KUTPUI HUN

¢ HC Vanlalruata

Kan naupan lai atang tawh khan Krismas leh Kumthar hun lai hi chuan naupang deuh pawh zu in tan tum tlat pawl kan awm a. Tlangval zingah phei chuan zu in ngei ngei hun nia ngai an tam hle a. Chutih laiin zaikhawm/lenkhawm ngei ngei huna ngaite chu an lung a leng em em bawk a. Chutih rual chuan khuang nena Krismas hla sak duh tawklo, solfa ngata Krismas hla sak duh thalai zinga an tam avangin Krismas lenkhawmna in ni lo, in danga khurbinga thalai zai ta thuai thuai pawh an awm deuh ziah thin. Kutpui kan thlenga, mahni duhdanin kan hmang duh theuh a ni ber a. Kan naupan lai phei chuan Krismas hnu thla 9-ah nau an piang sup sup (sawn a ni ber) turah ngaihna lian tak pawh a awm thin a sin!

Tunah chuan a nih phung a dang deuh thei a, mahse, hman deuhva kan hman dan leh tuna kan hman dan, kan duhdan inmillo-te hi a la hrang lutuk lo mai thei. Sapho lokal hma chuan kan hunpui leh kut ni vangthla chu Chapchar Kut hunlai, Mim Kut leh Pawl Kut te an ni ber a. Chubakah chuan mihausa-in emaw lal-in emaw Khuangchawi leh khawtlang huap ruai an siam kha a ni leh mai a. Vailen hnu, sap nun leh sakhua-in min chiah tak hnu atang chuan Krismas leh Kumthar hi kan kutni vang thla chu a ni ta ber a nih hi. Chuvangin kan hun pui neih chhun kalkawp chho bawk si hman danah hian kan thiam hle a tul a ni.

Ti ve khanglang i la, kan naupan leh tlema len tawh hnu pawh khan tlang thing phurh, tlang tui chawi leh mipa naupang tan phei chuan hnah lak kha kumpui lingleta kan nghah hlelh, Krismas leh kumthar tinuama ti nghahhlelhawmtu a ni ve a. ‘Little Drummer Boy’ tih hla an phuah tih hre chuang lova khuang tlir kan chin laia kan han carol-a in pakhata thingfak pahnih/khat kan hlawh pawhin nuam ve tak a ni. Tunah chuan hetiang thil hi a awm ta meuh lova, Aizawl khawpui-ah phei chuan ruai hi kan theh tawk a ni tawh zawk.

Chutiang chu kan dinhmun a nih tawh si avang hian duhdan insaikalh pui pui awmkhawm hian engtinnge indip dallo leh hlim tak, harsatna insiam tawn lovin, a saptawng takin ‘civilize’ takin he kan kutpui hi kan hman ang tih hi a hnam puma ngaihtuah chi a ni. Kan duh fir lutukna lamah hian mi tana harsatna emaw buaina emaw siam pawh nilo hlim tum a, an thiam dan anga thil ti vete kha Krismas leh Kumthar hlimlo takin kan hman tir thei a. Zu in mite, phur leh phunglung hrim hrimte pawhin mi lungleng taka Krismas hla nena hun hmang duhte tan bengchheng kan siam thei bawk.

Sawi tak ang khan kan hun kal zelah hian kan thalai leh naupangte hi an chep a ni ngawt lova, khawvel inher danglamah tihtur, taksa ‘activity’ awm tam tak thin kha a awm ta meuh lova. Mizote lah hi mahni fate leh naupang zawkte ‘chumi chu ti rawh’ tih tur nei si lova, ‘ti suh’ ti ringawta kaihruai hnam, khap ngah hnam kan ni a. Chu chuan kan thangthar tha za leh ngaihtuahna chak tak takte hi bawm tawta khung ang deuhvah a inchantir thei a ni. Kan eizawnna kawng a lo danglam tak avangin khawtlang huau huau pawh a tlem a, nula-tlangval tan hlimhlawpna leh inhmuhkhawm ang kha a awm ta hek lo.

Hetiang hi a nih avang hian zalenna inrahbeh sak lutuk lo. Buaina siam leh midangte tana harsatna siamtute chu dan hmanga hrem hmak hmak chung si hian kal ta i la. Mi nuam tih dan leh nuam chen an tum dante kha dan bawhchhiatna leh midang harsatna siam zawng a nih loh chuan dawh theihna nen thlir ta i la. Kan hun pui hi a hlimawm zawk ang. Kan tam zawk tih vanga Urlawk zana mi kawngkal tha mai mai leia tiang vaw chunga an kalna lo zawh ngawtte hi chu ching tawhlo teh ang u.

Hetiang hun pui-ah chuan tapchhakah emaw leikapui-ah emaw lo zai ring deuh pawh inhre thiam i la, keini pawhin aurinna nen hunpui lovah pawh Biak In atangin kan au khuma ring tak tak thlengin mi mu duh tawhte kan au khum a, pawnah te kan pathian biak a beng a chhet ta maw tih tur khawpa ringin kan tawngtai ve thin kha tih ngaihtuah let i la. Mi fel ber nih chuha midang hmuh sual lutuk simin hlim taka Krismas leh kum thar lo thleng tur kan hman theihna’n thliarkar rilru paihin rilru zau leh mi hriatthiamna, dawhtheihna nen i lo hmuak teh ang u.

Vankhama’n ‘Kan ei kan in Krismas se’ a lo tih kha hre rengin Krismas leh Kumthar hlim taka hmang turin duhsakna ka hlan a che u.

Related Posts :