BEAUTY RULES

¢ Debbie Chawngthu

1. Sam tan fo hi a tha a, i zuah anih pawhin thlakkhatah vawikhat tal a hmawr paihtir ziah ang che. Hetianga tan thin hian sam a ti tha a, a hmawr kak pawh a awm lo bik a ni.

2. Blusher hman hi hman thiam chuan kan mawipui thei a, hman thiam loh erawh chuan min ti hmelchhetu a ni thei thung. Blusher i hmanin i chal, khabe ah te pawh hnawih rawh. Biang lai chauh hnawi hi chuan a lang natural thei lo thin a ni. Hnar ngul thlaah pawh hnawih thin la, i hmel a lang no sawt ang. Blusher i lei dawnin i vun rawng nena inmil zawng la, tin, i hmai tlang pian azirin hnawihdan pawh thiam tum ang che. Dan naranin khabeah hnawih hian hmai a tilang pial deuh a ni.

3. Vun mawm tak hi chuan moisturiser an mamawh tlem a, mahse vun mawm neih avanga hman miah loh tur tih a ni lo thung. I vun mawm mahse i mit vun velah chuan hnawih regular ang che. Helaiah hian oil gland a awm ve lova, vun a chuar hma bik a ni. Vun mawm nei si, moistuirser chhah tak taka i inhnawih thin chuan arngeng i neih phah teuh mai ang. I mit vun mai nilo, i nghawngah pawh moisturiser hnawih thin ang che.

4. Powder leh thil dang inhnawih lovin awm thei lo ni mah la, a chang chang chuan engmah inhnawih lovin awm thin rawh. I vunah hian kua te reh te te a awm teuh a, chu chuan boruak an mamawh ve tho a, thawk laktir thin ang che.

5. Eyeshadow hi hman thiam chuan mitmeng a tilang nalh thei hle a. Tun hma chuan mitmu rawng ang kher hnawih thin tur angin a lang thin a, mahse tunlaiah chuan chutiang a ni tawh lo thung. Eyeshadow i hman rawng chu i vun rawng mai bakah i kawr rawng mil ni thei se a lang nalh duh phian a, a dum pawh hi hman uar ber pawl a ni.

6. Sam khuih zi leh vawi z khuiah chhuah hi sam tan a tha an ti thin a, mahse suk zin chuan hei hi a tul ber lem lo. Sam khuih nasat lutuk hian sam a tichhe ve thei a, a mam tawk tura khuih mai hi a tha zawk a ni. A nalh i duh chuan sahriak te nena ngun taka enkawl reng mai tur a ni.

7. Tin zuah hi a mawi viau a, mahse zum sei vur mai hi chu a nalh lam aiin tenawm lamah a kal thei thung. Tin nalh tak neih i duh chuan killi deuhin hlep la, chutah a hmawr nawt bial ang che. A nalh mai bakah a tliak hma tur a veng bawk. Kut leh ke tin zuah reng reng chuan a fai leh thianghlimna kha a mawina ber chu a ni zawk fo.

8. Mithmul pawh hi a nalh thei viau a, mahse sin leh ltuka pawh fai hi chu a nalh lem lo thung. Mit a ti meng phar a, mawipui a har khawp mai. I mithmul a to pherh anih chuan pawt la, zan i mut hmain petroleum jelly hnawih ziah la, khuih thin rawh. Hetiang i tih ngun peih chuan reiloteah mithmul nalh tk i nei thei ang.

9. Sam bu tam hi nalh mashe a pu tu tan buaipui awm chin a awm a. A sei viau leh enkawl a buaithlak a, tan tawi hi a mawi mah zawk a ni. Tunlaiah chuan sam tan dan te an thiam tawh viau a, sam bu tam pawh inchhawng nalh takin an tan a, an inhme viau zel a ni.

10. Lipstick hnawih hnua lehkha nema nem leh hi tha bawk mahse lipstick rawng pangngai a tireh a, a tle chi phei chu a tletna a tireh a, chuvangin blot loh pawh a pawi lo. Lipstick hi a tlangpuiin a ban tawh a, a ngai ngaia put mai pawh hi a pawi loh nachen a awm.

11. Lash curler a mithmul han cheh er tan mai hi chuan mitmeng a ti mawi bik riau mai a. Mahse mithmul cheh er dan hi thiam a ngai a ni. Thiam loh chuan mithmul cheh thlak teuh a awl a, a na bawk ani. I mit hmul i cheh erin reitak chep lo la, a reiberah second sawm chep ang che. Mascara i hmang anih chuan mascara i hnawih hmain chep er la, i hnawih hnua i cheh chuan i mithmul a chhiat phah ang.

12. Mithmul awmsa pangngai hi kan nalhpui ber a, i mithmul i pawt duh anih pawhin a chunglam hi chu pawt ve reng reng suh. A hnuai lam hi pawt fai la, a lang natural ang. Tam tak pawh teuha a hnua rin belh leh vak te hi nalhpui a har em em a, a hmanlai tawh bawk.

13. Conditioner hman hi kan uar ve ta hle a, mashe sam sin, zawi leh nem tak nei sa tan chuan hmanloh a pawi lo thung. Sam a phirsi a, a chhe viau anih loh chuan conditioner hi karkhatah vawikhat hman a tawk.

14. Fragrance/perfume te hi hman chintawk hriat loh chuan lu a tihnat bakah bul ami te tan a hrehawm ve thei a, hman chintawk hriat a tha. Perfume hrang hrang i neih chuan tlemte tein han pawlh chhin la, rimtui dangdai tak a rawn chhuak ve thei.

15. Sahbawnah hian al a tam hlawm a, vun ro i neih chuan sahbawn hmang lovin cleansing milk/cream hmang zawk rawh. Hei hi vun ro nei tan kher nilo, kum upa lam tan pawh a tha zawk a ni.