Bamboo Dance-ah World Record

Mizoram sorkarin Bamboo dance-ah world record siam a tum a, a ngaisang lote'n sawisel viau mah se ruahman danin inbuatsaihna engkim a kal zel. A hun a thleng dawn ta.

'Bamboo Dance'-ah hian Mizoram sorkar chuan Guinness World Records siam a tum a, art and culture deptt.-in an thawk a ni. Guinness world records hotu pakhat chu March ni 10-ah hian hemi atana Aizawl rawn thleng tura beisei a ni.

'Bamboo Dance'-ah world record siam a nih hian, Mizo hnam lam pakhat- Cheraw kan tur a ni a, he thu buatsaih lai hian a huaihawttute chuan Cheraw kan tur hi bu 670 vel an awm tawh tih an sawi.

"A zat chiah hi kan la chiang thei lo a, bu 670 vel chu awm tawh. Tin, midang pawh an awm belh zel a rinawm a, kan beisei aia tam an awm dawn niin a lang," tiin art & culture director Boichhingpuii chuan Zozam Weekly a hrilh.

Cheraw-ah chuan bu 1-ah mi 16 zel an awm a, bu 670-ah chuan mi 10720 an awm dawn tihna a ni.

"A tirah kha chuan mi 5000/6000 vel kan beisei a, kan beisei aiin mi an lo phur a, kan beisei aia tamin an kan dawn a nih hmel. Hei hi kan lawm khawp mai a, a kantu an tam poh leh midang tan kan record khum a har dawn tihna a ni mai a," art & culture director chuan a ti.

Bamboo Dance-ah hian world record ding lai a awm lo. Mahse, Guinness World Records hotute hian bu 200 tal a tlin loh chuan an pawm thei lo a, Mizoram sorkar chuan chu chu hre chungin record siam a tum ta a ni.

Chanchinbu lamah Bamboo Dance hmanga world record siam tum chungchang hian sawi a hlawh hle a, a pawm lo lam leh tul ti lo lamin thawm an nei hle. 'Bamboo Dance' hming a pu tur hi a tul ti lo lamin an duh loh ber pakhat chu niin a lang.

Art & culture director Boichhingpuii chuan hemi chungchang hi sawiin, "Cheraw a bo dawn tihna a ni lo, Cheraw tihlarna tur zawk a ni," a ti.

"Hnam dangin Cheraw an nei lo a, chuvangin world record a siam theih loh a. Amaherawhchu, hnam hrang hrangin Bamboo Dance an nei a, chutah chuan Cheraw hmangin record siam kan tum ta a ni. Cheraw a bo dawn tihna a ni lo a, Bamboo Dance-ah Cheraw kan entir dawn tihna a ni. Guinness World Records lam pawhin Cheraw hi an pawm a, Bamboo Dance tih leh Cheraw tih hian an sawi ve ve. Cheraw tihlar tumna zawk a ni," a ti bawk.

Art and culture minister PC Zoram Sangliana chuan: "Khawvel hriata kan inphochhuahna tur thil a ni a, khawvelin kan hnam leh kan hnam lam a hriatna tura tih a ni," tiin Zozam Weekly a hrilh.

A hminga buai an awm chungchanga zawhna chhangin, "A hmingah buai tur a ni lo a, Cheraw a thi dawn tihna a ni hek lo. A huhovin Cheraw kan kan dawn tihna a ni tih hi hre tlang ila ka duh khawp mai," a ti.

"Mizovin 'kut' kan tia, sapin 'hand' an ti thung a, chutiang chu a ni mai. Cheraw hi a awm tawh dawn lo tihna a ni lo," a ti bawk.

Sawisel leh pawm lo an awm tih sawiin, hei hi mak a ti lo tih a sawi.

"Mihring kan ni a, ngaihdan a inang vek thei lo. Mi zaa zain an pawm thil a awm thei lo a, chuvangin hetia record siam kan tum mi thenkhatin an lo sawisel a nih pawhin mak ka ti lo. Amaherawhchu, a sawiseltute hian thil hriat fuh loh an nei a ni mai thei," a ti.

"Kan hnam lam chawilar kan tum a, Pathianin Mizo-ah min siam a, lam mawi tak- Cheraw min pe a, chu chu khawvelin a hriat lar theih nan khawvel hmuh theih tura chawilar kan tum a ni. Hnam dangin Cheraw an neih loh avangin Cheraw tih hming pu chuan world record a siam theih loh a, Bamboo Dance hming put a ngai ta a, chutah chuan Cheraw kan kan dawn a ni. Cheraw a bo dawn lo," a ti bawk.

"Kei tehlulin hetiang thil ka buaipui thei hi ka lawm a, ka theih vang leh thiam vang a ni lo, ka hun tawng nen a innang mai a ni. Chuvangin hetiang hun ka tawng hi ka lawm khawp mai," a ti nghe nghe.

'Bamboo Dance'-a world record siam tul ti lo langsar tak pakhat chu M Lalmanzuala a ni. Ani hian chanchinbu hrang hrangah Bamboo Dance-a world record siam tul a tih loh thu a puangzar tawh a, tun hnaiah art & culture minister hi open letter a thawn leh bawk.

Hemi chungchanga zawhna chhangin art & culture minister chuan: "Mizo pa chhuanawm, kan pa ropuiin kei tehlul open letter min thawn hi ka tan chuan lawmawm ka ti a, Pu Manzuala meuhin hetianga open letter min thawn hi ka inchhuan phah khawp asin," a ti.

"A sawisel an awm a, Pu Manzuala pawhin a pawm lo a. Hetianga rilru an lo seng hi lawmawm ka ti a, an thu leh hlate hi min tibengvartu a ni. A hminga minister ka nihnaah pawh a sawiseltute leh ngaihtuahna lo sengtute chungah hian lawmthu ka sawi duh. Amaherawhchu, ka sawi nawn duh chu- khawvel hriat tham khawpa kan hnam leh kan hnam lam chawi lar tumin world record siam kan tum a ni tih hi mipui hian hria se ka duh a, tin, Cheraw a bo dawn tihna a ni lo bawk tih hi hria se ka duh," a ti.

Bamboo dance-a world record siam tum a nih hian hmun hrang hrangah mi hrang hrangin Cheraw an zir nghal a, Cheraw kan laia mipa leh hmeichhe inthuamnate chu Aizawlah lei tur a vang sawt tih thu dawn a ni. Tin, a awmchhun pawh hmun thenkhatah chuan a to sawt tih thu dawn a ni bawk.