Kum tharah rilru thar

Ni a kiam, hun a liam. 2009 chu kum hlui a lo ni ta. Pathian zarah 2010 kan chuangkai ta.

Sorkar thar kaihruainain 2009-ah bul kan tan a, VC thar, MP thar kan neih kum, YMA hruaitu thar, MHIP hruaitu thar, MZP hruaitu thar kan neih kum pawh a ni.

2008 kum tawpa lamah kan inthlang a, khatih laia thumal lar tak- 'Change' tih chu 2009-ah pawh a lar zui hle. Mizoramah 'change' a thlen leh thlen loh chu thuhran ni se, 2009-ah khan 'change' tih tawngkam zawng kan hmang rim malh malh e.

Khatia sorkar a inthlak khan lal an inthlak nge hruaitu an inthlak? Sorkar thar kan neih hian chhiahhlawh an inthlak nge lal an inthlak? Engpawhnise, sorkar zawng a inthlak chiang a, chu chuan 2009-ah khan 'change' chu a thlen chiang khawp mai.

2008-ah te kha chuan supply leh contract ilo fahranah MNF mi leh sa leh an vua leh vangte an mawm a, 2009-ah chuan Congress an mawm ta thung.

Mizovin 'fing' kan tih chu sorkar thau sawk thiam an ni ber ti ila kan sawi sual hran lo ang. Kan lo piang a, lehkha kan zir a, sorkar thau sawk turin lehkha chu kan zir a ni ber a, chutiang tur chuan kan thanglian ti ila kan uar lutuk em?

Sorkar thau sawk dan chu a kawng a tam hran lo. A tam ber chu sorkar hna thawh an tum a, chu chu sorkar thau sawk dan tlanglawn a ni. Tuina, tangkaina, creativity tih lam a lang lo, thla tina sorkar atanga hlawh la thei nih chu Zoram mipuite tum lian ber pakhat a ni.

Chuti lo zawnga sorkar thau sawk dan chu kawng dang a la awm; politics lama inhman. A then chu hum pumin politics-ah an inhmang a, heta 'politics' kan tih hi political science-in 'politics' a tih chu a ni chiah lo. Midang leh chu hun pum seng lem lovin, mahse, hun pum senga inhmangte nena inkungkaihin politics-ah chuan an inhmang thung. Chutah a sorkarna chang lam chuan sorkar sum, mipui sum chu mahni pawisa ip-ah an huilut thei ta a, a sorkar lo lamin chutianga tih theih tum chuan theihtawp an chhuah ve bawk. Democracy hmanga kan inrelbawl hnu-ah chutiang chuan kan la kal ta zel niin a lang a, 2009-ah khan politics 'khel fuh', mipui sum hlawkpui thei an inthlak ta a ni. Tin, a 'khel fuhte' hian contract leh supply hna ilo-ah arpa chan an chang ta thin a, tin, thla tina sorkar atanga hlawh la thin turin an duhsak zawngte an thun thin bawk. Chutiang vela 'vannei' kan tihte chu fing kan tih chu an ni a, an thuin kan ram, Kohhran leh khawtlang a kal ta thin a ni. Chutianga tel pha ve lote tan chuan hahthlak tak a ni. Chutiang vel inthlak kum chu kan lo hmang liam ta. Chu rilru tho pu chung chuan 2010 pawh kan chuangkai ni maiin a lang a, mi tam takin thla tin hlawh an la ang a, mi thenkhatin ram leh hnam hming chhalin an hlawkna tur hna an thawk zel dawn niin a lang. Rilru thar han pu thei teh hlauh ila aw!

2010 hi Zoram tan kum tha ni se, mipuite'n malsawmna an dawn kum, kum hlimawm ni hlauh teh se.

Zozam Weekly chhiartute kum thar chibai kan buk che u a, he kum tharah hian duhsakna kan hlan a che u.