Kutpui kan ur, khuangruah chiar nghian e

¢ Lalhruaitluanga Chawngte

Chapchar Kut chu hnai tawh viau mah se a kut-a aiin 'Bamboo dance' hmanga world record siam tum thu chuan sawi a hlawh zawk niin a lang.

February thlaah hian Mizote'n ruah kan beisei thin, sur ngei tura ngaih a ni. Thla laihawl hi a sur hun ber a ni a, thla chawhnu lam leh thla tawp lama a sur chang te pawh a awm. "Kutpui kan ur, khuangruah chiar nghian e" tih hla pawh hi Chapchar Kut dawn hnaiha ruah sur sawina niin mi thenkhat chuan an sawi thin reng a ni.

February thlaa ruah sur chu |huangruah kan ti; Kawihthuang par a tihtilh avanga chu hming chu pu ta niin upate'n an sawi. Tiang chuan thal laiin ruah a'n sur a, chumi hnu-ah ni 20 chhung a sur loh leh chuan 'ni hlui' kan ti. Mahse, mite chuan |huangruah sur leh sur loh an buaipuiin a lang lo, 'Bamboo dance' an buaipui zawk a ni mahna.

Mite'n ngaihsak lem lo mah se |huangruah chu a'n sur hlauh mai a, khawchin ngaihvente chu an lawm teh asin.

Hun engemaw chen ruah a sur loh hnu-ah, February ni 25, 2010-ah a rawn baw deuh tlawrh mai. Darkar chanve vel zet chu tih tham ang reng takin a sur a nih kha.

Mahse, chu |huangruah chuan lawm a hlawh teh chiam lo. A then tan phei chuan lungngaihna thlentu a ni hial zawk mawle! Amah a mite hnenah a rawn sur a, amah a mite'n an lo lawm si lo.

February ni 25, 2010 hmaa ruah sur hnuhnun ber ni chu November ni 21, 2009-a sur kha a ni. A chhunzawm har ang reng viau. Ocotber leh November thlaa kan beisei thin- Airuah a sur tawh lo a, khawvel sik leh sa inthlak nasatzia leh khawchin a buai takzia te ngaihtuah chuan, Airuah ang bawkin |huangruah pawh kan nei lo mai ang tih a hlauhawm hman.

Kum hmasa lamah ruah a sur lo rei hle; November ni 6, 2008-a ruah sur kha March ni 27, 2009-ah a chhunzawm leh chauh a nih kha. "Kutpui kan ur Khuangruah chiar nghian e..." tiin Chapchar Kut-ah kan lo chai ve chiam chiam na a, Khuangruah kha a chiar nghian lo chiang teh a nia!

Tun tum ruah sur loh rei zawng erawh, November ni 21 leh a kum leh February ni 25 inkar a ni a, a hma kum ngaihtuah chuan a rei lo.

November ni 6 leh a kum March ni 27 inkar ruah a sur loh bakah 2009-ah khan fur ruahtui a tlem hrim hrim; India Meteorology Department (IMD) te'n an chhut dan chuan, 'monsoon' ruah (fur ruahtui) hi Mizoramah chuan 1,345.10 mm vel a tla thin a, 2009-ah erawh 1,086.6 mm chauh a tla. Ruahtui tlak dan pangngai aiin za zela 19 zetin a tlem a ni. Hei hian loneitute pawh a nghawng hleah ngaih a ni. July thla atangin a sur ta deuh a, mahse, khatia ruah a'n sur khan fur a liam daih tawh! Fur lai aiin fur liam hnu-ah a sur hnem zawk a nih kha!

Chutiang a nih laia February ni 25, 2010-a |huangruah a'n sur hlauh mai kha a lawmawm asin!

|huangruah hian thlasik laia lei ro kha a tinem a, thing leh thlai tan chu chu a tha tih chu Zopa hriat dan a ni. Chuvangin loneitute chuan |huangruah hi a sur lo palh ang tih an hlau thin, khawpui tlangval te'n hna dil nikhuaah sawipuitu an nei lo bik ang tih an hlau thin ang hian.

Chu mai a ni lo, |huangruahin chap a delh hian lei a tha sawt a, loneitu rethei tak takte tan chuan chu chu NLUP thami dawngtu nih-a, 'i rulh theih loh chuan kan hrem ang che' ti chunga tanpuina pawisa dawn ai paw'n a hlu zawk thei hial ang, kum tluana an chhungkaw khawsak harsat leh harsat loh hriltu a ni hial thei.

Chuvangin, a kum hmasaah |huangruah kan lo neih tawh loh avang te, |huangruah chu loneitute chaw petu a nih avang tein khatia February ni 25-a a'n rawn sur hlauh mai kha a lawmawm asin!

Hetia kum khat chhunga ruah hmasa ber a sur hian khawvel a rimtui sawt thin a, chu rim chu 'geosmin' an ti. A anpui rim dang a awm lo ti hialin an sawi thin a, hmakhawsanga ta tawh mi tam tak lung tilengtu a lo ni tawh thin. Hnam hrang hrang hian chu rim chungchangah chuan hla leh thawnthu te pawh an nei fur. Mahse, mihring siam chawp rim hrang hrang a lo tam ta a, inhnawih rimtuina- hriak rimtui lamte hi chu thuhran ni se, khawl rim leh mihring thil tihchhiat rim avang tein khawvel hi a rimchhe nghur ta mai. Chu'ng rim vel teh chai chuan ruah hmasa ber sur zawha khawvel rim, thiang kak mai, Pathian siam ngat lehnghal te pawh a hliah ta. Ui nachang lah kan hre si lo.

