Maldives-ah Dr Luke an mal lo

¢ Hmingsanga

'Home Sweet Home' tih hla hmangin Zo rimawi khawvelah an rawn inlan a, he hla atang hian kan hmelhriat a, Mission Venga naupang pakhat, thisen cancer natna vei mek chu 'Home Sweet Home' a ngaihthlak loh chuan a muhil thei lo! Chu chuan hlain thu a sawi dan a tifiah kuar ang.


An rawngbawlna hmangin eng chen nge Pathianin mi thinlungah thu a sawi ang? "Ama tan kan inhlan pumhlun thak chuan kan rawngbawlna hi a tling em em a ni," titute an ni a, "Music avangin kan inhmukhawm lo a; rawngbawl turin a ni kan inzawmkhawm zawk ni," titute an ni.

2005 laihawl vel a ni a, chutih lai hun chuan rawlthar pathumte chu New Age Metal rawngkai rimawi chuan an beng a fah thin hle. An inphuarkhawm chhan tak chu music ni mah se; a bulpui erawh Pathian a nih thu an sawi. Gospel band an ni a, an tuina- rimawi hmanga Pathian faka chawimawi chu an tih ngei ngei turah an ngai a, an pawm thlap bawk. LIVE band ni mah se LIVE music chawisan ber hi an tum pui ber a ni hran lo; an tum tak zawk chu Pathian rawngbawlna phena Gospel music chawilar a ni mah zawk.

Durtlang Leitan atangin Ruata chuan a bass guitar hnum hlarh tawh mai chu ak thla hnak hnak thinin, a thiante pahnih- Jerome-a leh Mamuana te nen Jerome-a ni te in, Dintharah rimawia an tuihalna chu hritlain, an 'jam' thin. Mahse, zirlai an nih avangin an zirlai an ngaihtuah a ngai a, 'jam' reng thei dinhmunah an ding lo. Tichuan, an rimawi ngaihnatna avanga an inzawmkhawmna chu, an tlansan rih a, an inthen hran rih a lo ngai ta. Mamuana ber lah phai lamah zirna zawm a tul avangin a awm bo ta si.

Hreh tak chungin hun engemaw chen inthen mah se, heng Mizo tlangval pathumte thisenah rimawi chu a awm miau avangin an in-'renew' leh. A tawpah phei chuan band din hial an rawt ta a, mahse, band din tura an mamawh leh neih ngei ngei ngai tur erawh an la nei lo thung. An mamawh ber vocalist tur pawh an zawng nghal. Chu chu Dr LUKE lo pian tan dan a ni.

A tirah Dr LUKE hringchhuak ta mai lovin Dr SEARCH a rawn hring chhuak phawt. Vocalist tur zawng reng renga an buai phili avangin Dr SEARCH tia an band hming an phuah lailawk thu Mamuana, guitarist chuan a sawi.

"Vocalist tur zawng ve ruaia band hming pawh nei lova han awm tawp kha thil ni thei niin kan hre lo a. Chuvangin Dr SEARCH tiin kan phuah lailawk a ni," tiin then deuh sang chungin drummer Jerome-a chuan a lo sawi ve bawk.

2008 a ni. University huamchhunga zirlaite'n rimawi kutpui an hman thin- 'INFERNO'-ah chuan heng rawlthar pathumte pawhin hun an hmang ve. Chutianga hun an hman mek lai chuan, chulai hmun veka hun hmang ve, Kolasib lam chhuak tlangval pakhat chezia an hmu a, a chezia chuan an mit a tlung em em a, an beng a fah a, awhna thangah awkin a zai lai an hmuh atangin umzui chi-ah an ngai ta hial a, an band-a tel ve tura sawm thluk hial an tum ta a ni.

2008 vek, May thla velah chuan Jerome-a chuan Kolasib tlangval, an mi duha chu an awmna hmunah panin, an band din thara vocalist turin a va sawm ta chawt mai. Chu Kolasib tlangval, INFERNO atanga an chhar, Andrew-a pawh chuan 'aw' a lo pawh ve thuai hlauh. Mahse, an inbiak rem hnuah hmalakna engmah nei thei lawk lovin an awm leh rih. An drummer Jerome-a ke ruh a tliah avangin pawn chhuak thei lovin a awm a, a hmalatu ber che sawn thei dinhmuna a din tak loh avangin an chawl vang vang ta rih a ni.

Andrew-a a rawn inlar hmain vocalist tur pawh an zawng ve fe. Mahse, an hlawhchham a ni ber!

