Kum 1995 September thla khan India hmarchhak bialtu Income Tax Department (Investigations) official-te chuan Baid Group an tih mai (Capital Travels neitute) office leh chenna in – Aizawl, Silchar, Guwahati, Kolkata leh hmun danga mite dapin dan kalha chhiah awlrukna a awm ngei niin an hria a.
Hei bakah hian hmarchhak politician thenkhat, a bikin khatih laia Mizoram chief minister Lal Thanhawla leh union minister Santosh Mohan Dev te chu sumdawng hausate nen hian an inkawp thuk hle niin an hre bawk a ni. Hei hi Lal Thanhawla eiruk thubuai tia hriat lar tak lo intanna chu a ni tiin a sawi theih ang.
Chief minister Lal Thanhawla chuan kum 10 vel zet eirua puhna a hmachhawn a, eirua puhna chungchang hi hun rei tak khel a nih hnuah thutluka siam a ni a, a fihlim.
1999-a chhui tan tawh, 'Lal Thanhawla thubuai' tia hriatah hian February ni 26-ah khan he thubuai ngaihtuahtu T Saikunga, District & Sessions Judge Court chuan judgement order a tichhuak a, Lal Thanhawla leh a thurualpui nia puh Jodhraj Baid leh Pushpa Sharma te charge-na, Special case no. 6/03, Special Trial no. 1326/96 u/s 120 B IPC r/w Sec. 7, 12, 13 (1) (d), 13 (2) Prevention of Corruption Act-ahte hian, puhna hrang hranga thuhretute thu an lak atang leh document awm te atangin crminal offender a nihna te, thuneihna hmangsual nia puhnate chu a fiah zo lo tiin, he thubuaiah hian a thiam lohna a hmu lo tih a puang a, he thuthluknaa lungawi lo an awm chuan a appeal leh theih tih a sawi bawk.
MPCC president Lal Thanhawla hi chief minister a nih laia a thuneihna hmang dik lo, dan ni lova che tura midang thurualpui, mahni thla bi hlawh pangngai bak sum dik lo taka lalut leh a thil neih hlut zawng leh a thla hlawh inmil lova puh a ni.
Heng puhnaahte hian Court chuan finfiah fak theih thil hmuh tur awm lohna a awm nual tia sawiin District & Session Judge chuan, rinhlelhawm anga lanna te chu awm mah se, finfiah a nih loh chuan Court chuan rinhlelhna ringawt chu thu tlingah a ngai lo a ti. A rintlak thei ber chu Income Tax hovin an dapchhuah te chu a nih mai thu te a sawi.
He thubuai kaihhnawih department hotu- Power & Electricity CE leh PWD CE te chuan an department-a bungraw supply-ah dan ang thlapa kalpui niin, bungrua supply pawh a chhe loah an ngai tih an sawi thu te pawh judgement order-ah hian a tarlang bawk.
Mahni hlawh bak sum leh thil hlu dang nei nia puhnaah pawh in khata chengte sum lakluh leh an thil hlu neihte en vek a ni lo tia sawiin Judge chuan, "Pu Hawla leh a thiannu Pi Rii sum lakluh chiah chhui a ni a, an fate (in khata chenpui) sum lakluh chhut tel a ni lo. Bank account-ah pawh deposit deuh chauh tihlan a ni a, a lakchhuah leh hmanral lam tihlan a ni lo a, deposit leh witdrawal date tihlan a awm lo bawk," a ti.
Judge chuan Court ngai pawimawha Lal Thanhawla leh a thurualpui nia puhte an inlan thin chu lawmawm a tih thu a sawi.
Case buaipuitute'n theihtawpin document an lakhawm tih sawiin, he case chhuina hi a tirah tha taka tawiawm ni se rei vak lova chinfel a, tih tawp theih mai a nih a rinawm, a ti.
