Chapchar Kut nghakhleltu pitar

¢ Lalhruaitluanga Chawngte

Kum 66 mi a ni a, a hmel en pawhin a uaithla lam a ni tawh tih a hriat ngawih ngawih mai. Chutiang chu ni mah se Chapchar Kut kha a nghakhlel a, khawchhiain a bumro mai ang tih te riau riau a nia a hlauh ni.


A nghahhlelh chhan erawh hlim taka Chapchar Kut hman a thlakhlelh vang a ni lo, hnathawh a duh vang a ni zawk.

Hetia Lammual-a mipui an punkhawm hian a lawm thin, a hlawk tlat. Amah chu VL Thangi Vanchhawng a ni.

Sawiawium ruak a zawng a, a silfai a, chu chu a hralh thin. Chu chu a eizawn vena a ni a, Lammual-a mipui an punkhawm chang hian sawidawium ruak a tam thin avangin chutiang hun chu a nghakhlel thin. Chuvang chu a ni Chapchar Kut pawh a nghahhlelh ni.

Khatia Lammual khat tlata mipui an 'kut' luih luih lai khan Lammual thlang lamah bawlhhlawh a lo hai melh melh a, phurh sen loh khawpa tam saidawium a hmuh avangin a lawm ngang mai.

He hna hi ni tin a thawk hrim hrim a, Thakthing Bazar leh Zemabawk inkar hi a eizawnna hmun chu a ni mai. Bawlhhlawh paihna hmun hi a 'office' ve a ni. Nilengin chutiang chuan a thawk a, a chang chuan zan lamah pawh a bawlhhlawh paihna hmun a fang kual fo. A fan kual loh chang pawhin, chhun lamah hah eng ang mah se zan lamah a awl chuang lo; a saidawium ruak zawnkhawm sa chu a silfai thin.

Tichuan, a silfai hun hunah a chhuahpui leh a, chhun lamah chuan a 'office' vela chettlat a duh avangin zingkara hralh a tul. Hma tak takah a tho a, zan a mu hman meuh lo.

"Ka tlaivar fo mai, zanah hian ka mu meuh lo," VL Thangi, kum 66-mi chuan a ti.

Chuti khawp chuan thawkrim mah se a hna chu a ning lo. Nin chu sawi loh a thawk thei chu vannei a inti zawk.

"He hna hi Pathian min pek a ni, Pathian rem min ruatsak a ni a, hlim takin ka thawk thin," a ti.

"Ka vanneihzia hi, keimah ang rualin hetiang hna hi an thawk thei mang lo ang. Kei chuan ka la thawk thei a nia, ka hriselna a tha tihna a ni a, chu chu malsawmna a ni," a ti bawk.

"Nuam ka ti, hah pawh ka hre hman lo. Pathianin chakna min pe alawm," a ti a, a hnathawk lai biak buai chu a inthlahrunawm khawp mai.

He nu hi nu hrisel tak zawng a ni phawt mai; 2009-ah thla 3 leh ni 15 vel a dam lo a, chu bak chu a dam loh a hre lo. "Ka dam lo ngai lo, Pathian zarah ka hrisel khawp mai," a ti.

Tun hma chuan puan a zuar thin a, mahse, an insawn hnu-ah puan zawrh chu a rem ta lo. Hna thawk lo thei dinhmunah a ding si lo a, saidawium ruak hi a zawng ta thin a ni. Chu hna chu Pathian pekah a ngai a, a lawm em em.

A fapa upa ber hi a chetsual avangin chesawn thei lovin a awm a, chutia awmhmun ngaia thu reng ta chuan TV a awt ta a, saidawium ruak zawnga thawkchhuak thin, a nu chuan a leisak thei mauh mai! An lawm nufa teh asin!

Chutiang chu a ni a, Chapchar Kut te kha nghakhlel lo chi a lo ni hlei nem.

Related Posts :