Mizoram Bru Displaced People's Forum (MBDPF) chu an pawl vice president R Laldawngliana, Mizoram Police te'n an man avangin an lungawi lo hle a, an lungawi loh thu hi union home minister hnenah an thlen a ni.
Mizoram Police te'n R Laldawngliana an man avanga lungawi lovin January ni 24-ah Tuikuk-ho hian kawng an zawh a, Naisingpara atanga Asapara thlengin kawng an zawh a, Asapara atang hian Naisingpara-ah an zawh let leh a ni. An hruaitute chuan mi 8000 vel niin an inchhal.
Resolution 4 an pass a, chu'ng chu union home minister P Chidambaram hnenah a tukah an thlen a ni.
Ni 25 tlaiah Kanchanpur SDM an hmu a, home minister hnena an lehkha thehluh tur chu SDM hnenah hian thlenin, SDM chuan fax-in a lo thawnsak niin MBDPF president Elvis Chorkhy chuan a sawi.
"Kan resolution palite hi home minister hnena kan lehkhathawnah chuan kan ziak a, Pu Dawnga man a nih dan, public leader meuh hetia an man avanga kan lungawi lohna te, inbiak zawh hlima Pu Dawnga an man mai chu tidik lo kan tih thu te kan ziak a, kan chungchanga hmala turin kan ngen a ni," tiin an lehkha thehluh chungchang a sawi.
"Pu Dawnga hi public leader, mipui aiawha Mizoram sorkar betute zinga mi a ni a, hel pawl-a mi ang maia Mizoram Police te'n an man hi mak kan tih thu leh a rang thei ang bera hma min laksak tura kan ngenna te kan ziak. Inbiaknaa tel hetia an man hi Mizoram sorkar hian an tidik lo hulhual tiin kan thlen a ni," a ti bawk.
A thawhpui, R Laldawngliana chu Zarzokima thihnaah a inrawlh a ring lo nia sawiin, "Zarzokima kha ni 13-ah a thi a, khami ni khan Mamit DC chuan min tlawh turin Zawlnuam BDO a rawn tir a, Pu Dawnga te nen hian Zawlnuam BDO hi kan lo kawm a ni. BDO kan kawm lai hian Zarzokima vanduaina hi kan hre lo reng reng," Elvis Chorkhy chuan a ti.
"MBDPF chu tharum thawh ngai lo kan ni a, Gandhi-a anga tharum hmang lova thawk thin kan ni... Chuvangin tualthahnaah Pu Dawnga hi a inrawlh ka ring lo hulhual," a ti bawk.
R Laldawngliana hian fa 4 a nei a, pawl 12 thleng lehkha a zir nia hriat a ni.
Zarzokima thihnaah hian Tuikuk hruaitu lawkte an inrawlh ngei rin a ni na a, Elvis Chorkhy tak hi chu a inrawlh lo nia sawi a ni.
Hetih lai hian MZP chuan nimin khan thuchhuah siamin, Zarzokima thih thua rinhlelh Mizoram Bru Displaced People's Forum vice president R. Laldawngliana man a nih avanga Tuikuk te'n kawng an zawh ve ngawt chu awm lo an tih thu an sawi.
"Tualthattu nia rin man kawngah thuneitute kut tichak zawng lova hmalakna an nei chuan Zarzokima thattu chhuichhuah an duh tak tak lohzia a pholang chiang hleah kan ngai a, he tualthahnaah hian MBDPF hruaitute hi an inhnamhnawihzia a ti rinawm lehzual a ni," a ti.
No comments:
Post a Comment