He thubuai lo intanna hi national paper pakhat-in Baid Company te'n income tax an pe lo tih thu a ziahlanah Income tax mi leh sate'n Baid company office leh an in, India ram hmun hrang hranga mi an dapnaah hetih laia Mizoram chief minister Lal Thanhawla hnenah hian sum thahnem tak an pe tih record tarlanna awm chu an haichhuak tel niin a tarlang a. Hemi chungchangah hian Rev Zairema leh Bualhranga te chuan Supreme Court-ah PIL an thehlut a, Supreme Court hian state sorkar chinfel theih mai nia hriain state police-ah FIR thehlut turin PIL thehluttu te hi a rawn a. 1998 khan Rev Zairema hian Mizoram police-ah FIR a thehlut a, April ni 14, 2003 khan case incharge officer chuan chargesheet a thehlut ta a ni.
He thubuai ngaihtuah a nih chhung hian thuhretu mi 56 koh an ni a, kum 10 chuang thubuai ngaihtuah chhung hian heng mite zingah hian boral te, Court-in a koha kal lo mi 16 awmin mi 40 chiah thu zawhfiah an ni.
Court thuthlukna puan a nih lai hian Lal Thanhawla bakah a thurualpuia puh Jodhraj Baid leh Pushpa Sharma te pawh Court-ah an inlan a, Hawla ukil-te leh MPCC hruaitu engemaw zatin an tawiawm bawk.
Court thurel puan a nih hnu hian MPCC chuan Congress Bhavan-ah lawmthu sawina inkhawm an buatsaih nghal a, Lal Thanhawla chuan, kum 13 Mizoram chief minister a nih chhung khan pawisa sen pawh a eiru lo nia sawiin, "Itsikna leh elrelna atanga intihchiat tumna a ni tih ka chiang a, tu emawin CM nih a tum a, a daltu lian berah min ngai a ni," a ti.
"Dikna hi a lal thin a, tunlai khawvelah pawh dikna hi a la lal a ni tih tidiktu chu he thuthlukna hi a ni," a ti a, "Indian Judiciary hi a dik a, a rinawm a ni tih a lang chiang a, kan judiciary-ah hian rinna kan nghah zela kan zahthiam pawh a tul hle a ni," a ti bawk.
Nikum khan Prevention of Corruption Act Special Court, T.Saikunga hma-ah Lal Thanhawla hi a inlan a. Lal Thanhawla, Court-a a inlan chhan hi Court kal mekah insawifiahna huna sawi duh a neih leh neih loh chungchangah a ni.
Special Judge, T Saikunga’n PIL-a Yodhraj Baid-a hnen atanga cheng 74,27,232 la-a puhna-ah sawi duh a neih leh neih loh a zawhna chu chhangin Lal Thanhawla chuan chief minister a nih chhungin tu hnen atang mahin dik lo takin sum a la ngai lo niin a sawi a, political party fund atan cheng 12,50,000 a pe che em tih zawhna chu political party zawng zawngin fund an khawn vek thu leh, tupawhin fund hi an dawn vek a rin thu a sawi.
Special Judge chuan evidence atanga lang, kum 1994, July ni 11-a ram danga a kal dawnin Yodhraj Baid-a hian Pu Hawla hi cheng nuai 1 a pe nia sawi leh, ni 15 hian ram dangah chuan a kal ta em tia zawhna chu Hawla chuan ram pawna a zin dawnin tu pawisa mah a la ngai lo niin court chu a hrilh a, Indian Olympics Association hming leh sum chuan ram pawnah a zin thin niin a sawi a ni.
Case IO, John Neihlaia thusawi atanga a lan danin Hawla hian chief minister a nih hmasak tumin Yogaraja Baid-a hi namen lova duhsakin, PWD-ah Iron Rod, za-a 95 lak laksakin a supply tir em tih zawhna chu chhangin Hawla chuan chief minister a nih laiin tumah duhsak bik a nei lo niin a sawi a, dik taka thil ti turin a zirtir thin niin a sawi.
1994 atanga 1995 chhunga Zarkawt-a a nu in sak laiin PWD EE chu telephone-a bia-in a nu in sak chu tanpui turin a hrilh ni-a puhna pawh Hawla chuan a nu hnenah chuan contractor-in thil eng pawh tihsak an tum chuan la lo turin a hrilh zawk niin Court chu a hrilh a, police hovin hnatlan an tum pawhin lo hnar turin a hrilh thin niin a sawi.
Hawla chuan a nu in sakah hian a slab chhunna tura a dona erawh chu PWD ta an hawh ngei tih a sawi a ni.
