Sum ngainat hi sual tin reng bul a ni

June ni 15 a ni a, education minister leh sorkarna changtu MPCC Education Cell hruaitute'n thuthar lakhawmtu kawmin education lama hmalak an tum dan an puang. Technical education uar an tum thu an sawi a nih kha.

'Technical education' ni lo zirna thlur dang chu 'zirna tluangtlam' tiin an sawi a, MA/MSc/MCom zirlai vel hi tluangtlam an ti viau a ni mai thei e. Chu 'zirna tluangtlam' chu uar an tum lo a, 'zirna tluangtlam' lama sum sen pawh technical education lama pawh pen an tum.

Chumi ni chu awk-in ni a lem ni a ni a, tun kum sang bi chhunga ni awk lem rei ber tum tur a nih bakah ni chu zungbun pian (shape) anga a lan dawn avangin (a hmingah pawh annular solar eclipse an ti) khawvelin a ngaihlu hle. Mipui nawlpui ngaihven a hlawh hle a nih kha.

Mipuiin an ngaihven mai a ni lo, science zirte leh van lam chanchin zirmite hlei hleiin an ngaihven. A pum puia a lan theihna hmun an pan ruih ruih a, a nih loh paw'n a thlirhona hun huaihawtin, hmun hrang hrangah an lo zirho a nih kha.

He ni awk lem, a puma a lan theihna hmun tlem te zingah Mizoram a tel a, hmarchhakah phei chuan a lan theihna awm chhun a ni. Mahse, a lan theihna ramah kan awm tih pawh a hriat ta mang loh, mipuiin hmuhnawm thlirin kan thlir ta mai mai chauh a nih kha.

Sorkarin technical education uar a tum thu a puan ni-ah awkin ni a lem a, technical education ngaisangtu sorkarin a zirna lam engmah a buatsaih lo!

Kan hnam ngaihdanah chuan sum a pawimawh ber a, zirna pawh hahdam zawka hlawk taka sum thawkchhuak tura inzirna a ni ber.

Nikum kum tawp lamah cabinet meeting-ah higher secondary school zirlaia geology telh an rel a, kan hruaitute'n chumi chungchang an puanzar dan chu 'Mizoramah leilung hausakna haichhuah tumin company an rawn lut zel a, geology thiamte tan hna a tam dawn' tih vel a ni. Leilung chanchin zirna lama hma kan sawn theih nana tih a ni lo, Mizoram hi leimin tamna, lirnghing kawng a ni a, kan leilung chanchin zirchian a ngai tih lam a ni lo. Tunah pawh sorkarin geology chu mining nena tham kawpin, geology and mining wing chu industry deptt. hnuaiah a dah a nih hi. Geology chu sumdawn nan kan duh ber a ni mai thei. Technical education pawh hi tunlai khawvelah sum tamna nia kan hriat vanga uar tum kan nih hmel, thiam kan mamawh e tih vang ni lovin!

Chutiang chu kan rilru puthmang a ni a, hahdam leh hlawk zawka sum kan hmuhna tur a nih chuan mi tam zawk hi chuan khua kan hmu lo. Chu ram chu bank lem te, financial institution lem leh sum dahna hlawk chite tan chuan leidur tha chi a ni ber. Chu chu kan harsatna tawh mek a ni a, a sutkian dan ngaihtuah a tul ngawih ngawih a ni.