih tur loneitute tan Chapchar Kutin awmzia a nei hran lo khawp mai.

Loneitute dinhmun chhe zual zel hi anmahni thiam loh a ni lo, theih ni se an retheihna bawih atanga talchhuaha hahdam taka khawvel hman an chak lutuk. An thawkrim em em chung pawha an ei khawp ngawr ngawr an thar chauh a nih chuan eizawnna hniam ber tia sawi loh theih a ni lo. Nawmsakna turin hna an thawk lo a, chutiang ngaihtuah thei pawh an ni lo, an zinga tam tak chuan an fairel bel a ruah lohna tur chauh an ngaihtuah ang. Chu chu an dinhmun dik tak a ni. Ram kalphung felfai tak hnuaiah chuan taimak hian awmzia a nei a, Bible pawhin 'thawhrimna zawng zawngah hlawkna a awm' ti mah se kan ram loneitute zingah erawh 'taima, rethei si' te, 'thawkrim, pachhe si' tam tak an awm. Hengho hian hman atangin beiseina sang tak nen Zoram khawvar hun an lo thlir tawh a, an la thlir mek bawk. Dawt thu an dawn fo avang leh mi pamhamte vanga beiseina puarpawleng an neih fo avang hian an zinga thenkhat chu an ngawt tawt tan tawh a. A hun hmain engemaw tak hi a puakchhuak thut mai ang tih pawh a hlauhawm thei hial awm e.

Thlalak : Aizawl 1974 (A chung), Aizawl 2010 (A hnuai)


1974 chu sawi loh tuan leh mang ata tawh kan ram loneih dan phung hi a la pangngai reng. Pi pute atang tawhin chempui leh hreipui rawih kan la bang thei lo a nih hi. An dinhmun siamthatna atan ram hruaitute'n cheng tluklehdingawn chuang fe an hmang ral tawh a, an hminga pawisa tam tak lo luanglutte chuan an dinhmun a chawikang zo lo a ni lo a, a nihna takah chuan chu'ng sum zozaite chuan a thlenna tur dik tak a thleng lo a, a hmanna tur dik takah hman a ni lo bawk a. Chuvang chuan a ni vawiin thlenga dinhmun chhe taka loneitute an la awm ni.

Thal lai a lo ni a, ram a ro a, lo hal a lo hun a. Chutih hunah chuan Mizoram hmun tam takah ram a kang duai duai thin. Kuminah pawh a dang chuang lo a nih hi. Thu thin thawng tak lo ri fo mai chu lo halnaa chesual leh kanghlum an awm leh thin hi a ni. An kum tluan eizawnna bul an tan dawn chauh a, an eizawnna hmun turah chuan vanduaina rapthlak tak an tawk leh thin hi a pawi tak zet a ni.

Kan rama dinhmun inthlau ber pakhat chu loneitu chi hnihte dinhmun hi a ni awm e. Pakhat zawkte hi khawpuia cheng an ni a, khawpui kiang hnaiah ram rem tha takah huan zau tak an nei a, chhungkaw naran in aia tha tur mah thlam an nei a. An thlamah chuan chhungkaw mamawh tinreng a awm bakah a kawtkai thlengin motor pawh a lut thei a, a hmunah chuan an lo enkawltu pawh an nei tlangpui bawk. Hengho hi ram hruaitu te, politician te, sorkar hnathawk te leh mi awmthei tak takte an ni. An tan chuan kuthnathawh hi nawmchenna a ni a, an intunnunna phena an tih ve mai mai a ni. Nuamsa takin an feh a, hlimhlawp bawl pahin lo an kan mai mai thin. Titi nikhuain loneih nawmzia an sawi fo na a, a tak takah chuan a hrehawmzia an pawh phak loh vang a ni zawk.

Chutihlaiin, eizawnna dang zuan tur hmu lo, thil dang thlang thei dinhmunah pawh ding lo, thingtlanga chengte erawh chuan anmahni kutkawih ngeiin chu eizawnna chu an bei a, taima lo thei lo dinhmunah an din miau avangin hah an sawi thei lo. An feh kawng chhukchho tak takah te chuan rit phur chungin hniakchiar dupin ni tin an kal thin. An tan chuan intihhlimna hmun a ni ve lo a, nawmchenna lam a lang lo hrim hrim, nghei loh an duh avangin tha thlah hman lek loin kum tluanin an thawk bawrh bawrh zawk a ni.

Hman atangin ram hruaitute'n hmasawn min tiam thin a, ruahmanna mak leh ropui tak tak an sawi vul chuk thin. Loneitute rilru an chawk tho a, thalai beidawng tawhte an fuih thar thin a, eizawnna tha hmu zo lo lehkhathiamte meuh pawhin beiseina an nei thar leh thin. Mahse, hun a kal zel a, thutiam hlawhtlinna hmel hmuh tur a awm lo leh thin a, chhuanlam chi hrang hrang siamin mahni an inthiam chawp a, an rinawm lohnaah hian hrehawm tihna reng reng an nei lo emaw tih mai tur a ni leh thin. A pawi khawp mai

Heng bakah hian Art Exhibition-a thlalak hlui an tar hian thil tam tak min ngaihtuahtir a, dem tur min zawntir a, khawngaih tur min kawhhmuh a, chu'ng zinga ka ngaihtuahna luahtu ber chu kum 35 chhunga khawpui nun nasa taka a inthlak laia loneitute leh kuthnathawkte dinhmun a inthlak danglam ve lohzia chu a ni. Chumia mawhphurtute min chhui kual tir nasa hle a, khawpui chhungah ngei pawh a hulum laia chengte leh a chuanhnuai lam leh a pawn lam hnaiha chengte dinhmun inthlauhzia te chu ka ngaihtuah kai zel bawk. Aizawlah hian lo nei thin chhungkua engemaw zat an awm a, kuthnathawha eizawng phei chu tam tak an awm. Chu'ngho dinhmun pawh chu thingtlang lama mite nen a danglam vak chuang lo, an hnathawhna hmanrua a inang a, an chhungkaw dinhmun pawh a inang tlangpui bawk.

Hmasawnna hming hi kan sawi fo thin a, ram hruaitute tan phei chuan sawi a nuam a, an lam ri zing malh malh hle. Mahse, kan hriat thelh fo thin chu hmasawnna awmzia tak tak hi a ni. Hmun langsar laia in ropui tak ding luah mai te, khawpuia chengte khawsakphung changkang lutuk mai te, khawl leh hmanraw tha tak tak hmuh tur awm ta te hi hmasawnna tak tak tehfung atan kan hmang thin a nih chuan kan tisual hle ang. Hmasawnna tak tak chuan mi tin a huap tur a ni a, a bikin eizawnna lama hmasawnna a kawk tur a nih bakah mipui nawlpui dinhmun a chawikang tur a ni. Chu chuan reitheihna a tinep ang a, mipui nun hlimna a thlen ang. Chutiang chu a lo thlen beiseiin mipuiin roreltute kan thlang thin a, mahse kum tam tak liam hnuah pawh engmah kan la ang thei lo a nih hi.

Related Posts :