Special Judge, T Saikunga chuan Lal Thanzara hminga cheque kal, Cilika gel powder supply-na, cheng 2,40,000 chu Yodhraj Baid-a hian a dawng hlauh a, Hawla te chhungkua-ah hian Baid-a hi a inrawlh thuk hle nia puhna chu a dik em tih a zawh chuan Lal Thanhawla chuan Lal Thanzara chu 1st Class Contractor a ni a, a sumdawnna-ah a tel loh bakah a hriatpui ngai lo tiin a sawi a, in hmun pass, LSC 12 of 1994, a nu hminga awm chu a ta anga puhna pawh Hawla chuan LSC chu a pa hminga awm a ni a, a pa a boral hnu-ah a nu hmingin a awm leh a, a nu thih hnu-ah a hmingin a awm leh tih sawiin thil hi chik chian thin ni se a duh thu court-ah chuan a sawi a ni.
Special Judge chuan Lal Thanhawla chu a in neih te, a cheina man te, a lirthei neih te, a bank account neih zat te leh a thil neih dang hlutna hrim hrim chu cheng 2,34,35,341 a ni ti-a puhna chu a dik em tih a zawt a, chief minister chuan he thilah hian a uar lam zelin thil an chhut nia a hriat thu a sawi a, a hlawh, dan dik taka a lakluh nia sawi leh a hlawh a inmil lo ti-a puhna chu Judge hian a dik tawk lo tiin a hnawlsak thung a, Case IO-in a thil neih leh a hlawh, dan dik taka a lakluh chu Hawla hi a dil a, mahse Hawla hian a pe lo ti-a Pu John Neihlaia’n a sawi chu a dik em tih a zawhna chu Pu Hawla chuan Case IO hi kum 1998 December thla khan an inah hian a kal tih a sawi a, a bak chu mitthi ralna-ah chiah a hmu niin a sawi.
Special Judge-in sawi duh a nei em tia a zawh Hawla chuan sawi duh a neihte a sawi ve chuan a tha lo ang, tiin a sawi a, an tan a hlauh avangin engmah a sawi duh lo niin a chhang a ni.
Chief minister chuan Court-a hearing a neih zawhah Bhavan-a chanchinthar lakhawmtute kawmin a case neih chungchang a sawi a, "Supreme Court pawhin vawi hnih a dismiss tawh a, politicaly motivated a ni a ti tawh a" tia sawiin, "Zoramthanga te’n dawtin an belh leh zel a, thudik sawi mai hi a tha," tiin a sawi.
A court case neih chungchangah, "A na lo teih teih em mai," a bawk.
"Kum 10 MNF sorkar chhungin engmah tak tak an thlen thei lo a, inthlan dawn apianga court case neih thu tlangaupui a ni mai," tia sawiin, "Seperation of judiciary pawh hman tur tih a nih ngawih ngawih laiin Pu Zira nena kan case neih vangin an hmang duh lawk lo a ni," a ti.
Chief minister Lal Thanhawla case chu ngaihtuah nawn a nih hnuah thiam lohna a neih hriat a ni lo a, puhna zawng zawngah thiam chantir a ni ta a ni.
March ni 1-ah khan Lal Thanhawla thiamchanna hi Congress Bhavanah a lawmna hun hman a ni.
Chief minister Lal Thanhawla chuan ramhnuai atanga kutbenga lo haw tur, lalthutthleng kian meuha Congress mipuite chhanchhuah chuan, amah chu sual tinrengin an puh nia sawiin, ‘Kross-ah min khenbeh an tum ang maw? Teuh lo mai,’ tiin a sawi.
Congress Bhavan-a pungkhawm mipui hmaah thu sawiin chief minister chuan, Congress party tihchhiatna tur leh a mualpho theih-na tur MNF te’n an zawn rengna karah ‘Dikna-in a hneh thin’ tih an thupui chu a dingchang reng niin a sawi a, “Lawmna ni-ah hian inngaitlawm leh thuhnuai rawlh chungin lawmthu kan sawi tur a ni,” a ti.
