Kan tunlai hunah hia Mizo tlangval fel nih hi a har lem lo khawp mai; Kohhran leh khawtlangah thuk taka an inhmang peih lo a nih pawhin a mawi tawkin lang ve se, zu in lo se, an in a nih pawhin mi hmuhah rui bung bung lo se, chutianga awm chuan, chhungkaw rilru tihahtu leh tihmingchhetu nih loh chuan, tlangval fel a nih theih mai. Nula fel nih pawh chutiang vela awlsam chu a ni ve tho e.
Hmanlai, kan pi leh pute hun lai kha chuan nula/tlangval fel nih kha a hautak khawpin a lang. Hnathawhnaah emaw, ramvahnaah emaw, kut ni vangthlaah emaw, an 'activity' hrang hrangah khan min thlen bak thlen a ngai a, hrehawm tawrh zek te pawh a ngai.
Thil a lo dang a, kan tehkhawng a dang ta niin a lang.
Nula/tlangval fel ni tura kan tehkhawng chang a dang lo, ram inrelbawlnaah te, society than zelna kawngah te, eizawnnaah te, thil hrang hrangah kan tehkhawng a dang ta a, chu chuan kan nun pawh a nghawng khawp mai.
Kan tehkhawng pui ber chu Kristianna hi a ni awm e.
Eng pawh sawiin eng pawh ruahman ila, 'Kristian ram tih awm reng a ni em?' tiin kan inzawt chat zel. Zu kan khap chhan te pawh hi, a bul berah chuan "Kristian ram kan nih vang" ni berin a lang.
Kristian ramah kan inchhal a, kan sawi uar chang phei chuan khawvela Kristian ram awmchhun ni hialin kan insawi thin. Politics-ah te, society thilah te, thil siamna hmun din chungchangah te, tin, painting lamah thlengin, thil zawng zawngah hian a tawpah chuan "Kristian ram" hmang hian kan inteh deuh zel mai.
Cancer dona lamah pawh chief minister berin "Kristian ram" tih tawngkam a hmang nawn awn awn a, zuk leh hmuam dona lamah ni se chuti bawk. Tunlaia khawvel tibuaitu, AIDS meuh pawh "Kristian ram kan ni si a" ti chungin kan do a, a tehkhawngah pawh kan hmang zui ta nghe nghe.
Tichuan, AIDS donan khawvelin condom a sem a, chu chu "Kristian ram"-ah a tih ve chi em tih thu-ah ngaihdan a inkhuangrual ta lo.
Khawvel mite chuan mipat hmeichhiatna lamah serh leh sang an nei lo a, Kristiante tan erawh nupa nun pawn lama hman chu sual a ni. Mizorama AIDS natna hrik tihluartu ber chu mipat hmeichhiatna a ni a, chuti a nih chuan condom hmang tura inhrilh a ngai tihna a ni. Mahse, Mizoram hi Kristian ram a nih chuan condom hmang tura inhrilh chu a ngai awm si lo.
Engpawhnise, "Kristian ram"-ah mipat hmeichhiatna lama pawisak nei lo leh insum thei lo an tam tihna a nih chu! Kristian ramah chutiang chu a awm thei em? Nge, Mizoram hi Kristian ram a ni lo zawk?
Kan tehkhawng hi a dik nge dik lo tih hriat a tul a, hming ziahna bu-a hming ziahluh hi Kristian leh 'tian lo tehnana hman chi a ni em tih te leh mi ramin chutiang chu an hnam nun leh sakhaw nun sawi nan leh teh nan an hmang ve em tih te pawh hriat a tul khawp mai.
Condom chungchangah chang lo, fel leh fel lo tehnaah te, hlawhtlinna kan tehnaah te, thil hrang hrangah tehkhawng dik leh tha kan mamawh khawp mai. Tuikhuah te, thlawhna tumhmun te, rel te, sum hmanga neih theih thil aiin kan hnam hian tehkhawng dik kan mamawh zawk a, chu chu kan 'moral' leh 'value system' siamthatna tur pawh a ni. Chu chu kan hnam tan a tul.
Monday, February 8, 2010
Tehkhawng dik kan mamawh
Subscribe to:
Post Comments (Atom)
A va dik em!! Mizo-te hian kemahni pual philosopher kan mamawh takzet tawh a ni. Kan ngaihdan mai mai chuan Kristian philosophy ringawt hi chuan Mizo-te mamawh zawng zawng hi a phuhruk zo lo deuh chu a ni; a ruk takin kan kham khawp lo va, kan nitin nun min vawng zo lo va, kan hmalam hun tlir thiam dan min pe vek bawk hek lo.
ReplyDeleteKristianna hlamchhiah chiah si lovin, Natural philosophy eng emaw dang kan mamawh bon thruai!!
Ni e, thil reng reng hi a teh tu a zir kan han ti bawk thin a. Tehfung pangngai hi mizo te hian kan zir thiam a ngai khawp mai. Khawlai leng aiin lenglo a ina awm kha fel kan va ti a, hna a thawh chuan loh chuan enge a felna tur bik chuan le.
ReplyDelete