Ka pu, khelmual tha kan duh e

¢ Hmingsanga

Lammualah inkhelhpui a awm a. A puangtu VL Sanga ngei mai khan player-te hming leh an jersey number a puang dup dup a. Half time-ah an statistic leh player profile, an boot size leh an tauh luh zat te, ding lam leh veilama a pet goal zatte a puan thin lai khan, “Mizote tan football hi khelh chi a ni lo, kan pate si,” tih thu sawitu kan tlem ngawt mai.

Kan tualzawlah kan hlimna khawp kan hmu a. PWD labour rualin alkatra barrel ruak vaw ri chunga lam an thai mup mup lai te kha Mizorama football vanglai a ni kan ti lo phal dawn em ni? Sorkar nghenchhan lo club, Aizawl Football Club (AFC) te'n sports kits siamtu langsar Umbro kutchhuak jersey an ha kan awh thinzia leh, a hmaa 'Hotel Ahimsa' tih inziak ngei mai an neih theih dan kan inrinsiak laih laih ni te kha a rei ve leh ta hle mai.

Mizoram Football vanglai tih mai tur hun kha ngaihtuah let apiangin Laldenga Gold Cup tih leh, khatih laia Invitation Tournament te leh Cup hrang hrang khelh thinte kha mitthla-ah a lo lang thin. Mahse, mual an liam zo ta. Khatih lai khan national team tih leh state pawn club-a khelh lam kan ngaihtuah phak meuh lo. Kan buzawlah lam kan thai a. State pawna Mizoram team fehchhuakte pawh vawi duai lo kutbengin an lo haw a. Pawi tih chang nei thin mah ila, kan tualzawlah kan hlimna khawp kan hmu ni hmiang! An chak loh chhan pawh zawt lovin Lammuala an inkhelh leh hun tur nghakhlel takin kan thlir mai thin a nih kha.

Ramin hma a sawn zel a, kan hmuh leh hriat a danglam zel a. Mizoram football pawhin nasa takin hma a sawn ta. Cable TV avangin tapchhak zawl atangin English Premier League leh League dangte kan thlir thei ta. “Mengrei Generation” an lo chhuak a, inkhel enin zan rei tak tak thleng kan meng a. A meng rei lote tan lah en hun nuam takah en tur a awm bawk nen. Kan titi chu Lammual atangin Old Trafford leh Nou Camp lamah a insawn a. Mizote tan football hi khelh chi a ni lo tih thawm a ring hman viau a. Mahse Mizo footballer talent nei tha tak takte talent tuai hriam a’n nih meuh chuan kan hming a thang chho ve tan ta.

Tawnmang Lamah Chuan e...
Tin, heti hi a ni a... Rajiv Gandhi Memorial Stadium chhung chu a eng pup a. A chhungah chuan Mizo tam tak telna India team leh Japan an inkhel a. He match hi match pawimawh tak, India hian a hneh emaw a draw emaw chuan World Cup a tlinna tur a ni. Hei vang hian India ram hmun hrang hrang atangin Football fans thahnem tak an pungkhawm a. Japanese fans lah an rawn thawk thla hnem.

Lengpui Airport-ah ni nga kal ta atang khan mikhual an rawn thleng ruih ruih a, Aizawl khawpui chhunga hotel tha zawng zawng chu a khat vek tawh. India team-ah hian Mizo tlangval 10 zet an tel a, mi 8-in First XI-ah hmun an chang. All India Football Federation pawhin Mizoram-in stadium kan neih thar chu home ground atana a thlanna chhan a ni.

“Football ngaina Mizo fans chet dan a mawiin, player-te auh phur an thiam a, anni tluk an awm lo. India team te au phur tur hian Mizote hi an tling tawk a, inkhel a pawimawh tawh si a. India rama fans dangte chuan an duh leh rawn belh ve mai teh se,” tih chu AIFF thuchhuak a ni. Vai lo kalte pawhin chinchang inti hre fein “Home advantage kan neih theihna tur ber chu Mizoram hi a ni,” an ti a.

Ka sirah chuan World Cup thlengtu tur England atanga chanchinbumi lo kal a thu a. Japan atanga lo kal chanchinbumi ka vei lama thu chuan a hmel anpui a hmuh tam avangin nuam a ti hle.

Kan hnung lam leh hma lamah India ram hmun hrang hrang atanga lo kal media mi leh sa an thu ther fur bawk. Mizote heti taka Indian football-a kan chungnun takzia leh, India national team-ah meuh pawh player 10 ngawt kan thawh theih chhan hi eng nge ni ang tih chu zawhna pawimawh tak a ni a... Ka harh ta!

