Jail-ah Krismas

Biak in kawtah chuan tlangval pakhat hi "kan vannei em em, lawmna ni kan tawng leh ta" tiin a zai ret ret a, chutih lai chuan "ruai a theh theih e" tih thawm a lo ri. A inher a, biak in chhung lam chu a pan ta a ni.


Chu biak in-ah chuan biak in dang ang bawkin Pulpit leh Maicham a awm a, a sir ding lamah chuan Kohhran Upa-ho thutna tur ni awm tak pawh a awm. A sir vei lamah erawh keyboard leh a tumtu thutna tur a awm a, midang an leng lo ang. Kohhran Hmeichhia an awm loh avangin Kohhran Hmeichhe hruaitu thutna tur an mamawh lo a ni ngei ang.

Pulpit hnungah chuan "Vawiinah hian in tan Davida khuaah chhandamtu a piang ta, Lal Krista chu" tih banner a intar a, a sir blackboard-ah chuan an Krismas inkhawm programme an ziak tlar dal mai. Thuhriltute hming bulah chuan "Upa" tih te a inziak ve a, mahse, chu'ng "Upa" te chu nemngheh an ni lo, jail run thim upa mai an ni.

Maicham hma lam chu mipui thutna a ni a, thutthleng sei an rem dal mai. |hutthleng hnung lam, biak in chhung hnung lamah chuan dawhkan lian pui pui pali a awm a, dawhkan chungah chuan bel lian pui pui an hung. Chu'ng bel-ah chuan buhchangrum leh sa a awm.

Jail tangte chu an intlar a, chaw an dawh a, ruai an theh ta.

December ni 24 zan, urlawk zanah an zai tui lutuk a, an zai tlaivar. Krismas hla hrang hrang an sa a, urlawk zan hmange ti lovin khawhar hla an sa nual bawk.

"Mi hrang hrang awmkhawm ngang hi kan nia, inkhawm ngai miah lo, Pathian hla sak tur hre mumal lo te hi an awm ve a. Mahse, chu'ng mite chu khawhar inah an kal ve thin tho a, Pathian hlaah chuan khawhar hla hi an thiam chhun a ni deuh mai. Chuvangin jail-ah chuan Krismas lai te hian khawhar hla kan sa fo mai," tiin kum 5 tang tawh pakhat chuan a sawi.

Tichuan, a hma zanah an tlaivar a, a tuk- Krismas ni-ah chuan an inkhawm a, tlai lamah ruai an theh ta a ni. Tlaivar hmel pawh an pu lo, an hlim ngang a nih hmel.

"Kumtluana kan nghah ve a ni a, hlim takin kan hmang a ni. Kan tlaivar a, mahse, hlim vanga tlaivar kan ni a, kan chau lo a ni ang," tang pakhat chuan a ti a, tlaivar zaka zai leh a chak thu a sawi nghe nghe.

Chu jail run thima tangte hruaitu pakhat chuan, "Kum tir lamah Chapchar Kut hman ve ngei kan tum a, kum tawp lamah Krismas kan nghak leh a, kan nghakhlel thin a nia. Krismas te hi chu kum tluana kan nghah ve tak meuh meuh a nia, a hlim pawh kan hlim thin. Kan ruai tur pawh hi kum tluana kan khawl a nia, kan 'ration' atangin kan khawl ngat ngat a, tin, jail chhungah hian kan inhlawh a, kan hlawhte chu kan thawhkhawm a, min khawngaihtute thilpek nen, hlim takin kan theh ve thin. Misual awmkhawm mah ni ila Krismas lai hi chuan kan hlim thin asin," tiin a sawi. Ani hi kum 7 tang tawh a ni a, jail chhung Krismas hlimawmzia chu a titi tui a ni.

Tang vengtu pakhat chuan, "An zai te hi an tui a nia, an zaikhawm tlaivar zak zak thei. An Krismas hi a Krismas bik riau te'n ka hre thin," a lo ti ve bawk.

Misual an nih an pawm a, miin an hmusit a nih paw'n an vui lo. "Hmuhsit tlak kan nia lawm," an ti mai. An hmel han enin milian fa hmel an pu lem lo a, anmahni ngei paw'n mi nunhniam te te an nih thu an sawi.

Milianin thil an tisual ve thin tho a, officer-te leh ram hruaitute'n an eiru thin tih chu an pawm dan a ni. Mahse, an tang ve ngai lo niin an sawi; chu chu mak an ti lo a, an vui hek lo. He jail-a tum engemaw zat lo tang tawh pakhat chuan, "Keini chu hrem tlak kan nia, tang tlak kan ni. Kan thil tihsual-ah pawh 'evidence' a awm ngei a, hrem tur kan ni. Miliante thil tihsualah chuan 'evidence' a awm lo a, tang tur an ni hlei nem... Khawvel dan a nia, chutiang te chu thil nihphung alawm..." tiin a sawi.

