Eng vangin nge thil man a to?

¢ Lalhruaitluanga Chawngte

February ni 6-ah khan prime minister hova chief minister-te thutkhawmnaah Mizoram chief minister chuan Mizoramah thil man a to thu a sawi a, hei hi bungraw phurh man a to vang niin a sawi a nih kha.

Mizoramah hian thil man a to tih chu kan hre vek a, a tel lova awm theih loh thil thlengin a to tih pawh kan hre vek ang. Mizoramah hian thil a to a ni mai lo, a vang bawk. Ni tin mamawh, a tel lova awm theih loh thil pawh a vang viau zel mai a, mipui tan chuan hei hi a rit em em a ni.

Chief minister chuan thil man to chhanah hian a phurhna man a to vang tiin a sawi a, hei hi a dikna chin chu a awm, mahse, kan harsatna thlentu ber chu niin a lang lo.

Mawl takin ngaihtuah ta ila; Mizorama sumdawngte hi zawt kual ila, thawmhnaw zuar an ni emaw, eichawp thil zuar an ni emaw, bungraw zuar an ni emaw, 'a phurh man a to em avangin kan ti to lo thei lo a ni' tia sawi chu an awm tho ang a, a dikna chen pawh a awm ang. Mahse, an rilru tak tak an sawi duh a nih chuan anmahni dawrtute duhna hi thil man bithliahna ber a nih thu an sawi ka ring. Mipui lam atanga 'demand' a san leh san loh hi thil rate an bithliah laiin an ngaihtuah rauh rauh thinin ka ring a, tin, thil thenkhat phei chu a tlawm chuan miin an lei duh lo ang tih an hlauh hial te pawh ka ring. Kawr mawi tak hi a thlawnin Aizawlah phur thleng ta se, tunlaia an uar em em chi a nih chuan a zuartu chuan a duh zat zat a chhiar tho ang. Package commodity lamah phei chuan MRP a awm vek a, chuti chungin sumdawngin an duh phawt chuan an duh zat an chhiar thei tho a nih hi. Mipui 'demand' hi bazar rate siamtu ber a nih ka ring tlat a ni.

A nihna takah chuan Mizoram hi 'consumer protection' lamah kan chak lo a, consumer-te humtu tumah an awm lo ti hialin a sawi theih ang. Chu chu na kan ti a nih pawhin consumer-te humtu hi Mizoramah chuan a hmingin a awm ve che che chauh tiin sawi ila a dik ang. Consumer chu mipuite hi an ni a, sumdawngte ngei pawh consumer an ni ve tho. Chu'ng mite humtu tur chu Mizoram hian a nei mumal lo a ni.

Thil reng reng, mipui lei tura zawrh reng reng hi a that leh that loh te, a him leh him loh te, a to leh to loh te, mipui mamawh a phuhru em tihte sorkarin enfiahin a 'check' reng tur a ni. Mipuite tana him leh tha chauh zawrh a ni ang a, a man pawh a awm tawk zela chhiar tur a ni. Thil thenkhat phei chu a man tur zat bituk thlap a ni. Mizoramah chutiang vil tur chu kan nei em? MRP aia tova sumdawngin an lo zuar a nih pawhin tuin nge mipuite chhan ang? Chutiang chu a nih avangin sumdawngte'n thil an lo tito a nih pawhin thil mak a ni lem lo; hlawk duha sumdawng chuan mipui 'demand' a awm phawt chuan a duh zat zat a chhiar mai ta lawng! Vawiina sumdawng ni ve lote pawh hi sumdawng ta se thil man hi an duh zat zat an chhiar thovin a rinawm. Chu chuan Mizoramah consumer protection a awm lo hle tih a tarlang awm e.

Sumdawngte thil zawrh a that leh that loh te, MRP aia tova an zawrh leh zawrh loh te endiktu tur chu a hmingin kan nei ve, chu chu legal metrology te hi an ni. Mahse, 'wing' mai an ni a, mihring an indaih lo lutuk. Darkar 24 chhum lo chat lovin thawk ta se tuna an dinhmunah chuan Mizoram mipui hum tur khawp an ni chuang lo. Anni hi kan thuam chak dawn lo a nih pawhin hetiang hna thawktu tur midang, department dangah emaw, a thar din zawngin emaw kan mamawh a ni.

'Mipui demand' han tih pawh hian mipui demand ni lovin mi tlemte demand zawk hi thil man innghahna chu niin a lang.

Mizoramah hian sum lengvak a tlem tiin mithiamte'n an sawi thin. Mipui nawlpui zingah sum lengvak a tlem avanga chutiang chu sawi an ni. Chumi letling chiah chuan a sawi theih; 'Mizoramah sum lengvak a tam' tiin. Mahse, vanduaithlak takin chu'ng sum lengvak chu mi tlemte karah chauh a lengvak thung. Chu chu bazar tibuaitu a ni a, society tibuaitu, ni tina mipui min tibuaitu pawh a ni.

Sorkar hnathawk te, Kohhran hnuaia thawk te, politician-cum-contractor-cum-supplier te, rulling party bel fuh te, fair taka sumdawng hlawhtling ve hrim hrim te, a dang pawh an la awm ang, Mizoramah hian 'a che thei bik' an awm a, chu'ng mite thuhnuaiah chuan he ram hi a kun a ni ber. Hnatlang koh dawn paw'n chu'ng mite remchan hun chu kan thlir tlangpui. 'News' kan tih pawh hi chu'ng mite chanchin chu a ni ber awm e. Chawlhkar khat pawh mahni hnathawhna hmun thleng lo se ei leh bara buai chuang lo turte an ni a, Kohhran leh khawtlanga duhtawka inhmang turin daltu an nei lo emaw tih tur khawp an ni. An tuipui apiang a 'hit' a, an tuipui loh apiang a ro a ni mai. Chutianga 'rulling class' an awm avang chuan kawng hrang hrangin kan buai mek. Bazar rate thlengin chu chuan a tibuai a ni.