A Tak Ram
Stadium sak min tiamtute kan han thlang tling a. Beiseina chu beidawnnaah an chantir zel a. Stadium sak min tiamtute awrawl thangkhawk chauh chu kan chan a ni ta zel rih a. Thu sawi tlawr thiam ringawt a tawk lo a. Thutiama ding ngamte hi thalaite hian kan mamawh ta. Hman atanga vawiin thlengin min tiam tawh hi a tak kan la hmu lo a ni. Politician-te pawh hian hei hi hre nawn leh teh se. Min tiam a nih chuan an thutiam hlenin min pe rawh se. Theih loh, theih ang a sawi a, tih theih leh si loh ai chuan sawi lo ngam zawk rawh se. Inkhel thiam chuan mi chan lai ball an laksak thin ang hian, party hrang hrangte pawhin politics-ah ‘ball’ an nei theuh. Min tiamtute hian khelmual tha tak min dinsak mai sela. Khelmual tha tiam vetu party dang chuan inthlan leh hunah sawi tur a nei tlem sawt dawn tihna a ni ang.

Tunah rih chuan a ball hi a tam a, inchuh tur awm tak kha a mal theuhin an kawl! Hei hi kan buaina a ni. Khuallian nih chang a, “Mizote hi National chauh ni lo, khawvel huapah pawh kan lang thei,” tih leh ngawt thin hi chu kan hne ngawih ngawih tawh a.

“Stadium sak a ni ang,” an ti a, a thlawnin vawi tam tak kut kan beng tawh. A tak hmuh tur a awm si lo.

Sum leh pai tam tak hlawh chhuaka Mizo tlangval thlang tla hmasate hlawhtlinna hi a bultanna chauh a ni. An hnung zui tur Mizo tlangval za rual an la awm. An hlawh zat kan hriat hi a tawk mai lo. Anni hian midangte tih bak hret an pen avanga hetia lo awm thei hi an ni.

Harsatna hrang hrang, khaw lum leh lunglen bakah tawng thiam loh vanga hrehawmnate tuarin, tribal chawnsek nih vanga deusawh leh nuihzatte pawh an hlawh ang. He'ng zawng zawng hi an tuarchhuah hnu-ah hetiang zat hlawh thei tur hian an inti pachang lui a.

Neih leh khawl an nei hran lo. Thiam fal leh thei fal an ni vek bik kher lo ang, an rilru an tichhel a, Vaipa theih chu theih leh thiam tumin tan an la a. Thlanfim luang zawih zawih khawpin an thawkrim a. Zuk leh hmuamah an insum a, sim ngai sim a, taimak kawnga thatchhe lo turin an infuih sauh sauh thin. Nang pawh anni ang bawk hi i ni ve thei e.

Tunge Mawh Phur?
Politician tam tam takin sports hi politics khelhna hmanrua atan an lo hmang tawh thin. Ti fuh fe fe pawh sawi tur an awm. India ramah ngat phei chuan hetiang thil hi ‘remchangah’ hmangin, Sports Association hrang hrangah rawng huai nih tumin theihtawp an chhuah a. Neih leh tha ui lovin khelmual thara an zuan luh hmain khelmual pakhat atan sports hi an hmang ve thin reng a ni. |henkhat chu loneitute hmakhaw ngai bertu ni awmin an inlantir a, thenkhat chu zirlai pawlah te an inhmang hmasa te te bawk thin. He'ng mite hi an demawm chuang lo. Politics khelmuala an inkhelh tak tak hmain hengah hian an lo in-warm-up hmasa a ni ve mai.

A Hmun Chu Khawi Pawh Ni Se
Stadium tih kan sawi apiangin Sipai lammual khera sak duh pawl an awm a. Sipai Lammuala sak a nih chuan khawpui thang chak Aizawl hian kawng tam takin a tuar thei dawn nia ngaitu an awm bawk. |halai tam tak chuan khawi hmun pawh ni se stadium kan neih theihna a nih dawn phawt chuan pawi an ti lo.

Sorkar hian thalaite tan stadium min sak sak tak tak dawn a nih chuan, India ram hmun danga stadium pui leh lian tak tak angte hi a mitthla a ni mai thei. Tih puitlin theih a nih chuan thil lawmawm a ni ang. Mahse thalai tam zawkte hi rei nghak hman lo nia inngai an ni tawh a. Rei tak saka hlawhtlin leh loh ai chuan a ground chu hring nghulh mai phawt se, thutna leh inthlakna pindan awm se, tui leh eng tha bawk se, chu chauh te chu a ni kan beisei ni.

India rama stadium tha ber pawl chu kan beisei ngam lo. Kan ram sum leh pai dinhmunte thlirin beisei ngam chi pawh a ni lo. Beiseina nung nei a, rinna mita lo thlir ngawih ngawih thin, thalai tam takin mual an liam ta. Beisei nei lo chu kan ni lo, kan beiseina erawh a chau a, stadium tha leh changtlung tak pawh a nih tawh loh vangin, “Ka pu, khelmual tha kan duh e,” kan ti mai a ni.

Related Posts :