Aizawl Art Gallery neitu Laltanpuia pawhin nikumah khan Zawlkhawpui senmei chan ni hi a lem a ziak a, 2009 December thla tir lama Bangalore-a Renaissance Art Gallery-a 'From the Pallete of a Zopa' tih thupui hmanga Solo Exhibition a neihah pawh he lemziak hi a pholang nghe nghe.
'1966- Bombing of Aizawl by the Indian Government' tia a vuah, he lemziak hian Bangalore-ah hian ngaihven a hlawh hle.
"Zalenna kan sual tawh thu ka sawi a, zalenna kan sual laia Aizawl beih a nih dan te, mahni tualchhung buainaah jet fighter hman a nih thu te ka'n sawi chuan an beng a verh hle a, 'national level-a hriat hlawh artist chu ni la Delhi-a National Art Gallery of Modern Art-ah hei hi chu dah tlak a nih hi, thil hriat reng tlak a ni' ti tein an sawi," Tanpuia chuan a ti.
"Vawi hnih ka hlawhchham hnu-ah a vawi thumnaa ka puitlin a ni a, kan hnam nuna thil pawimawh hi thangtharte tan lemziak hmanga hnutchhiah ve ngei ka duh vanga ka ziah a ni. Realistic zawng chuan a ziah theih mai ang a, mahse, abstract hmanga ziah ka duh si a, har ka ti khawp mai. Hetia hnam dangin an lo ngaihlu hi ka lawm khawp mai," a ti.
Abstract painting tih takah, bomb thlaktu-ah hian thlawhna a hmang ve lo a, mulukawlh zawk a hmang. Mulukawlh chu sa hel ei chi a ni. Sikul naupang pakhat, thlabar taka tlanchhe lai a lang; naupang hi 'art'-ah chuan pawisawi lo 'symbol' a ni. A sir vel te chu a alh hluah hluah a.
No comments:
Post a Comment