Lal Thanhawla chuan nuam leh lawmna chuan Congress mipuite chu a ûm reng nia sawiin, Pathian pawhin nuam tawl chu a phal niin a sawi a, a phal loh zawk chu ‘Amah theihnghilh chunga nuam tawl’ a ni tiin a sawi.
MNF party chu Mizorama kum 20 tal tap tah leh ha thialna thlentu-ah puhin, ngam leh ngam lova tlanchhe chunga zalênna sualah a puh. Ram tana nunna chân a, theihtawpa beitute chu MNF tia a sawi ve ngai loh thu sawiin, an hruaitu bawr te sawi nan MNF tih a hman thin thu a sawi.
Case a neih dan chung-chang sawiin chief minister chuan, 1996-ah pastor senior leh politician thankinin Supreme Court-ah PIL an thehlut a, Supreme Court chuan politics-a inbeihna mai nia ngaiin a lo hnawl tiin a sawi. Chumi hnu-ah a case chu tinung thar lehin, ACB-ah FIR an thehlut nawn leh a, chu chu an chhui zawh hnu-ah Supreme Court-ah thehlut lehin, Supreme Court chuan ngaihtuah tlakah a la ngai chuang lo niin a sawi bawk.
A sorkarna a tlak hlim, 1998 khan a case chu khatih laia sorkar khan a tharthawh leh nia sawiin, dawta an puhna zawng zawng chu, “Thingrem lian tak panga khat a ni,” a ti.
Sorkarna an chelh loh hnu-ah pawh nasa takin amah chu an bei zel nia, Kau Tlabung chungchangah pawh signature engmah awm lo chu Assembly House-ah pharh a ni tiin a sawi a, chumi hmang chuan a case pawh tihnun thar leh zel niin a sawi.
Eiru-a an puhna-ah thuhretu 56-te chu a zawh theih zawng zawng an zawhfiah hnu-ah pawh, ama tana thuhretu ni vek ang maiin an tawng ta niin a sawi a, thuhretu tur a mamawh leh mamawh ve loh chungchang an zawh pawhin, ‘Chung lamin min hriatpui a, ka mamawh lo ve’ tiin a chhang thin niin a sawi.
Hetianga dawt tinrenga an puh lai hian, sorkar ukil pakhat chuan, ‘He case-ah hian Lal Thanhawla hi hling lukhum kan khumtir dawn emaw kan tih laiin, lal lukhum a ni kan khumtir zawk dawn ni,’ tia a sawi avangin chu pa chu dân kalha bàn a ni ta niin Hawla chuan a sawi a, a nupui pawh Higher Secondary School-a contract lecturer a nihna atang in an bàn ve nghal niin a sawi bawk.
A thusawi lai la la hian Chief Minister chuan he nu, a hna atanga an bàn tak hi a hna ngai chelh tir leh ngei turin education minister chu a ngen sak nghal a ni.
Eiru-a an puhna zingah, cement lei tur a van hun laia a nuin PWD store-a mi a ba a cement a lak, a thlawna la emaw an tih leh, a hnua pawisa a pekna receipt an hmuh leh hnu a, ‘a eiru leh lo’ an tih chu a teuh ber lai a ni, Hawla chuan a ti a. ‘Sorkar pawisa hi MNF ho anga eiruk mai mai chi a ni lo,’ a ti.
MPCC senior vice president, home minister ni bawk R Lalzirliana chuan, an president thubuai chu an party thubuai a nih thu leh inthlan dawn apianga party dangin an vawrh chhuah thin a nih thu a sawi . Dawta puhna tinreng pawh tuar tlang thei mi huaisen chu fak tlak a nih thu a sawi a, ropui lehzuala party in lawm an tum thu a sawi bawk.
Inkhawm hi an party treasurer H Liansailova’n a kaihruai a, resolution 4 an passed bawk a ni.
Thinlung lungchhiain Lalpa hnenah i kir leh ang u: Hawla
March ni 1, 2010-ah Congress Bhavan-ah Lal Thanhawla thiam chan lawm nan MPCC senior vice president R Lalzirliana'n thingpui ruai a buatsaih a, he hunah hian thu sawiin Lal Thanhawla chuan, "Hawh u thinlung lungchhiain Lalpa hnenah i kir leh ang u khai, i dinthar leh ang u tiin Zoram mipui kan insawm a ni," a ti.
