Sikkim-ah Manipal University Hmelhriat Turin

¢ David M Thangliana

January thla laihawl vel khan Kolkata atangin telephone hian min rawn bia a, Sikkim-a Manipal University-in campus pahnih an neih tlawh tura ka kal duh leh duh loh min rawn zawt a. Telephone-a inbiak a harsat avangin email hmanga lekha min rawn thawn turin ka ti a, chumi atang chuan email kaltlangin kan inbe chho ta a. Min rawn betu kha Integrated Brand Comm Pvt Ltd, ‘brand-comm’ tia lam tawi, company lian te tana public relations buaipuitu a thawk a lo ni a, Delhi-a hmunpui nei an ni. Kal man engkim an tum tur thu leh Sikkim Manipal University hmelhriat tirna, ‘familiarization tour’ an tih, journalist-te tana an buatsaih a nih thu min rawn hriattir a. February ni 3 atanga ni 6 thleng tur a ni. Mizoramah learning centre-te Manipal University hian a rawn hawn ve tak avang leh he University hi hriat chian tula ka hriat avangin an sawmna chu ka pawm a, February ni 2, 2010 khan Kolkata panin Aizawl ka chhuahsan ta a ni.

A tuk February ni 3 chuan Bagdogra, North Bengal pan turin Mizoram House atangin Netaji Subhash Chandra Bose Airport, Kolkata panin zing dar 10-ah ka chhuak a. Min rawn betu hmeichhia kha kal ve tur a nih avangin airport atang chuan a mobile phone-ah ka phone a. Security enclosure-a an awm tawh thu min hrilh chuan kei pawh chu security enclosure lamah chuan lutin heta tang hian kan in-phone leh ta a. Hmel la inhre tawn lo kan nih avangin kan kawr hak rawng te leh kan awmna laite kan han inhrilh a, ka awmna atanga feet 4 vel leka hla-ah chuan a lo awm niin. Bengali nula fel tak, Tulika Roy chu a pian tirh (hei hi a hnu-a min hrilh a ni) atanga fuke kim lo a lo ni a, chibai ka'n tum ngawt a, a ban dinglam chu a kiu hnuai deuh atang hian a lo bul a, ka hrilhhai ang reng khawp mai.

Tulika chuan ka kalpui turte thutna lamah min hruaiin Bombay-te, Hyderabad-te, Bangalore-te leh Kolkata atanga journalist-te chu min han hmelhriat tir a. Anni bakah Bagdogra-ah Delhi, Guwahati leh Meghalaya atanga journalist-te an awmna hmun theuh atanga rawn thlawkte nen kan intawhkhawm tur thu min hrilh a, kan vai chuan 20 kan ni dawn a ni. Bagdogra chu tluang takin kan thleng a, Delhi atanga rawn thlawkte chuan min lo nghak tawh a. Guwahati leh Meghalaya atanga rawn kal turte an la rawn thlen ve loh avangin thingpui in pahin airport-ah chuan kan lo nghak a, min hruaitu ber chu Barid Baran, brand-comm a Media Head North & East a ni. Thiante an lo thlen kim hnu chuan airport pawna Sikkim Manipal University (SMU) bus min lo nghaktu-ah chuan kan lut a, by-road in Sikkim khawpui Gangtok kan pan ta a ni. Mizoram anga ram chhengchhe ve tak hi a ni a, mahse a awmna a san zawk avangin Sikkim hrim hrim hi Mizoram aiin a vawt zawk a, Gongtok phei chu vawt tak ala ni. Zan dar 8-a han thlen chu a vawt duh hle na-in kan thlenna, Hotel Tibet a thawk-te leh SMU a thawkte chuan hlim hmel tak leh VIP taka min lo hmuah vangin vawt pawh chu kan hrechang lo tlang niin ka hria. Room hran theuhah thlengin mahni room-a kan in phihfai hnu chuan zanriah kil turin dining hall-ah kan inhmukhawm leh ta vek a, zanriah kan eifel meuh chuan zan dar 10 alo ri der tawh a ni. Newspaper lian tak tak, Times of India te, Hindustan Times te leh Telegraph, Amrita Bazar Patrika te bakah regional newspaper leh local newspaper aiawh te kan ni hlawm a, vawikhat inhmelhriatna mah nise journalist kan nih vek avangin kan innel nghal a, a nuam hle a ni.

Kan thlen tuk February ni 4 chu sightseeing leh shopping tihna hun atan min lo ruahman sak avangin hemi ni hi chu intihhlim nan kan hmang a ni ber a, kan thupui piahlam deuh a nih avangin hemi ni kan hman dan hi chu ziak tel lo mai ila. Pi leh pu hunlaia India rama khawsa leh China/Tibet-a khawsa indawr tawnna, Old Silk Route an tiha Nathula Pass tlawhna tur phalna (helai hmun hi India leh Tibet/China ramri anih avangin sipai enkawlna hnuai a awm a ni) kan neih loh avangin kan tlawh thei lo a, mahse Nathula Pass hnuai maia awm, Baba Mandir erawh kan tlawh tih han zep tel hram ila.

