YMA President-ah Hmeithai

“Sairang Branch YMA president atana thlan tur zinga nomination-ah ka tel tih min rawn hrilh tirh chuan ka mangang lutuk a. Ka zak bawk si. Kei hmeithai, kum lamah ni se kum 60 chuang fe tawh, YMA president ni tur chuan ni thei thlawtin ka hre lo a," tiin Sairang YMA president chuan a chanchin a sawi.


"Ka tawngtai a. Hnial fithlak hmawk ka duh, mahse Pathian remruat a ni ang e, min thlang tling zui ta tho mai si a,” Teresa Rothangpuii, 2010 atana Sairang Branch YMA president chuan a ti.

YMA president atan chuan mipa, pa valai deuh thlan a ni tlangpui. Teresa Rothangpuii erawh hmeichhia a ni a, kum lamah pawh kum 63 mi a ni tawh. Zirna lamah pawh zir sang a ni lo. High school a rap awrh chauh.

Sihfa khaw lam chhuak a ni a, 1966 khan James Manhlira (L) nen inneiin, fanu pathum leh fapa pahnih an nei. Sairang-ah hian an hlun ve ta hle.

A pasal hian 1996 khan a thih san. A fanu pakhat Sister Madinia Rochungnungi chu Kolkata-a Missioneries of Charity-ah (Mother Teresa hmunpui) rawngtbawlin a awm.

Amah hi khawtlang rawngbawlna lama tui leh inhmang mi a ni hrim hrim tih chu a nihna lo chelh tawhte atang hian a chiang mai awm e. Sairang Branch MHIP-ah 1981-1983, 1989-1999 khan secretary a lo ni a, 1994-1996, 1997, 1998 leh 1999-ahte khan Joint YMA treasurer, vice president leh president nihna te a lo chelh tawh bawk.

2002 atang khan Consumers' Union lamah a inhmang a, 2009 thleng khan president, vice President, treasuer leh secretary nihna te a lo chelh a ni. Tunah pawh hian consumer pawl hruaitu pawimawh a la ni.

Sairang-ah Civil Pensioners' Union secretary a ni a, Hmeithai Association president a ni a, Upa Pawl treasuer ni bawkin, YMA president nihna nen he'ng hi a kawp mek.

"President atana min thlan hnuah YMA president tih tur niin ka hria a, thlan laihnaah ka kal a. Tlangval-hovin 'ka pi, nang chu lo va haw rawh' min ti a. Ka haw mai duh bik si lo a, a nuihzatthlak duh ang reng khawp mai," tiin Zozam Weekly a hrilh.

"Kristian ram kan ni a. Kan society hi Kristian society a ni a. Chuvangin khawtlang rawngbawlnaah pawh hian Kohhran te hi an pawimawh em em a. Chuvangin kan committee leh thil tihah pawh Kohhrana rawngtbawltu hrang hrang te'n hmun pawimawh an chang tur a ni a. Presbyterian pastor te, Baptist pastor te leh UPC hruaitu te, an zavai hian min uap turin kan sawm zel tur a ni,” a ti a, an tel lovin khawtlang a kal thei lo tih chu a ngaihdan a ni.

Midangte tana inhman duh mi Teresa Rothangpuii hi kum 60 chuang ni tawh mah se a la thalaiin a tha pawh a la tha hle.

"Zanlaia tan awm a, kei pitar torchlight nena mitthi in lam pana ka han kal chu, ka han hawi let a, ka mutna room eng pap mai chu a uihawm duh khawp mai," a ti.