"Kan band vocalist ni turin mi pali vel chu biak kan nei. Mahse, hengho hian min chhang beidawng vek a. Min chhan dan leh min hnar dan thenkhatte phei chu kan tan sawi chhuah chi pawh a ni lo," Mamuana chuan a ti.

A bulhnaia lo thu ve Ruata pawhin, "A zahthlak haih haih khawp mai," tiin a lo chhunzawm a.

Jerome-a pawhin, "Pali velin min hnar a. Mahse, Pathian hnenah a dilin kan dil a, a tawpah min pe ta a ni," tiin Pathianin an band vocalist ni tura Andrew-a a pek avanga an lawmzia thu a sawi bawk a ni.

An chawr chhuahna a inang lo nuai a, an music duhzawng lah chuti bawk. Mahse, heng tlangval pali- Andrew (Vocals), Mamuana (Guitars), Ruata (Bass) leh Jerome-a (Drums) te chu an music duhzawng leh ngainat zawng dang vek mah se, chu chuan ngaihtuahna thar a pe hlauh thung. An rimawi kalphung pawh Funk leh Brit Rock karah jazz rimawi an zep zauh zauh a tih theih ang. Chutiang taka rimawi ngainaa thalaite hmaa Pathian rawngbawl tumtute chuan chanchin tha bu 4-a mite dinchhan tlat chungin, heng tlangval palite chuan 'DrLUKE' ('DrLUKE' tia ziah deuh kher tur) tih chu an band hmingah chuan an pawm tlang ta a ni.

Gospel rock band an ni. An thalai puite zingah music hi Pathian ta a nihzia thu leh khawvel leh a chhunga awmte hi Pathian siam a nihzia rimawi hmanga lan chhuahtir zual sauh sauh pawh an tum.

DrLUKE khaipa ber Jerome-a chuan an band din chhan sawiin, "Kan inhriat tan tirh leh tun dinhmun kan thlen theihnan te leh vocalist thlenga Pathian hnena kan dil chhuah liau liau a ni a," tiin bul a'n te te a, "Engkim hi Pathian hnena kan dilchhuah vek a ni a, Pathian malsawmna kan dawn te hi a hnenah pek let leh kan duh. Keini chuan sengkhawmpui lova tidarhtu nih hi kan tum lo bur a ni," a ti.

DrLUKE guitarist Mamuan pawhin, "Tun thlengin Gospel band kan nihnaah hian inchhirna pakhat mah kan la nei lo. Thlarau leh tisaah kan hlawkpui char char zawk a, a inchhirawm loh khawp mai," tiin a lo belh.

Rock music an ngaina a; mahse, khawvel huap pawha rockers hming tha leh ropui tak tak ngaihsan pawh an nei theuh. Chutih lai chuan, rock music documentary an en fuh pakhatah an mi ngaihsan deuh deuhte chuan Setana an lo be deuh fur niin an sawi!

Rock music leh Setana inlaichhinna ril tak mai an hmuh chhuah chuan an rilru pawh a khawih tlang a. Chu chuan anmahniah chona thar a siam a, buh seng tur a tamzia an hriat chhuah phah nasa ta mai.

"Documentary atang khan rock music hian setanic a rawn influence-zia kan hria a. Hei hian chona nasa tak min pe. Chuvangin, kan hla thute pawh a mainstream-a gospel tulh tulh ang a. Pathian hla hluah hluahin kan hla thu te chu kan her rem dawn a ni," Jerome-a chuan a ti.

Guitarist Mamuana pawhin lo sawi vein, "Music hi Pathian ta a ni; Pathian hnenah kir leh rawh se," tiin a lo sawi bawk.

An tualchaina ramah LIVE music aiin track rimawi chuan hmun a luah tam zawk tih an hria a, an hmu a, an ngaithla tawh thin bawk. Chuti chung chuan anni hi LIVE band an ni thung si. Mahse, LIVE music chawinun ai mahi Gospel music chu tih lar a, chawisan an tum zawk. Mamuana chuan tihian a sawi a, "LIVE music chu promote a ngai tawh lo, a inchawisang sa. Band ho hian hla hi nei nalh ila, mipui kan hip a ni mai," a ti.

DrLUKE chuan Pathian biak in-a sengluh tlak rimawi chu a tir atangin an ngaihtuah a. Anni chuan Kohhran belh tlat an tum. Kohhran piah lamah khawtlang hi tlansan an tum hek lo.

