Media-in tan lam a nei tur a ni lo

"Media-te hi sorkar khalh ngiltu leh mipuite hriat tura sorkar hmalaknate puangdarhtu in nih avangin in thuchhuahte chu a lai tha em tih te bih ngun a ngai hle," tiin information & public relations minister Zodintluanga chuan thuthar lakhawmtute a fuih.

March ni 23-ah Mizoram Journalists Association chuan I&PR Auditorium-ah General Conference vawi 37-na an hmang a, he hunah khuallian, minister Zodintluanga chuan thuthar lakhawmtute chu lai taka thil thlir tur leh theihtawp chhuaha hna thawk turin a fuih a ni.

"Khawvel thang chho zelah media pawimawhna leh mawhphurhna a zual zel a, Mizo hnam tlemte, ziak leh chhiar thiam tamna ramah phei chuan chanchinbute hian pawimawhna leh tangkaina an nei thuk êm êm a ni. Print leh visual media-te hi khawvel tukverha min dahchhuah tirtu a ni," minister chuan a ti.

"Communication technology a lo thang a, keini ram kilkhawr atang pawhin khawvel hmun hrang hranga thil thleng chi hrang hrangte kan hmuin kan chhiar zung zung thei tawh a ni. Chutiang chu kan tunlai media nihphung a nih tawh avangin thil tangkai tak a ni a, hmangsual duh tan erawh chuan hmanraw hlauhawm tak a tling a ni," a ti bawk.

"Tute emaw tihhmingchhiat duh hrim hrim avangin thu belhchian dâwl tawk lo te pawh chhuah theih a ni. A nih loh vek pawhin tute emaw lak atanga engemaw beisei neih vangin hman khawloh theih a ni bawk," tiin thuthar lakhawmtute chu tan lam nei lova lai taka thil thlir turin a fuih.

"Chutiang thil chi hrang hrang lak atang chuan media-te kan inthiarfihlim a pawimawh hle mai. Media te hi thudik chhuahtu in nih avangin in tan mar pât reng a ngai a, tha thlah a thiang ve lo a ni," tiin a sawi zawm.

"Khawtlang nun siamthatnan chanchin thar thehdarhtute hi ban pawimawh tak an ni tih kan hai awm lo e," tiin media pawimawhna a sawi a, "Thil tha tak pawh hi mipui vantlang hriat tura puanzar a nih loh chuan a thamral ve leh mai thin. Amaherawhchu, media atanga phurpuina a awm erawh chuan nasa takin hna a thawk thei a ni," a ti.

"Silchar-ah misual tute emaw awm that duh loh vangin emaw khawchhak lam atanga lo tlathla tute emaw suahsualna avangin mipui thinrim sosang kan che ta mai thin te hi a pawi hle. Hetiang hunah te hian media pawimawhna a lo lang thin. Buaina tipunlun lo zawng leh mipui thinrimna tikiang zawnga thu kan chhuah a pawimawh thinin ka hria. Mizoram hi state puitling kan ni a, sorkar a awm a, mahni duh dan ang anga tal mai lo leh sorkar zai ngaia mipuite pawh awm tura zirtir hi a pawimawh hle a ni," a ti bawk.

MJA president K Sapdanga pawhin thu sawiin, thuthar lakhawmtute chu tan bik neia thu chhuah lo turin a fuih.

"Media chu media a ni," tia sawiin, "Tlawmngaihnain emaw sakhuain emaw a dipdal a rem lo," a ti.

"Media-in hnam leh sakhua a do a ni lo a, media chu a laiah a ding a, thlek lam neih a rem lo. Hei hi kan hriat fuh loh chuan media meichher hi tui fim takah kan chiah hlum mai ang," a ti bawk.

Mizoram chanchinbumite chungchang sawiin MJA president chuan, "Mizorama chanchinbumite hian hmuhsit kan hlawh thinna chi hnih langsar tak tak a awm tih kan sawi thin," a ti a, chu chu ruihtheih thil leh journalist nihna hman dik loh tiin a sawi.

"Ruihtheih thil laka fihlim hi inphut chi a ni lo a, mahse ruihtheih thil tih vanga mualpho emaw, midangte tan hnawksak siam emaw, mi hmuhsit tur zawnga khawsak emaw chu pumpelh nachang hre tura vantlang beisei kan ni tih hi hre thar leh turin ka inchah nawn duh a ni," tiin mite'n chanchinbumite an hmuhsit phahna kawng khat a sawi.

"Hmuhsit kan hlawh thinna pakhat zawk, kan nihna hman dik loh ching kan awm thin hi thil serious tak a ni," a ti bawk.

"Mizoram chhungah leh pawn lamah pawh journalist inchhal ve ngat zingah pu chuam nei tlatte an awm thin. Pu chuamte laka hamthatna eng emaw beisei vang leh hmaizah vangin news reporting thlengin pawt sawi bawih bawih duhte pawh kan awm fo thin," tiin hemi chungchang hi a sawi.

"Journalist thenkhat ve thung chuan investigation ti vea inchhalin, a victim-te hnenah investigative report an zuar a, mi blackmail-na atana hman an ching bawk thin. Journalist rintlak kan nih chuan kan thlen chin apiangah mi an fimkhur thin a, chu zahawmna ber chu contract hna emaw, petrol hapta khat tla emawa kan hralh duh tawh chuan journalist-a inchhal tlak kan ni tawh lo," tiin a sawi zawm a ni.

Chawhma inkhawm chu MJA vice president Lalthanzama'n a kaihruai a, general secretary Zonunsanga Khiangte leh treasurer C Lalzamlova te'n report an pe. I&PR minister hlui, Dr R Lalthangliana, MLA, chu khualzahawm a ni.

Chawhnu lamah kum 2 chhunga MJA general headquarters hruaitu tur an thlang a, president atan H Zosangliana, Evening Post editor thlantlin a ni. Vice president atan Vanlalrema Vantawl, Zalen editor thlantlin a ni a, treasurer atan Zonunsanga Khiangte, Lenlaini editor thlantlin a ni.

He'ng mite hi executive committee member atan thlantlin an ni: Lalremsiama (Morning Post), Lal Rinmawia (Vanglaini), BK Renthlei (LPS), E Lalhleia (National Observer), R Lalhmangaihzuala (Romei/Hnehtu), Lalrinmawia Sailo (Zoram Thlirtu), C Lalhmachhuana (Youth Herald), Lalbiakzama (Entlang), C Lalduhawma (LPS), Sangzuala Hmar (Lunglen) leh C Lalzamlova (Chhawrpial) te.