Police-te kutah taxi driver thattu

December ni 8, 2009 atanga a chin hriat loh, taxi driver Chawnghmingthanga chu mi tlawmngaite'n an zawng thin a, bei a dawng rum rum hman tihah January ni 12, 2010-ah a ruang hmuh a ni.

He thu hian hmun hrang hrang a deng chhuak chak hle a, ni 12 chhunah phei chuan awmkhawmna reng rengah sawi a hlawh hle.

Chawnghmingthanga ruang hi Lengpui kawngah ni 12 tukah police te'n an zawngchhuak a, kawng atanga metre 30 vela hlaah an hmu a ni.

Chawnghmingthanga hi Laltanpuia thah nia hriat a ni a, police te chuan laltanpuia hi manin an kawl nghal a ni. Police te hian thil awmzia an chhui zui nghal.

Police te sawi dan chuan, nikum December ni 8-ah khan, zan dar 10 velah Synod Office (Mission Veng) bul atangin Laltanpuia hian Chawnghmingthanga taxi a hmang a, Rangvamual-ah an kal a, Lalnunthari te in-ah zu Rs 150 man an la a, Rangvamual- leivungin a hnawh bulah an pahnihin an in ta a ni.

An in zawhah chuan taxi hman man an indil a, taxi fare chungchangah hian inhnialin, an insual zui ta niin police te chuan an sawi.

Laltanpuia hian chemte, kawihthleh chemte a pai a, a chemte hi a blade ringawt cm 10-a sei a ni. Chu chemte chuan Chawnghmingthanga chu a vit a, a awmah vawi hnih vitin, a vithlum ta a ni. Chu chu police te'n he thu buatsaih lai thlenga an hriat dan a ni.

Laltanpuia chuan Chawnghmingthanga ruang chu driver thutna sir seat-ah dahin, Chawnghmingthanga taxi chu a khalh ta a, ruang chu phurin Lengpui lam a pan pui a, Lengpui thlen hma deuhah, kawngthlang lamah paihin a haw san ta a, Sihhmui-ah a riak ta niin police te chuan an sawi.

A tuk, December ni 9-ah taxi dang hmangin Aizawl a pan ta a, Salem Vengah inbual faiin, zanah taxi hmang bawkin Sihhmui a pan leh ta a ni.

Taxi chu lain Aizawl a pan leh ta a, Mualpui lamah kalin, taxi chu a siam danglam a, taxi colour (sticker eng) pawhthlanin, number plate dang a vuah bawk. 'MZ-01E-1817' tih a bel a, engine number a tidanglam bawk.

Tichuan, a chei danglam hnu-ah motor chu a hralh ta a, Lalhmangaiha'n Rs 135000-in a lei niin police te chuan an sawi. Mahse, Guwahati-ah Maruti 800 (AS 01/G 7116) secondhand a la a, Lalhmangaiha hian chu chu a duh zawk avangin Laltanpuia hnen atanga a lei chu a pe let a, Laltanpuia chuan midang hnenah a hralh ta niin police te chuan an sawi bawk.

Police te'n he thu buatsaih lai thlenga an hriat dan chuan, Laltanpuia hian Lalramthanga hnenah motor hi Rs 130000-in January ni 10-ah a hralh a, chutianga an inlei chhawnna lamah chuan police te'n an manchhuak ta a ni.

An inlei chhawn sak tuk, ni 11-ah police te chuan motor hi an man a, motor hian document a nei lo. A leitu Lalramthanga chu Bawngkawn PS-ah kovin, an chhui ta nghal char char niin police te chuan an sawi a, thil awmzia hriat belh zelin, Laltanpuia chu an manchhuak ta niin an sawi bawk.

Thudawn dan chuan, Laltanpuia hian Rangvamual a kal fo avangin fimkhur thu-ah chemte hi a pai thin hrim hrim a, Dedember ni 8, 2009 zana Chawnghmingthanga nena an inhnial buai takah hian a hmang ta a ni.

Taxi chuan mana Chawnghmingthanga'n a dil zat chu Laltanpuia hian to tiin a pe duh lo a, an inhnial zui ta nia hriat a ni.