Vocalist an zawn pawhin an uluk a, Kohhran leh khawtlanga mi hman tlak a nih leh nih loh chu an thlir thin.

"Music an khawih a, an lar emaw lar lo emaw, Kohhran leh khawtlang an thlahthlam nghal thin a, hei hi kan duh lo," tiin Jerome-a chuan a sawi.

"Pathian khawngaihna a zarah kan bel zel dawn," tiin Mamuana chuan a lo zawm a. Mahni lawina veng theuha theih ang anga Kohhran leh khawtlanga inhman chu an tih ngei ngei ni tura an ngaih thu a sawi bawk a ni.

He gospel band, tunhnai lawka kan hmelhriat leh thangduang tak ni si, DrLUKE chuan an chawrchhuahna chu Kristian ram a ni tih pawh an hre chiang a, eng ang pawhin hai der tum mah se a theih loh tih hre chiang vektute an ni. Mahse, ngaimawh an nei a, an ngaimawh erawh Kohhran upa thuchhuak aia theologian lar chhuak thut, Kohhran pawna thil tih hi a him lohzia hriain an ngaimawh em em a ni.

"Kohhran pawna thil tih hi a him lo, a tul lo, kohhran a ni tawp mai!" tiin Jerome-a chuan a sawi.

"Kohhran hi kan bel tlat zel dawn a. Kohhran kal dan hi a tha tawk viauin kan hria," Ruata, bassist chuan a rawn ti ve khauh bawk.

Mamuana pawhin, "|halaite pawh hian inkhawm hlutzia hi kan hriat thar deuh deuh a ngai a ni," tia sawiin, "Inkhawm hman loh chhuanlama ka buai ka buai kan tih hi, mahni inthiam chawpna mai mai a ni," tiin a sawi belh bawk.

Lehkha zir lai an ni a, BA zir lai an ni fur. Lehkhathiam a pawimawhzia hriain la zir zel pawh an la tum fur mai.

Mamuana chuan, "Music-a eizawng tur pawhin lehkhathiam a pawimawh em em a ni. Vaiho zinga a an band tha deuh deuh ho pawh hi lehkhathiam deuh vek an ni a. A thente phei chu engineer-te pawh an ni deuh fur bawk," tiin a sawi.

An kum a la naupang a, an kum chawhrualin kum 22 bawr an ni. Chuti chung chuan an music 'taste' a sang hle. An rimawi kalphung pawh thalaite ngaihnat chi tak pawh a ni e. Chutih rual chuan, an hlate hi an zavaia an phuahkhawm deuh vek hi a ni a. Hla phuahtu bik an nei lo a, music atanga hla phuah thin band an ni a. Music hmangin an hla tur chu an 'jam' chhuak a, an 'jam' chhuah music rem turin a thu an remkhawm leh mai thin a ni.

Intihsiakna lamah sulhnu sawi tham an nei lem lo. Amaherawhchu, an tel chhunah an che chhe zawk zawk lo khawp mai. Nikum April ni 2-4 chhunga Silchar-a buatsaih, National Rock Contest-ah khan an zu tel ve a, he hunah hian India rama band tha tak tak an fuankhawm. Chu'ng zingah chuan hnam dangte khumin DrLUKE hian pakhatna lawmman an rawn hum haw a ni.

An vocalist thin Andrew chuan chhungkaw lam eizawnna thil avangin DrLuke hi a chawlhsan. An band pawh a nguai deuh ruai mai. Tunge Andrew-a anga zaitthiam, an music play thin funk rock lam hawi sa thiam bawk ni ang aw an tih laiin Micah Challenge leh Zonet tangkawpin beat contest an buatsaih, "Cry 4 Justice"-ah khan hmeichhe pakhat, an duhzawng tak mai DrLuke chuan an chhar thar a. A hming Vanlalruatfeli a ni a. An band zawm turin an sawm a, an sawmna tih hlawhtlingin Tetei tia koh chuan DrLuke hi a zawm ta a ni.

DrLuke chuan rimawi hmangin ram an zauh zel a, an ram zauhna chhan chu Pathian vang a ni tih an chiang tlang. Pathian fak leh chawimawi chu an tihturah an ngai a. Ring lo mite karah pawh a theih tawkin Pathian an chawimawi thin.

Nikum tawp lam khan India ram pawn Maldives-a zai tura sawmna an dawng a, Pathian rawn chungin chu sawmna chu an chhang a. Maldives-a zin, Dr Luke manager David Hlawndo chuan Zozam Weekly hnenah an zinna report hetiang hian a sawi.