"Hnehna ropui tak in chan niah hian chapona rilru, invilik tumna rilru kan nei tur a ni lo, thuhnuairawlhte hi Pathianin a chawimawi thin. Vawiinah hian he ramah hian dikna, rinawmna, felna, thianghlimna leh taimaknaa he hnam tluchhe mek hi siamtha tura a koha te in ni," tiin mipui pungkhawmte a hrilh.
"13th Finance Commission khan kan recommendation parliament-ah a pharh tawh a, tun financial year thar atang hian kum 5 dang kal chhohpui tur kan ram tana a tangka faia min rawn pek ringawt pawh cheng vaibelchhe 5000 chuang a ni. Heng sum hi a hmanna tur dik takah kan hmang ang, kan ram hi state dang entawntlak ramah kan siam ang. Hawh u thinlung lungchhiain Lalpa hnenah i kir leh ang u khai, i dinthar leh ang u tiin zoram mipui kan insawm a ni," a ti a ni.
NLUP chungchang sawiin, "Tun thlengin lawmna tur hlir a la awm. Kan flagship programme-ah party dang an hmanhmawh hi lawmna tham a ni. An hnam runtute pisa atanga 'an sem har tawh' tia press release an chhuah hi malsawmna zel a ni," a ti.
Delhi lam pawhin NLUP chu tha an ti niin a sawi a, "Kan hotute an khawtlai nachhan chu a hlawhtlin ngei tawh kan duh a, mirethei te'n lei rem rahpui ngei se kan duh a ni. NLUP hi India ram dangah pawh hman ve an duh dawn," a ti a, "MNF unau ten an nghakhlel bawk a, semsak tawh kan tum ang chu, tun tangka kumtharah hian," a ti bawk.
NLUP chu Congress policy a nih thu sawiin, "In sorkar programme a ni a, a dawngtu tur (beneficiaries) te pawh in duh dan angin a kaltlangpui dawn tih ka hriattir duh che u. Mahse, hmang dik lo chu hrem an ni ang. Sorkar pawisa a ni a, MNF ho anga eiruk mai mai theih a ni lo tih ka sawi duh," a ti.
"Tuirial hydel project, 60 MW pe chhuak thei te hi, MNF sawrkar hnuaiah compensation dik lo takin an la a, a thuanawp phah a. Hei hi thudik, Pathian hma pawha pharh ngam a ni," a ti a. "An eiruk cheng vaibelchhe za tel khan mombati te hi thingtlangah sem ang hmiang, mombati aia tha pawh an sem thei ang," a ti.
Hawla’s Case kalkawng chu
1995:
September 13: India hmarchhak bialtu Income Tax Department (Investigations) official-te chuan Baid Group an tih mai (Capital Travels neitute) office leh chenna in – Aizawl, Silchar, Guwahati, Kolkata leh hmun dangamite dapin dan kalha chhiah awlrukna a awm ngei niin an hria a. Hei bakah hian hmarchhak politician thenkhat a bikin khatihlaia Mizoram Chief Minister Lal Thanhawla leh Union Minister Santosh Mohan Dev te chu sumdawng hausate nen hian an inkawp thuk hle niin an hre bawk a ni.
December 15
Hmarchhak chanchinbu thenkhat chuan Lal Thanhawla leh Santosh Mohan Dev te chu he’ng sumdawng hausate nen hian hnungthak inhiah tawnin thil an ti ngei nia Income Tax official hovin an hriat thu hi an chhuah hlawm.
1996
Kum tir lamah Senhri kartin chanchinbu chuan Assam atanga chhuak chanchinbute thuchhuah hi a chhuah chhawng a. Lal Thanhawla chuan hemi avang hian Calcutta High Court-ah thubuai siamsakin a khing.
August 17
Rev. Zairema leh Bualhranga te’n chanchinbu-a thuchhuah, Mizoram chief minister puhmawhna te hi a dik leh dik loh chhui chhuak tura a mawhphurtu ‘agency’ te’n an chhui chian ngiatin Supreme Court-ah Public Interest Litigation (PIL) an thehlut a. India rama court sang ber chuan Writ Petition (Criminal) No. 453 of 1996 hmangin he an thu thehluh hi a pawm.
