INPUH!

¢ HC Vanlalruata

Hmanni lawk khan kan Health Minister-in chanchinbumite a kawmnaah Health Minister hlui leh tuna Health Director ni laite leh engineer pakhat eiru-a puhna thu puitham zet mai a phawrh a. Press conference-ah hian contractor pakhat Health department hnuaia hna pakhat estimate cheng nuai 70 vel man contract-a thawk mektu nia sawi ko chhuakin ani hian a hnathawh viltu EE hnena cheng nuai 21 a pek thu a sawi a. EE hian chu pawisa chu Health Minister hlui leh Health and Family Welfare department Director te nen an pathuma an insem tur a nih thu a sawi niin a puang bawk.

He thil hi a namailo hle chungin a tirah chuan ngaihtuah chiang mang lovin kan thianpa pakhat chuan cheng nuai 70 man hna thawka cheng nuai 21 a pek daih chuan contractor hi a va hlawk awm love, a ti ngawt a. Ngaihtuahna thuk hmang vak lova sawi ni mahse, han chhut chian chuan a hna thawh man (estimate) atanga chhuta za zela 30 lai hi a pek chuan contractor tan chuan thawh ngaihna a awmlo a nih em loh pawhin a hlawklo nasa ngawt ang tih a rin theih. A hna a chhe tawp a nih loh vek chuan. Thlirna dang lehah chuan revised estimate kan uar em avangin hna viltu leh thuneitute vawm hnem hnem hlawkna a ni ve a, chumi atanga thlir erawh chuan contractor hi a hlawk hle zawk dawn pawh a lo ni mahna.

Thlirna tlang dang awm thei tam tak a awm a. Thenkhat chuan Minister leh contractor-in namai lo taka eirukna lian thama inhnamhnawiha an puhte hi an ngawi rei an ti a. An sawi hi a dik a nih an ring nghet hle. An ei lo a nih chuan intihhmingchhiat chungchangah Court-a kal a hun a, chumi hma pawhin mipui hmaa an insawifiah a hun tawh a ni an ti. He ngaihdan hi pawmawm tak pawh a ni. Sorkar hnathawk chu an pute puhna thilah an ngawi a nih pawhin Health Minister hlui hi chu sorkar hnathawk a nih ve loh avangin a ka a an a hun hle tawha ngaitute hian an ti dik.

Ngaihdan dang lehah chuan Minister-in a hnuaia thawk, a department hotu namailo takin a puh a, chu pawh mipui hmaa thu puangdarhtu chanchinbumite hmaah ngei. Chumi a nih chuan a puan hma hian a hriat tirhin he officer hi a hna atangin a chawlhtir (suspend) emaw hemi puhna hi chhui a niha thudik hmuhchhuahna tur tibuai leh dal theilo turin a senghawi ngei ngei tur a ni ti an awm a. Press mite hmaa a puan hnu pawha Director chunga action engmah lak a la ni lo hi (EE leh Contractor-te pawh an puhna hi a dik a nih chuan inang renga hrem tur an ni chungin department dang ami leh department dang hnuaia thawk an ni a) a va mak ve an ti bawk. Minister leh contractor thusawi hi a dik a nih chuan tun ang mai mai hi a kal dan tur a ni lova, Minister hian ACB-ah emaw FIR a thehlut/thehluh tir tawh tur a ni a; a tilo a nih pawhin ACB/Police lamin suo moto-in FIR an siam ngei tawh tur a ni ang, tia an sawi hi awm ving veng tak a ni bawk.

Eirukna chu eirukna ni mai awm tak a nih laia hetianga ngaihdan phir a awm ta tlat hi eng vang nge kan tih chuan eiru-a inpuhna hi kan ram politician zingah hian a hluar em em a; amah corruption tluk zet hian a hluar hial awm e. Chuvang chuan inpuhna zawng zawng hi (naupang beram vengtu dawthei ang deuh khan) uksak vek a harsa tawh a ni mai thei. Chutih rualin eirukna hian min chen chilh hneh lutuka mipuiin menah kan thlak tawh pawh a ni hial thei bawk.

Engpawhnise, he thil hi thil namailo a ni a, thudik hriat ngei hi mipui chanvo a ni a. Ngawih ral pui mai chi a ni lo. A tunge dik zawka tunge diklo tih pawh kan hriat a tul. Chumi ti tur chuan a puhtu leh a puh-a te hian chiang taka an sawifiah theilo a nih chuan chhui chian a, court-a thudik mipuiin an hriat theihna tura chin fel ngei chu a ngai a ni.