Maldives a kal tura sawmna in hmuh dan?
Reethi Beach Resort a General manager, German pain kan music video internet atangin a lo hmu a, he beach resort-a Executive House Keeper hna thawk Mizo nu Remi thahnemngaihna vang te pawh ni bawkin Maldives-ah hian zai tura sawm kan ni.

In programme atan hian engtiangin nge in inbiak?
Kum chanve vel zet chu a ni ang, nikum June thla vel atang khan kan inbepawp tan a. Anni hian kan profile, demo leh music video te thawn turin min rawn ti a. An mamawh ang te kan thawn hnu hian, board meeting te an nei ve leh a, rem an tih hnuah aggreement bond te kan sign ve leh bawk. Kan kal dan tur leh senso ngai zawng zawng min tum sak dan tur thlengin ruahmanna tha tak an rawn siam a.

In inbuatsaih dan?
Kan theih tawkin kan inbuatsaih a ni deuh ber ang chu, hla chi hrang hrang 30 chuang vel kan zir a, tawngtaina nen kan jam deuh char char a ni mai.

Engtiangin nge an lo dawnsawn che u?
Min lo dawnsawn dan kha a lawmawm lutuk ringawt. Kan inbeisei phak bak a ni a, VIP enkawlin min enkawl a. An mikhual mah ni ila, min enkawl danah a chang chuan staff ang maiin min ngai ve a, mikhual kal phal lohna hmunah kal min phalsak a, kan duhna hmun apiangah chaw pawh kan ei min phalsak a. Engkimah min duat a, min dawngsawng thain min thleng hneh khawp mai.

Vawi eng zat nge in perform?
December ni 24 & 25 zanah a bul kan han tan a. Ni 29 zanah an mikhualte ngenna avangin instrumental hlangin kan perform a, ni 29 zanah leh kum hlui thlah zan te pawh khan kan perform bawk a. A tlangpui thuin zan dar 10 vel atangin kan tan tlangpui a, zan dar 1 thleng deuh thaw rimawiin an mikhualte kan awi a ni deuh ber mai ang chu.

Kristian Band in ni sia, Maldives chu Muslim tamna ram a ni si a?
Nia, kan perform-na hmun kha sawi tak angin Reethi Beach Resort a ni a, mihausaho chawlh hmanna hmun pakhat a ni. An mikhualte hi a tam zawk chu sap an ni a. Chung zingah chuan German an tam zual a, French leh khawchhak lam mite pawh an awm ve nual bawk a. Langsar tak chuan Kristian kan ni tih kan tilang lem lo a, mahse kan zai dawn leh jam lai chuan rilru tawngtaina nen hun kan hmang thei zel.

In zai chu lawm a hlawh thaw khat ang maw?
Lawm kan hlawh ve viau chuan kan inhria, han sahawk a, han au deuh ruih ruih ang chi te an awm lem lo a, mi puitling tak tak kalkhawm an ni a.

An hla nalh tih zawng leh an music duhzawng kan play chuan an rawn lam chhuak a. Min thlir deuh vawng vawng bawk a.

Show zawhah te pawh kan address min dil tawk an awm ve deuh reng a, a thenin thla min lakpui bawk a. Keimahni pawh kan hlim ve thei khawp mai. Kan zai dawn zan chiaha lo kalte pawh an awm ve a.

In band bungraw mamawh ang chu in keng mai em ni?
Aw, kan mamawh tur ang chu kan keng deuh vek mai. Kan thawkchhuak bawr ang reng khawp mai.

A hmunah tuin nge Sound mixing chu khawih ta ber?
Manager ka nih bakah sound mixing lam pawh keimah vekin ka khawih. Anmahni lam chuan sound khawihtu bik nei ve tho mah se keimahni lamin kan khawih ta zawk.

Indian hmel in pu si lo a?
Nia, zawhna pawh kan dawng hnem khawp mai. India ram atanga lo kal in ni si a, Indian hmel in pu si lo a, kan awih lo ti te pawh an awm a.

A thenin band member te kum zat an lo zawt a, engtia rei nge in band hi a ni tawh te an ti a.

'Khawvel hmun dangah vawi eng zat nge tour in neih tawh?' tih te leh 'Maldives zawhah khawi ram nge in pan leh ang?' tih te min zawt a.

