Tuifinriata thlipui tleh leh tuifawn nasa tak avanga lawng pil taa chuang zinga pakhat chauh chu a damchhuak a. Harsa ti takin mihring awm lohna thliarkar pakhatah hian a hleuh kai hlawl mai.
Chu thliarkarah chuan amah chauhin a cheng a, Pathian hnenah amah chhanchhuak turin nasa takin a dil a. Ni tin hian tuifinriat lamah chuan a hawi kual ruai ruai a, mahse lawng hmuh tur reng reng a awm thin si lo.
A tawpah chuan chau leh beidawng takin lawng keh themte chu a lakhawm a, invenhimna atan leh a thil neih chhun dahthatna atan buk te a sa ta a ni.
Ni khat chu ei tur zawngin a vakchhuak a, tlai lama a haw leh chuan a bukte chu a lo kang hluah mai. A khu chu van lamah a invawrh chho luih luih a, thelh mih rual lohvin a lo kang chhe tawh. A thil neih chhun zawng zawng chu a hmuh reng laiin meivapah a chang zo ta.
A rilru na lutuk chu a kun tlawk tlawk a, "Lalpa, engati nge hetiang te ka chunga i thlentir mai le!" tiin a tap ta hawm hawm a.
A tuk zingah chuan thliarkar pana lawng lian pakhat lo kal thawmin a tiharh hlawl mai. Lawnga chuangte chu amah rawn chhanchhuak tura lo kal an lo ni.
Mak ti takin, "Engtin nge helai hmunah hian ka cheng tih in hriat theih a?" tiin a zawt a. Anni chuan, "Meikhu hmanga i thu thawn kha kan lo hmu alawm," tiin an chhang thung.
Vanduaina emaw kan tih hi kan tana vanneihna a lo ni thei. n
(The Burning Hut tih lehlin a ni - Lalthlamuana Ralte)
No comments:
Post a Comment