Engpawhnise, sorkar hruaitute tan hian kuthnathawktu a sing tel aiin 'rulling class' mi tlemte an hlauhawm zawkin ka ring a, loneitu 1000 aiin sorkar hnathawk 100 rual an hlauhawm zawkin ka ring bawk. Vairengte mipui vaw darh thei, taxi-pute pawh an duh lo chung chung intlan chhawktir thei khawpa khauh he sorkar hian sorkar hnathawkte zawng a ngam loh khawp hi maw! An hlawh tur siamfel hnu-ah service association hrang hrangin an duh loh thu an han aupui tliar tliar a, a ennawntu tur committee an din chuk chuk kha! Khatih lai khan taxi-pute intlan chhawktir theitu sorkar 'khauh' kha khawnge a awm?

Sorkar hnathawkte lungawi lohna hi engah mah ngai suh se ka ti a ni lo, an hlawh kalphung atana fitment committee thutlukna kha lekkawh luih ni rawh se ka tihna pawh a ni lo, 'a che thei' leh 'a che thei ve lote' chungchang ka sawina mai a ni. Uihum zat lekin an tihbuai zawh lohte hi uihum zat lek aia tlemin an tibuai theia ka hriat thu ka sawina pawh a ni. Chu chu a ni 'rulling class an awm' ka tih chu ni.

Sorkar rorel pawm lotute kan vaw dawn a nih chuan vuak vek tur ni awm tak! Sorkar ruahmanna zawm duh lote kan nawr lui dawn a nih chuan nawr luih vek tur ni awm tak! Chutianga kan ti dawn lo a nih rau rau chuan tumah vuak loh tur ni awm tak! Tumah nawr luih loh tur ni awm tak! Vuak ngam bik kan nei a, nawr luih ngam bik pawh kan nei. Chutih laiin khawih thiang lo an awm a, kil hrang hrangah chu'ngho chuan Pathian hming lam ri chungin ro an rel a, an inkawm tel tel bawk. Chu mai a ni lo, an tu leh fate pawh an innei thliah thliah a, an inzawmna hi a nghet tial tial leh ta nghal. Hna laknaah ni se an induhsak them a, a nih loh paw'n, fair taka hna laknaah pawh, sikul tha chhuak tih takah a thiam thiamah an tang leh bawk si! Chutianga a 'che theiho', 'rulling class'-ho chuan kawng engkimah arpa chan an chang a, bazar rate pawh an lei ngamna a zirah a innghat thui khawp ang tih hi research ti hauh lo chunga ka ngaihdan mawlmang ve tak a ni. Ka ngaihdan hi dik lo hulhual se ka ti ngawt mai!

Sum lengvak kan tih chhen pawh hi chu'ng mite kara lengvak chu a ni mai a, midang hi chuan an chawmal thlauh kan lo inchuh ve a ni ber. Chu'ng mite lei ngamna a zirin thil man pawh chu kan chhiar tlangpuiin ka ring. Midang zawng zawngin lo lei ngam lo mah se anni'n an lei ngam phawt chuan a hlawk zawk tho ang. Show room-a thawmhnaw lei thin hi mi tlemte an ni a, mahse, heti lama sumdawnna hi a thang uak uak thei tho.

Thil man a to an tih avanga mirethei an manganna hi a rei tawh, mahse, miretheite mangang thawm chu thutphah dupa hriau tla ang deuh a nia, ri tur a awm lo. Tla teuh mah se a ri thawp sut ringawt tho ang.

Tun hnaiah a to bakah a vang ta a, chu chuan miretheite chauh a nghawng ta lo. 'Rulling class'-a a mawm lo deuhte pawhin buaithlak an ti ve ta hial mai. Tin, thil thenkhat chu a tlem miau avangin pawisa nei tan pawh duhkhawp hmuh tur a awm ta mang lo hrim hrim a, ni tin mamawh thil- electric eng leh eirawngbawlna gas tih vel a'n vang bawk nen, chu'ng thil hrang hrang chu 'thil man a to' tiin kan hmerkhawm ta ni te pawhin ka hria e ka ti. Alu man hi tun hnaia a san hma khan miretheite chuan to an ti daih tawh, chu chuan society a nghawng pha lo mai mai a ni.

Kan chief minister thusawi kha- a van han dik tak em! Economic thlirna atang phei chuan a phurh man tovin thil man a tihto dan tur chu a chiang khawp. Mahse, tuna Mizoram harsatna hi chutiang lam niin a lang lo. Kawngpui tha eltiang pawh nei ila consumer protection lama kan hlawhchham chuan thil man hi chu a to tho ang. Sumdawngte hi Gandhi-a anga rinawm leh miretheite ngaihsak an ni vek te a nih chuan thuhran. Tin, rulling class-ho chauhvin arpa chan an chan chuan, sum lengvak zawng zawng an hauh tlat reng chuan, rulling class-a tel pha ve lote tan chuan thil man a to reng tho ang. Chuvangin, tun dinhmunah chuan, thil man to chungchanga kan harsatna hi chu- inrelbawlna (administration) lama kan hlawhchham vang leh rethei leh hausa kar zauh vang ni zawkin ka ring a, ka ngaihdan hi dik lo hulhual se ka va'n ti em ve aw!

Related Posts :