BEAUTY - APPLYING MAKE-UP

¢ Debbie Chawngthu

Make-up hi hman thiam inti viau mah ila kan lo thiam tawk tak tak lo fo thin. Hmanhmawha inchei phei chuan a nalh duh lo viau va, hun thawl tak neia inchei nen chuan a dang viau thei a ni.

Foundation mahni vun rawng aia lar emaw thim emaw hman hi a nalh mawh viau va, mahni vun rawng mil hman a dik ber a ni. I vun rawng lo i hnawih chuan i inchei nalh thei lovang. Mascara hman hi mitmeng tinalhtu pakhat a ni a, mahse hnawih dan hriat loh chuan mithmul tihchhiatna a ni. I mithmul i chep er anih chuan masacara i hnawih hmain chep er ang che. I hnawih hnua i cheh chuan i mithmul a bung teuh mai ang. Moisturiser hman that zia kan sawo fo tawh a, hei pawh hi foundation hnawih hmaa hnawih ngei tur a ni. Mahse foundation i hnawih hmain i moisturiser inhnawwih kha a ro hman tur a ni. A ro hmaa i hnawih hnan mai chuan i hmai hnawih a rual thei lovang.

Lipstick hnawih pawh hi a thiam chuan an hmui nalh takin a tilang thei a, hmui lian leh te pawh a tih danglam theih a. I hmuui a te lutuk anih chuan lipstick i hnawih hmain lipliner in a zir i hmui pangngai aia zau hretin line zar zar la, chumi chhungah chuan lipstick hnawih ang che. Eyeshadow hnawih pawh hi inhmeh zawng rawng thlan thiam a tul khawp mai. Concealer hman turte pawh a awm tam tawh a, hei pawh hi a rawng thlang thiam a tul khawp mai. Mahni vun rawng nilova vun chuar vel thup tum chu awmzia a awm lem lova, a ti langsar zawk mai mai a ni.

Mit vun vel dum tan chuan mit hnawih rawng uk lampang hman loh a tha a, a chhan chu mit vun dum a ti langsar a ni. Moisturiser hi a tha em em a, mahse inhnawih tawk hriat a tha a. A lutuka hnawih chuan make-up hnawih a nalh thei miah lova, hmai a ti tle hlurh mai a ni. Vun mawm i neia moisturiser i hmang duh si anih chuan a mawm lutuk lo chi hi pan tein inhnawih thin ang che. Tin, vun ro nei tan pawh hnawih tam lutuk a tul chuang lova, a hek mai mai a ni. A mawm tak chi chu zan mut dawnah hnawih ila, make-up hnuaiah chuan a mawm lutuk lo chi hnawihin make-up hnawih a nalh duh a, a awh rei duh bawk.

Tarmit bun te hian an mit chei hi an uluk lo fova, a lang lem lova an hriat vang a ni mai thei. Mahse tarmit bun chunga mit ngun taka chei hi a lang nalh thei em em tho tih hriat tur a ni. Tarmit bun tih vanga make-up thlahdah chu a tha lemlo. Mithmul pawh hian mitmeng a ti nalh thei viau va, mahse sin lutuka pawh hi chu a hmanlai tlat tawh mai. Tunlaiah chuan lang natural thei ang ber hi kan duh tawh hlawm a, chuvangin, i mithmul i pawt anih pawhin a to pangngai thei ang bera lantir tum ang che.

Eyeliner hnawih nasat hian mitmeng a tilang te tlat a, mitmeng te sa tan chuan a nalh har duh angreng khawp mai. I mitmeng tilang nalh leh tilang lian tur chuan pan tein hnawih reih la, a mawi zawk a ni. Lipstick hnawih hian mi a ti inchei hle a, thil dang inhnawih zo vek mah ila, lipstick hnawih hma chu kan inchei a kim thei thin lo. Mahse lipstick pawh hi hnawih chintawk neih a tha khawp mai. A alh thei ang tih hlauhawm khawpa sen hnawih hi chu a nalh lutuk lemlo. Hetah pawh hian a hun leh mhun thliar thiam a tul hle. Lip-gloss hman hian hmui a tilang nalh duh viau va, mahse hei pawh hi hnawih nasat lutuk tur a ni lo. La naupang lam i nih chuan lipstick rawng lar tak hmang lo la, a tilang 'senior' ang che. A sen tak i hman chuan i mit lam ti dal leh euh zawk la. I inchei reng rengin eng tha tak hnuaiah chauh inchei thin rawh. Eng tha mang lo hnuaiah chuan duh angin i inchei nalh thei lovang.


Q&A

Q. Kum 16 chauh ka ni a, mahse ka sam hi a tlemin luphut ka nei bawk a. Karkhatah vawihnih coconut oil in ka nuai ziah a, herbal shampoo hmangin ka su bawk a. Mahse mi sawi danin shampoo hman nasat lutuk hiam sam a tichhe thei an ti a. Eng shampoo nge ka hman ang? Engtinnge ka luphut ka tihreh ang?

= Coconut oil hmanga i nuai thin chu lo chhunzawm zel ang che. Shampoo hman nasat lutuk hi chu thil awm zen zen a ni lova, i suk apianga hman a pawi lo. Luphut i neih avangin shampoo i hman pawhin anti-dandruff shampoo lo hmang tel la, karkhatah conditioner vawikhat lo hmang tel bawk ang che. Conditioner hian i sam a ti tle in a ti nem ang. Anti-dandruff shampoo i hman pawha i luphut a reh mai lo anih chuan chhuak hmasaa luphut enkawl dan kan rawn tarlan tawh te kha lo bihchiang leh ang.

Related Posts :