Laltanpuia hian Chawnghmingthanga wallet a la a, wallet chhungah hian Rs 370 a awm. Driving licence a awm bawk. Pawisa a la a, wallet ruak leh driving licence chu Rangvamual-ah kawng thlang lamah a paih niin police te a hrilh.

A chemte hman hi Laltanpuia thianpa, Michael Lalrinpuia, Bungkawn venga mi hnen atangin police te chuan an la tawh. Taxi colour (sticker eng) a pawhthlak pawh hi an hmu tawh bawk.

Laltanpuia hian hetia pawi a khawih hnu hian Rangvamual leh Sihhmui lam te a tlawh leh fo niin police te hnenah a sawi a, zu an lakna Lalnunthari pawhin laltanpuia hi an inah a hnu-ah a kal leh fo niin a sawi.

Laltanpuia hian a tum aia che nain, tual a that ta hial ni-a sawi a ni a, khatia mi tlawmngaite leh police te'n Chawnghmingthanga an zawn lai pawh khan hrehawm a ti thin hle niin thudawn pakhat chuan a sawi. Chutih rual chuan khatia tual a thah hnu-a inpuang lova a awm zui theih avang leh pawi a khawihna hmun lam te pawh a tlawh leh theih avang hian tun hmain pawikhawihna lian thamah a lo inhnamhnawih tawh thin a ni ang tih ngaihdan, police te thlirna atang chuan a sawm thei.

Chawnghmingthanga ruang hi kawngpui atanga metre 30 vela hlaah hmuh a ni a, Laltanpuia chuan kawngpui atangin a paih thla tawp mai niin a sawi.

Chawnghmingthanga ruang hi a chhe tawh ang reng a, amaherawhchu, a rei tawh ngaihtuahin a la chhe lo zawk hle niin police te chuan an sawi. A awmah chemtea vihna ni ngeia hriat, hmun hnihah a awm ngei niin police te chuan an sawi a, Laltanpuia hian a awmah vawi hnih a vit niin police hmaah hian a sawi ve reng a ni.

Khatia an inhnial buai takah khan, an insual ta mai nen, Chawnghmingthanga chu a vit ta a, a vit na viau a, a thah law law loh chuan tha dawnin a hre lo a, a vit nawn leh ta niin thudawn pakhat chuan a sawi.

Chawnghmingthanga ruang hi a chhe tawh ang reng a, rim pawh a nei tawh. Mahse, khaw vawh vang nge, a rei tawh ang aiin a la nasa lo.

Laltanpuia hi kum 23 mi a ni a, nupui then tawh, pathlawi a ni. A nupui then tak nen hian fa pakhat an nei. Pawl 12 thleng lehkha a zir niin police te a hrilh a, thudawn dan chuan a naupan lai chuan lehkha pawh thiam thei pangngai, naupang fel tak a ni.

Police te chuan ni 11-ah Laltanpuia hi an man a, Aizawl PS C/No 9/2010 dt. 11.1.2010 u/s 302/379 IPC tiin case an ziaklut. Laltanpuia hian case pahnih a nei tihna a ni a, tualthah case leh rukru case a ni.

January ni 12 chhun velah khan Chawnghmingthanga te veng, Bungkawn veng thalai thenkhat leh taxi driver engemaw zat chu Aizawl Police Station kawt velah an pungkhawm a, mahse, boruak duhawm lo engmah a thleng lo.

Chawnghmingthanga hi kum 35 mi a ni a, Runkhawia fapa a ni a, Bungkawn venga mi Remruatdika taxi a khalh a ni.

Tuna a lan dan

* December ni 8, 2009 zan dar 10 velah Chawnghmingthanga taxi chu Laltanpuia'n a hmang.

*Rangvamual-ah an kal a, an inhnial buai, an insual ta nia hriat a ni.

*Laltanpuia hian Chawnghmingthanga hi a awmah vawi hnih a vit nia hriat a ni.

* Chawnghmingthang taxi chu Laltanpuia hian a khalh ta a, Chawnghmingthanga ruang chu Lengpui lam panin a phur.

* Kawngthlang lamah, kawngpui atanga metre 30 vela hlaah Chawnghmingthanga ruang chu a paih.

* January ni 12 zing karah Chawnghmingthanga ruang chu police te'n an chhui zui zelna lamah an chharchhuak.

Related Posts :