October 10
Court sang ber duh danin Rev. Zairema’n ACB hnena FIR a thehluh chu Aizawl Police Station lamah suan a ni a, hemi ni hian Aizawl P/S Case no. 631/96 dt. 10.10.1996 u/s 120 B IPC re/w u/s 7/12/13(1)B 13(2) Prevention of Corruption Act, 1988 chu ziahluh a ni. Supreme Court chuan he thubuai hi vil (monitor) zui a tul tiin a chhuitu Police Officer (Case I.O) chu a chhui dan report Court-a thehlut ziah turin thu a pe.
1999
October 8
Supreme Court chuan he thubuai chhuitu-in a thil chhui finfiahna atana tul ang tur Income Tax official-te’n an thil hrente a kuta a kawl tawh avangin vil zui zel ngaia a hriat loh thu puangin he PIL hi a ‘disposed’. He thubuai hi PC Lalchhuanawma, MPS leh Joseph Lalchhuana, MPS te’n an khawih thin. Chumi hnu-ah Anti-Corruption Branch SP John Neihlaia, MPS hnenah IGP chuan a hlan leh a ni.
2002
July 1
A chunga sawi thubuai hi chhui a nih laiin Rev Zairema chuan Aizawl Police Station-ah FIR dang a thehlut leh. Heta a thuziahah chuan hemi kuma Assembly Budget session laia khatihlaia chief minister Zoramthanga’n Kau-Tlabung leh Tuipanglui Hydel Project hnathawh dana thil fel lo a awm ni awma a sawi chhuahte chu chhui chian tul a tih thu a tarlang. A FIR thehluh behchhan hian Aizawl P/S Case no. 322/2002 dt. 1.7.2002 u/s 13(2) Prevention of Corruption Act, 1988 chu ziahluh a ni.
2003
April 11
Aizawl P/S Case no. 631/96 hmanga thubuai siam sak Jodhraj Baid leh Pushpa Sharma te chu man an ni a, mahse, Gauhati High Court atanga anticipatory bail an lo lak tawh avangin hemi ni vek hian chhuah leh nghal an ni.
April 15
He thil (Aizawl P/S Case no. 631/96 chhuitu Case I.O. chuan Special Judge, Prevention of Corruption Court-ah charge sheet a thehlut a. Chuta mawhphurtu-a puh (accused) te chu Lal Thanhawla s/o Hmartawnphunga (L), Zarkawt, Aizawl, Jodhraj Baid (Jodhraj Jain tia hriat bawk) s/o Peerchand Baid, Club Road, Silchar-1, Cachar Dist., Assam leh Pushpa Sharma s/o Hem Sharma, Minipadhar, Sanitpur Dist., Assam te an ni.
Charge sheet-a a lan dan chuan Lal Thanhawla leh a chhungte hian Baid leh Sharma te nena tangrualin a sum lakluh hriat theih aia tam hausakna Rs. 1,68,52,336 hu aia tlemlo thil a nei tih a ni.
August 22
Joginder Kumar, Eastern Overseas Corporation, Mumbai-a Partner leh Pam Suares Chief Executive Officer, Eastern Overseas Corporation) te chu Kau-Tlabung leh Tuipanglui Hydel Project hnathawh dan phunga eirukna awm nia puhna kawnga mawhphurhna pe-in man an ni a. Mahse, Gauhati High Court-in anticipatory bail a lo phalsak sa an nih avangin a ni veka chhuah leh nghal an ni.
August 22
Aizawl P/S Case 322/2002 thubuai chhuitu (Investigating Officer – Case I.O. tiin a chiang mai awm e) chuan charge sheet no. 781 dt. 17.11.2003 chu P. Singthanga, Special Judge, Prevention of Corruption Act hnenah a thehlut a. Hetah hian Lal Thanhawla, Joginder Kumar leh Pam Suares te chu ‘accused’ an ni. Charge sheet-ah chuan heng mi pathumte hian mipui sum tichingpen a puh an ni a. Kau-Tlabung leh Tuipanglui Hydel Project hnathawktu Eastern Overseas Corporation hian khatihlaia Chief Minister Lal Thanhawla fapa Lal Thanzauva (L) ta Oceanic Business Agency account-ah Rs. 5,18,54,089.73 an chhunglut a. He’ng kawlphetha siam chhuahna contract hi EOC te hnenah Power department changtu CM Lal Thanhawla hian a pe niin a sawi bawk.
