Tripura-ah Zo Inpui

Zofate chu India, Burma leh Bangladesh-ah te thendarh an ni a, ram hranah, sorkar hran hnuaiah an awm ta. India rama mite pawh chu state hrang hrangah an darh bawk. Hmun hrang hranga cheng Zofate aiawh, an tlukluhna leh an tana thawktu tur Zo Inpui din tumin ZORO chuan hma an la mek a, a ngaihtuah tura ruatte'n an ngaihtuah mek. Chu Zo Inpui din hma chuan Tripura lama Zofate chuan an din fel ta rup mai.

Mizoram chief minister Lal Thanhawla chuan January ni 7-ah khan Tripura-a Tlangsang khuaah Zo Inpui hi a hawng a ni.

He Zo Inpui hi Tripura-a Zo hnahthlak hrang hrangte intelkhawmna, an aiawha kawng hrang hranga hmala thin tura din a ni a, president, vice president, secretary leh treasurer turte an inruat fel nghal bakah Tripura state chhunga Zo hnahthlak tin aiawh mi pahnih theuh rorel khawla tel tur an inruat nghal.

Zo Inpui hi Mizoram chief minister chuan tawngtaiin Pathian hnenah a hlan a, Zofate insuihkhawmna chungchang sawi zuiin, kan insuihkhawm theih nan kan rinawm a ngai tiin a sawi.

'Zofate chu Pathian mi hriat kan ni' tia sawiin Lal Thanhawla chuan, Pathian laka rinawm turin mipuite a chah a, mahni awmna theuhah rinawm turin hmun hrang hranga cheng Zofate a chah bawk.

"Zo hnahthlak hrang hrangte hian Mizoramah inpui kan nei a ni," Hawla chuan a ti a, Mizoram state pawna Zofate tibuaitu, dan lova khawsaa tibuaitu an awm a nih chuan Mizoram sorkarin a chhan tlat dawn nia sawiin, "Pialral thleng thakin kan um ang," a ti.

Tripura Jampui tlangdunga Tlangsang khua-ah hian Jampui Area Mizo Upa Pawl leh Tripura Group YMA te huaihawtin January ni 6 zan atanga January ni 7 zan thleng khan Tripura Zo Hnam Khawmpui neih a ni a, Mizoram chief minister chu khuallian a ni. Art & culture minister PC Zoram Sangliana chu khualzahawm a ni a, parliamentary secretary Lalrinmawia Ralte chu khualduhawm a ni. Aizawl atangin MUP, MHIP leh MZP hruaitu engemaw zat an tel.

January n 7 chawhma lamah Mizoram chief minister hian Tlangsang-ah hian hlaphuahthuam Siamliana leh Sibuta'n sial anga a chhunhlum Darlalpuii te hriatrengna lungphun a hawng a, chawhnu lamah vantlang inkhawmah Zo Inpui hi a hawng a ni.

A tan zanah MZP president VL Krosshnehzova leh NESO vice chairman Lalmuanpuia Punte te'n Zofate insuihkhawmna chungchang an sawi a, Zo Inpui hawnna hunah hian MZP president hlui C Lalhmachhuana'n insuihkhawmna chungchang a sawi. Ni 7 zanah khualzahawm PC Zoram Sangliana'n thu a sawi a, Tripura Zo Hnam Khawmpui chu an zo fel ta a ni.

He khawmpuiah hian Tripura hmun hrang hrang atangin palai an kalkhawm a, Zo hnahthlak peng hrang hrangte'n inhlawmkhawmna pawl mamawh an intih avanga hun engemaw chen an lo ngaihtuah hnu-ah Zo Inpui chu an din ta a ni. Zofate insuihkhawmna leh inpumkhatna chu Zo Inpui thil tum a ni ang.

Tripura-a Mizote hian chief minister Lal Thanhawla hi 'Mizoram chief minister' ti maiin an lo ko lo a, 'Zofate chief minister, Tripura Zo muantu' tiin an lo ko hial.

Related Posts :