Mahse, chutiang pawh kan lo ngaihtuah lem lo, loneitute tana kha ruah hlut dan tur te pawh kan ngaihtuah lo. World record te, jet fighter atanga thil engemawni an thlak khan Aizawl kha kang duai duaiin mipui kha tlanchhe chum chum mah se an thil thlak kha bomb a ni lo tih mai mai te kan lo ngaihtuah daih pek a, |huangruah reng reng kan lo ngaihtuah lo. Khuallian tawiawmtu zawk parthi awhtir ta khut khut te pawh kan ang thei awm e.

Chu'ng chu thil mak erawh a ni lem lo; loneitute dinhmun hian vei a hlawh lo a, an chanchin hi 'knowledge' pawh a tling lo. Mizorama hna lian ber chu loneih a ni a, chuti chunga loneih chungchangin hriat a hlawh lo lutuk hi a mak mai a ni lo, a huatthlala. Eizawnna hrang hrang thawktu zingah loneitu an tam ber lawrlak. Mahse, loneih tawngkam leh loneitute dinhmun erawhin hriat a hlawh lo hle thung. Thawktu an tam dan atanga chhut hi chuan khawpui naupangte pawh hian kangvar awmzia te an hre ngei tur a ni. Mahse, kuthnathawktu rethei tak takte hian, tam eng ang mah se he ramah hian awka (voice) an nei pha tlat lo a, an chanchin te pawh knowledge a tling ve thei lo. 'File kha an rawn put up tawh em?' tih te leh 'ka bill a tang a' tihte erawh, chutiang tawngkam hmanna hmuna eizawngte chu Mizorama mihring zat atanga chhutin tam lo mah se kan hrethiam fur. A awmzia chu- Zoram loneih chungchang hre lo nih hi a zahthlak loh a, sorkar office dawr thiam lo nih erawh thil zahthlak tawp a ni, loneitute leh kuthnathawktute hi rahbeh an ni tihna a ni.

Hetia |huangruah a'n sur te pawh hian loneitute hi awmhmunah hlim takin an lo faifuk hlerh hlerh thin. An pawimawh lo em a, an faifuk ri te hian hriat a hlawh lo thin mai pawh a.

February ni 25, 2010-a |huangruah sur erawh, kum danga an lawmna thlen thintu ni mah se tahna thlentu a ni ta tlat. Sorkarin February thlaa lo hal vek tur tiin thu a pe a, ni 25-ah ruah a sur a nih chuan, chu ruah chuan chap delh eng ang mah se a ro fel hman dawn loh avangin a kang tha lo ang. Chuti a nih chuan buh leh thlai a tha lo sawt dawn tihna a ni a, an hmakhua a thim sawt tihna a ni. Kha |huangruah kha an tan lawmna chi a ni lo.

Lengpui leh a chhehvel khuate phei chu, February ni 25 tlai dar 3 hmaa an lote hal tura thu pek an ni a, chu chu thlawhna thlawkchhuak leh tum tur an tihbuai loh nana tih a ni. Sorkar thupek chu zawm mah se tlai lama ruah surin a tibuai a, an lo pawh a kang mumal ta lo!

Kan chhuan em em, Lengpui Airport chhawrtute hi inchhiar ta ngat ila, Mizorama mihring za zela 10 em pawh an tling kher lo ang. Mahse, chu'ng mihausate chu nuam taka an zin vel theih nan kan mipui sum zawng zawng kan seng ngam emaw tih tur a ni a, chu'ng mihausate zin kawng chu a nuam lo ang tih hlauvin a panna kawngpui pawh rulngan pa ang zanin a hnum hlarh reng mai a nih hi. Aizawl leh Lengpui Airport inkar kawng hi Mizorama kawngpui tha kumtluan awmchhun a ni mai thei. Chuta tana kan sum sen hi eng zat tak ni ang maw? Thlawhnaa chuang pha ve lo, a mi tam zawk fete retheihzia te han ngaihtuah hian, Lengpui Airport kan chhuang viau mai hi a mak ngawt mai! Mak lah kan ti si lo! Amaherawhchu, sawi tawh angin, a chuang pha ve lote hian awka leh thawm an nei pha ve lo a, an hrehawmna paw'n tu khaw kha hriat a hlawh lo. Thlawhna tumhmun te pawh, a'n awm takah chuan a tangkaina sawi tur te chu a awm ve tho e. Sawisel rual a ni hlei nem. Mahse, February ni 25-a thlawhnaa zin veivak mi 100 velte kha loneitu a sang telte aiin an lal zawk a, he ram hian a ngai pawimawh zawk bawk tih erawh ka pi aiin ka pu a sang zawk tih thu-a ka chian tlukin ka chiang.

Chutiang chu a ni a, loneitute chuan lo hal hun atana sorkar hun bi tuk kha tha an ti lo a nih pawhin sawisel nachang an hre lo a, a nachang hria tlem a zawng lahin sawiselna tur hmun leh remchang an nei hek lo. Sorkarin a ti miau a, sorkar thu zawm chu an tih turah ngaiin an ti mai. Lungawi lo thei dinhmunah an ding lo a, nawrhna tur an nei hek lo. Chutiang vel vang chu a ni, loneitute lawm thin |huangruah meuh pawh loneitute timangangtu a lo nih tak ni!

Chapchar Kut dawna khatia ruah a'n sur khan, anni- 'chapchar' nena inzawmte hi, "Kutpui kan ur, khuangruah chiar nghian e..." tiin han lam hep hep mai sela an inhmeh dawn vei nen!