"Misual awmkhawm kan ni a, tumah inhmuhsit thei kan awm lo a, hetia Krismas hman hi a nuam zaphian. Chhungkaw kima Krismas hman te chu thlahlel ve mah ila kan tan tih ngaihna a awm lo, bakah haw mah ila mi min en dan a dang dawn tho a, hetia thiante nena hmanho hi keini tan chuan a hlimawm," tang pakhat chuan a ti.

"Min hremna hi ka pawm thlap, thil ka tisual ngei alawm. Hrem tlak ka ni. Miliante pawh thil chu an tisual, mi zawng zawngin chu chu kan hria ang. Mahse, an tang ve lo ang, milian an ni tlat alawm. Keini chu misualah pawh hrem tlak kan ni," tang pakhat chuan a lo ti a, a chhungte a ngaih thu a zep lo, an rawn tlawh ngei pawh a beisei. Mahse, jail chhunga amah ang bawka misualte nena Krismas hman chu a thlakhlelh thu a sawi mauh thung!

Central Jail-ah hian Krismas lai khan mipa 396 leh hmeichhia 27 an tang a, mipa 10-te chu damchhung tang tura tih an ni. Chu'ng misual, 'misual' intite chu Krismas hmang turin phur takin an inbuatsaih a, bawng 1 leh vawk 3 an thlung ran mai. Bawng leh vawkte chu an han en a, an thla te hial a muang thin.

Krismas huphurh chhan pahnih an nei; tui an harsa a, gas an tlachham bawk. "Tui hi chu kum tluanin kan harsa a, inbual tur pawh kan inruat ringawt. Kar khatah mi pakhat hi vawi 2 zel kan inbual," Prisoners' Welfare Committee hruaitu pakhat chuan a ti.

Eirawngbawlna gas pawh an harsa a, eirawngbawl nan pawh thing an thuahna a rei tawh. "Kan mithiamte'n ramngaw hlutzia an sawi an sawi a, keini chuan tihian thing kan tuah hem hem mai mawle," tang pakhat chuan a ti.

Central Jail-a tangte hian 'misual' inti mah se, mak ang reng deuh mai chu jail chhungah thil a bo ngai miah lo hi a ni!

"Insiamthatna lam hi kan thiam ang ang chuan kan kalpui ve. Tin, Zonunmawi kan inzirtir uar bawk a, aia upa zah te, tlawmngaihna te, tawngkam hawihhawm te hi kan phak tawkah chuan kan inzirtir ve khawp asin," tang hruaitu pakhat chuan a ti a, anmahni vengtu pakhat chuan, "Mizoram-ah 'home' engemaw zat kan nei a, jail tluka home tha hi a awm dawn em ni ka ti hial thin. Kutthemthiamna lam thlengin kan inzirtir a, nun siamthatna lam pawh kan tlin tawkah chuan kan uar ve khawp mai," a lo ti ve bawk.

Mahse, phur tak leh hlim takin Krismas hmang mah se anmahni-ah kim lo a awm; jail-ah chhungkua emaw 'someone special' emaw an nei tlat lo.

Krismas chu Mizote tan chuan 'hunpui' a ni a, eng tin emaw tak hian 'rau' a nei. Chu 'rau' chu Jail chhungah pawh a awm a, mahse, lunglenna leh khawharna a keng tel hle niin a lang.

"Mumangah bialnu te kan lo rim a, Krismas-ah eng nge ka present ang tih te kan lo ngaihtuah rauh rauh a. Chutah kan han harh a, jail tukverh 'bar' a lo inthung thut mai chu khawvel hi a tawp chiang thin a nia aw," tiin tang tlangval pakhat chuan a sawi.

"Kan awmna hi planet dang daih a nia, planet zawng zawnga planet thim ber a ni. A khawhar thlak a, chutih rual chuan khawhar hlir mai han awmkhawm hi a nuam ang reng viau bawk," tiin midang pakhatin a lo zawm ve bawk.

Nupui fanau neite chuan, Mizo pa tih takah, an lunglen thu an sawi tha duh vak lo a, an lunglen thu sawi tir tur khawp chuan kawm kual ve deuh hlek a ngai. An han sawi tak tak chuan chhungkaw kima Krismas hman chu an lo thlahle em em zel mai.

Tlangvalte chuan chhungkaw kima Krismas hman bakah ngaihzawngte nen ngeia hman an chak thin.

Duhthlang thei an ni lo a, duh thlan pawh an tum chuang lo. An tanna hmunah phur takin Krismas chu an hmang ve a ni tawp mai. Sakhuana lam chu thuhran ni se, Mizo tlangvalin Krismas a nghahhlelhna chhan thil hmuh tur a awm lo, mahse, an nghakhlel.

Chu'ng misual, sual inti tak takte chuan nghakhlel takin Krismas an thlir a, misualte chhandamtu piancham chu hlim taka hman tumin, calendar an en an en thin. A hun a lo thleng a, hlim takin Krismas chu an hmang ve ta a ni.

An ruai theh lai te chuan, "Chaw eikhamah tumah inhaw san lo ang aw... tihfel tur a tam a nia..." tiin an hruaitu pakhat hi a lo au lauh lauh mai. Inhaw san dawn pawh ni se khawiah nge maw an inhaw san ang le!?

Related Posts :