Hei bakah hian Joginder Kumar hian ama mimal bank account atangin Lal Thanzauva (L) firm (Oceanic Business Agency) Vijaya Bank Aizawl Branch account no. CA/C 491-ah Rs. 7,00,000 a chhunglut bawk niin chargesheet-ah hian ziahlan a ni a. Hei bakah hian Lal Thanhawla leh a chhungte hian sum leh pai leh thil dangah hetiang hi an nei nia tarlan a ni bawk a – New Delhi hmun hulum takah Rs. 6,91,600 man in (flat) te, 12B Mandeville Gardens, Kolkata-ah Rs. 6,78,500 man hu flat (Pu Lal Thanzauva hmingin) te leh car Rs. 8,31,583 man te an ni a. Hengte hi Hawla’n thuneihna a chan laia Mizoram sorkar atanga hlawkna hmutu mimal leh company te’n an ruahman sakte an ni tiin charge sheet chuan a tarlang.
Lal Thanhawla hi midangte anga man a nih veloh chhan chu political party hruaitu, Mizorama inhmun nghet nei a nih bakah a hruai party thalaite’n man a nih chuan buaina siam an tum thu an puan vang niin Case I.O. chuan charge sheet-ah a ziak lang a ni. Aizawl P/S Case no. 322/2002 a dan bawhchhiaa puhte chu Lal Thanhawla, Joginder Kumar leh Pam Suares te an ni a. Lal Thanhawla hnena thil hlu tham tak tak lo petu nia puhte leh hlawkna dawngtu-a puh Satpal Chopra, J.C. Sharma leh Lal Thanzauva te chu an thih tawh avangin an chungthu rel tura chhawpchhuah zingah an tel ve ta lo a ni.
Aizawl P/S Case no. 631/96 a thubuai siam sak zingami Pu Jodhraj Baid-a’n Special Judge atana Pu P. Singthanga ruat a nih dan Gauhati High Court-a khinga Pu Singthanga chu he thubuaia roreltu atana tlinglo anga a puhna thubuai avangin he thil hi rei tak a khawtlai a.
2006
June 29
Chief Justice Pu B.K. Reddy kaihhruai Gauhati High Court Bench chuan Pu P. Singthanga Special Judge atana ruat a nih dan chu a dik tia puangin eiruk chungchanga puhte thubuai hi a ngaihtuah thei a ni tiin thutlukna a siam a.
September 1
Chief Justice of India Pu Y.K. Sabharwal kaihhruai judge 3 thutna bench chuan Pu Baid-a’n Gauhati High Court thutlukna a ‘appeal’ na chu a hnawl.
2007
April 4
Special Judge Pu P. Singthanga chuan Aizawl P/S case no 631/96 a dan bawhchhiaa puhte – Pu Lal Thanhawla, Pu Jodhraj Baid leh Pu Pushpa Sharma te puhna chu ngaihtuah tlak (prima facie case awm) nia a hriat thu puangin April ni 26-a court hmaa inlan turin a hriattir a. Chutah chuan a tul angina Court-in an lakah ‘charge’ a ‘frame’ dawn tih a puang a ni.
Hemi hnu hian Chief Minister Lal Thanhawla eirua puhna thubuai hi a kal zel a, thutluka mumal a awm thei chuang lo.
Case chu a nung reng a, muangchangin a kal a ni ve hawt a. Kum 2008 a Mizoram in inthlanpui a hmachhawnah Congress party Pu Lal Thanhawla kaihhruai chuan chakna an chang a. Chumi hnua eiru thubuai court in a ngaihtuah leh hmasak ber chu neih a ni ta a ni.
Sorkar-na an chan hnua thubuai ngiahtuah nawn lehnaah Lal Thanhawla chu thiam changa chhuah a ni ta a. Amah puhna zawng zawngah chuan thiam chantir a ni ta a ni.
No comments:
Post a Comment