TAXI DRIVER THATTU!

¢ HC Vanlalruata

Kum a thar fel chauhva, kum 2010 bul kan tan chhoh dan chu a fello hle mai. Tualthihna huaisar tak maiin min deng a; a thih hun chu kumhlui pawh niin lang mahse, taxi driver ruang hmuh chhuah hun leh a thattu nia rinhlelh man hun chu kum thar hnu a ni miau a, kum thar hlimah chanchin lawmawm lo takin min deng ta a nih hi.

Kum a thar a, kan rilru la thar chuanglo a awm. Chu chu he thihna hian a rawn lan chhuah tir leh ta. Kha taxi driver thi kha pawi kan tiin khatiang thil thleng kha tha kan tilo theuh ang. Nunna hi chu a hlu em a, keini’n kan lo inlaksak hi chu khawvela thil pawi tawpkhawk a ni. Hetianga tualthi an awm hian a chhuitu tur Police an awm a. An chhui chhuah mai theih loh emaw, an chhui tha duhlo emaw, an chhui thiamlo emaw a nih chuan mipui kan lungawilo hi a awm a. Lungawiloh ngei ngei tur a ni. Chhui chhuak thuai tura kan phut pawhin chu chu kan ‘right’ a ni.

Mahse, a thattu ngei nia rinhlelh an man tawh a. Chu an mi man awmna tanin thleng thlenga veng mipui an zu kal khan enge hlawh chhuah an tum aw? Kan ze hlui ngai, veng bil rilru kan la paih theihlo tih erawh chu a lantir chiang khawp mai. Khatianga mipui an punkhawm avang khan Police tam tham tak tanin veng tura an kal a ngai a. Tualthattu-a puh pawh thu zawhfiah zui zel tura tanin atanga hruai chhuah ngamawm loh khawpin boruak kan siam a. Police thil chhuina hun engemaw chen tihbahlahna mai chauh a ni.

Nikum November thla laihawl vela Zarzokima thattu nia hriat Bru helho chhui zuia man hleitheilo leka mipui thinrim khawthlang lama kan chim thla nen khan a danglam chuang lo. Khatah pawh khan tualthattu chhui a um zui hlei thei lovin kan Police te kha kan siam a, Bru ho khaw hal tur veng leh boruak thalo awm thei hmehmih tumin an hmanhlel ta zawk a nih kha.

Kan chanchinthar thehdarhtu lam pawh an thil report danah an puitlingin dan kalphung an hre viau tawh emaw tih hnu-ah tun tum chu an thuziah leh puan dan a fello leh tlat. Taxi driver thattu-a puh, Police-in an man kha ‘A thattu’ tiin an ziak/puang hmiah hmiah mai hlawm a. Court-in a chungthu an ngaihtuah hma chu sawiloh Police-in charge sheet pawh an la buatsaih hma-in media chuan thiamloh an chantir (convict) der tawh a nih kha. Hemi chungchang hi kan senior tak pakhat ka sawipui a, a tihdikloh pawm chungin, “Police hnenah a inpuang tawh sia...” tiin insawi thiam zui a tum a. Mahse, India ram danah chuan Police hnena thusawi (statement made to the Police) hi Court-ah hman theih a ni lo (not admissible in the court of law) tih a ni miau a. Miin, “Kut min thlak nasa lutuk a, ka tih a ni ka ti ta mai a ni,” an tih pawh ngai lovin Police hmaa thusawi hi court-ah engmah a tling lo.

Magistrate hmaa inpuanna, mahni duhthu ngeia inpuanna pawh hi India ram danah chuan court-a thutling (evidence) a ngaih a la ni lo fo a. ‘Evidence’ awmsa nena inmil a lo awm chuan hman tangkai theih a ni tih ang vel chauh a ni. Chuvangin media-te hi hun lo la kal zel turah chuan fimkhur tawh i la a tha ngawt mai. Court-in thiam loh a chantir (convict) hnu-ah chauh ‘tualthattu’ tiin kan ziak thiang a. Chumi hma zawng chuan nia rinhlelh, puh, nia hriat tiin emaw ziak/puang hram thin ila a tha. Court tawngkam chu sawiloh an mi puh kha thiamloh chantir ngei tuma beitu Police tawngkamah pawh ‘accused’ tihte ‘suspect’ emaw an hman loh pawhin ‘alleged murderer’ emaw an ti hram hram thin.