Bishop Thilpek

Kohhran pakhat ngui tak mai hi a awm a, an tlakchhiat em avangin inkhawm pawh an awm tawh ngai lo a. A hnuah phei chuan pastor bakah mi pali chauh an awm tawh a, an vaiin kohhran member chu panga lek an ni.

An biak in awmna bul hnai tlang pakhatah chuan Bishop chawl tawh pakhat hi a cheng a. Pastor mangang chuan Bishop chu a han tlawh a, a hnen atanga thurawn tha tak hmuh in beiseiin rei ngial a titipui a. An kohhranin harsatna an tawh dan te chu chipchiar taka hrilh hnuah chuan thurawn engemaw tal pe turin a ngen ta a. Bishop chuan awlsam tak chhangin, "Thurawn pek tur che ka nei hran lo. Mahse, thil pakhat hrilh che ka duh, in zinga tu emaw ber hi Messia in ni. I thiante bulah i sawi dawn nia" a ti a.

Pastor chu a haw leh ta a. Kohhran member la awm chhun pali nen chuan an inkhawm leh ta a, Bishop thusawi chu a hrilh ta hlawm a. Hun a lo kal zel a, kohhran member-te rilruah chuan Bishop thusawi chu a riak reng a. "Kan zinga tu ber hi nge Messia chu ni ang?" tiin an in zawt thin a.

Messia nih an beisei ruk avangin thahnemngai takin rawng an bawl zui ta a, mi dangte chungah that an chhuah a, an inzah tawn a, an lo inngaina zual tial tial mai a. Chhandamtu (Messia) nih an chak theuh avang chuan an thawkrim a, an inngeih tlang ta hle mai bawk a.

Hun a lo kal zel a, chu biak in rawn tlawhtu apiang chuan kohhran member panga te inzahtawn zia te, an inngainat dan te, thahnem an ngaih zia te, an inlungrual dan te chu an hmu zel a. Tichuan, tuma sawm khawm ngai loin tunhmaa chu kohhran lawi thinte kha an lokir leh ta sup sup mai a. Anmahni mai bakah an thiante leh an lainate an rawn sawm belh zel bawk a. Kum rei lo te hnuah chuan kohhran te tak te tlakchhiat hmabak reng tawh kha kohhran lian leh nung tak a lo ni leh thei ta a ni. n

(Bishop's Gift tih lehlin a ni a, a ziaktu hriat loh - Lalthlamuana Ralte)

Related Posts :