In band member te hi an la naupang hlawm si a...
Nia, kan band hrim hrim pawh a la upa lo a, a member-te pawh upa lutuk kan la awm lo bawk a, kum zat te min zawh a kan sawi chuan mak an ti thin khawp mai. 'In naupang si a, in music play a puitling viau lawi si a' tih tawngkam te pawh kan dawng a, min fak derna pawh ni se a ruk tak chuan kan lawm ve thin.

Sum leh pai lam te an pe tha bawk che u em?
Kan beisei phak piah lam daih sum pawh min pe a, Mizoram te nen khaikhin te phei chuan sum leh pai min pek te, min lo dawnsawn dan zawng zawng te ngaihtuahin Pathian hruaina leh malsawmna ropui tak kan dawng a, kan lawm khawp mai.

Thilrtu lam atangin tawngkam tha han dawn te in nei em?
Nei ve nel nual e, mi pakhat Germany atanga lo kal Band pathum vel lo 'manage' tawhtu, a hming Kristine chuan Germany-a kan kal theih dan tur zawn pui a inhuam thu min hrilh a. Kan address leh email id te pawh min dil ve a. Hma a la chho zel ang em tih chu kan sawi thei lo nachungin kan lawm ve viau ringawt a. A inhuamna ringawt pawh kha keini tan chu a hlu hlein kan hria.

Remi i tih kha tunge?
Remi hi sawi tak ang khan kan zaina hmun Reethi Beach resort-a a thuneitu zinga awm phak a ni. Ani hi Maldives kan cham chhungin engkima kan engkim a ni deuh ber mai. Kawng engkimah min pui a, fuih kan ngaihnaah min fuih a, kan kal duhna hmun apiangah min hruai a. Zanah pawh a tul chuan kan kaitho mai a. Min pui nasa lutuk a, a chungah lawmthu kan sawi mawlh mawlh.

Mizo awm ve dang an awm em?
Esther leh VR-i te an awm a, anni hi Maldives-ah hna thawkin an awm a. Anni pahnih pawh hi kan tan an tangkai khawp mai. Kan kal duhna hmunah an hun hlu tak sengin min hruai kual a, an chhungah pawh kan lawm khawp mai.

Harsatna lam sawi tur a awm em?
Harsatna lian tham han sawi tur em em chu kan nei lo a. Mahse an chaw ei thin ang hi kan ei ngai loh te a nih vangin a tir lamah chuan chaw ei a tui lem lo a, mahse kan cham rei deuh a kan ziaawm chho ve zel a. Kan haw dawn hnaiah te chuan kan ei thei ta hlawm viau chuan ka hria.

Kan zaina hmun kan thleng thlak hlim chuan kan hlim tlang viau a, krismas ni leh Mizoramah chuan ruai theh hun angah kha chuan tlem chuan kan lung chu a leng hlawm deuh chuan ka hria, mahni venga ruai han theh te kha kan chak ve hlawm bawk si a.

Chu bakah chuan, tuipui han ri hum hum kha kan la tawn ngai loh te a nia, kan awm thiam vak hlawm lovin ka hria.

In Band in hmachhawp in nei em?
Band member-te hi exam hmachhawn tur vek an ni a, chuti ni lo se chuan kan fit ve deuh lai hian album siam chu tha kan ti a. Mahse tun dinhmunah chuan kan thei rih si lo a. Exam te an zawh chuan album siam tumin hma kan la chho ang chu.

In zinna atan tanpuitu an hming han sawi chhuah duh te an awm em?
Awm tehreng mai. Pathian hnenah min hruaina zawng zawng avangin lawmthu kan sawi a. Passport kan buaipui laia theihtawpa min pui Mizoram sorkar hnuaia home department-a thawkte zawng zawng chungah lawmthu kan sawi a.

He band-a kan vocalist hmasa Andrew-a chungah kan lawm bawk a, ani zaina kha kan demo thawn ber pawh kha a ni bawk a, amah vanga hetiang dinhmun thleng thei kan ni pakhat a, a chungah kan lawm khawp mai.

Active souund te'n kan mamawh bungrua min hman tir a, mixer, drums cover leh cable min hman tir a, Joseph (Realistic) chuan sabian cymbals min hman tir a, PB Mama Active Sound engineer-in guitar DI Box min hman tir bawk a.

Kan zin chhung zawngin Kohhran hrang hranga thalai te'n min tawngtai pui bawk a. Kan chhungte chungah pawh lawmthu kan sawi bawk.

Related Posts :