Sikkim Manipal University hian Gangtok-a an campus-ah hian Medical Science lam an zirtir a, MBBS leh BSc (Nursing) zirna a awm ani. He campus hi an vice chancellor Brig (Dr) S.S. Pabla in a awp a, distance learning, Distance Education an tih mah (tuna Aizawla Learning Centre an tih ang) enkawlna hmunpui ber a ni bawk. Heta an director chu sipai pension tho Gen. T. Bhakshi a ni. He campus-ah hian a tuk February ni 5 chuan SMU hotute nen inkawm hona hun hlimawm tak kan nei a, mahse Siliguri (he khua hi Bagdogra nena inzawm titih a ni) ah tiamchin awm lo bandh (strike) kan haw ni tur February ni 6 atanga Gorkhaland chungchanga neih a nih dawn avangin kan programme pawh kan kaitawi ta ringawt a, haw lamah Rangpo-a an campus pakhat zawk, Sikkim Manipal Institute of Technology an tih, engineering college awmna chu kan tlawh leh hram a ni.

SMU hi public private partnership ni turin 1995 khan Manipal University nena inberemin Sikkim sorkar chuan Legislative Act-a alo din a ni a. Manipal University erawh chu 1947 daih tawh khan Manipal, Karnataka ah Dr TMA Pai-a din niin University Grants Commission-in Deemed University-a a pawm hmasak ber a ni a, 1956 khan Deemed University angin alo pawm tawh a, tun thleng hian he nihna hi ala chelh a ni.

SMU Medical College hian seat 50 chauh ala nei a, 150 nei thei tura hmalak mek a nih thu VC S.S. Pabla hian min hrilh a. Seat 50-ah hian 20% chu Sikkim-in a hauh a, 15% chu hmarchhak state te tan dah hran a ni bawk. He College hian doctor zirte tan Central Referral Hospital a nei a, he damdawiin tan hian Sikkim sorkar chuan kumtin cheng vbc 2.5 a pe thin a ni.

Sikkim Manipal Institute of Technology, Rangpo hi sawi tawh angin engineering college a ni a, engineering line hrang hrang zir theihna hmun a ni a, Rangpo Campus hi Gangtok campus aiin a lian fe zawk a, zirlai pawh an thahnem hle a, mipa leh hmeichhia te’n campus chungah hian hostel an nei hrang ve ve a ni. Hostel room khatah zel pahnih an awm a, zirlai tan pawh hostel hi a nuam thawkhat viau a ni.

Manipal University hrim hrim hian Distance Education (distance learning an tih bawk, inlama zir theihna, correspondence course kan tih mai thin) hi a uar hle a, distance learning centre hi 880 vel India ram pumah a nei a, an duhtui em avangin an duhthusam lo 40 tunah hian an khar tawh a ni. Distance Learning Centre-te hian Manipal University-in zirlaite tana a buatsaih EduNxt programme an tih an zir theih nan computer engemaw zat an nei tur a ni a, University-in fee an tuk zat bak engmah an dil belh lo tur a ni. Meghalaya atanga lo kal journalist pakhat chuan Shillong-a Distance Learning Centre chuan University-in a tuk bak fee eng engemaw an lak thu a sawi chuan SMU hotute beng a verh hle mai a, endik nghal an tum thu an sawi a ni. Ralkhat atanga zir zirlaite tana information technology awlsam zawka an hman tangkai theih nan computer siamtu company Acer nen thil an tih ho mek thu SMU hotute hian an sawi a, 30% laia tlawm a laptop te chi, Netbook an tih lei theih dan zirlaite ngaihtuah sak mek an nih thu sawiin internet pawhna tur pawh BSNL nen tangkawpin ruahman an neih mek thu an sawi a, BSNL Broadband pawh nan kum khata Rs 380 chauh chawia duh tawka zirlaite’n internet an hman theihna turin BSNL nen thawhho an tum thu an sawi bawk a ni.

Manipal University hi ri nai takin an lo inzarpharh a. SMU hotute sawi hi a dik a nih chuan Nepal, Thailand leh Singapore-ah te pawh Centre hi an nei a. Hemi bakah hian International University engemawzat nen tangkawpin an zirlai tam zawkte chuan company lian tak tak, IBM, CTS, Infosys, Wipro, Mahindra, HCL, Genpact etc.ah te hna an hmu tawh a ni.

SMU hotute hian hmalakna an neih mek pakhat an sawi chu lehkha zir sang lo te tana an thiam thil tih puitlin sak a ni a, chu chu Skill Development for Dropouts an ti a. Heta certificate an dawn te hi ram 148-ah pawm a ni, an ti.

Scholarship pawh an neih ve thu sawiin heng scholarship te erawh chu Hmarchhak state a zirlaite tan bik a dahhran a nih thu SMU hotute chuan an sawi a, scholarship an pek theih zat chiah erawh an sawi duh lem lo. Private University a nih avangin fee pawh an la sang tih sawiin fee sang erawh chu zirtirna an pek leh zirlaite tana hamthatna chi hrang hrang an ruahmansak ten en a inhen viau nia an hriat thu VC Pabla hian min hrilh.