Tuirial Airfield-a bike racing ka en vawi hnihna

¢ PB Lalrammawia

Thla thum vel kal taah khan miin ka bike an ru a, min zawnpui turin Arama ka pun a, Tuirial Airfield thleng kan tlan a, Pathianni chawhnu lam a ni.

Tuirial Airfield-ah chuan bike an lo intlansiak a, thenkhat chu an lo inchawi a, helmet te pawh an dahkham ta awm e. Arama Yamaha bike FZ chuan ka han tlan ve chhin a, 100km/h chu ka hawlh kai ve mai, mahse lungte a tam a, ka chesual ang tih ka hlau a, 100km/h chu ka pel ngam lo; midang chuan ‘130km/h velin kan tlan tlangpui’ an ti. An speed a san theih nachhan hi chu, Airfield tawp atanga a lehlam tawp thleng ngil taka duhtawka an tlan theih vang a ni.

Thenkhat kha chuan kawr pawh an ha lo va, helmet pawh khum lovin vung fe fein an tlan a, han chesual palh ta se, damkhawchhuah a harsa fu mai thei. An tha za kha an lim zuai zuai a ni ber. Car pakhat a lo thleng a, bike nen an han intlansiak leh a, car chuan a umpha lo, Swift car a ni.

Ni a sa a, intlansiak an chawl a, thingbuk hnuaiah an chawl hahdam a. Eng eng emaw ka zawt kual a. Nidang angin chumi ni chuan intlansiak an tam lo tih an sawi a. Bike intlansiak an neih thin dan min hrilh a, Pathianni apiangin Tuirial Airfield-ah chuan intlansiak an awm thin tih an sawi a, bike inang chauh an intlansiak thin. Chesual an awm tawh em tih ka zawt a, ding hman lova tlan tlang an awm thin tih an sawi; mahse, hnim kara tlan lut an ni a, an na vak ngai lo a ni awm e.

Thalai ten intihhlimna an mamawh thu leh bike racing te pawh huaihawt ni thei se an duh thu an sawi laih laih a. An thusawi kha ka bengah a la cham reng.

Tichuan Yamaha bike racing chu huaihawt a ni ta tak tak a, chu chu November 21, 2009 Inrinni kha a ni a, kei pawhin ka en ve ta ngei a.

Khami ni khan....

Tuirial Airfield lam panin bike tawng tawh tak ka khalh ve bauh bauh a, Angaiha ka phur a, Laltana'n TP-a a phur ve thung a. Zero Tolerance lai a ni a, Thuampui-ah min lo tiding a, document ken loh avangin Rs 100/- ka han chawi pang a. Kan tlan zel a, Bung Bangla thlen hma deuhvin Laltana bike ke a chhia (puncture) a. Tools kan lo keng si lo, hrilhhai takin kan ding ta thap mai a.

Tuirial Airfield lam pana bike liam zut zut chu kan thlir liam zung zung a. Chutia hrilhhai taka kan din khawm laih lai chuan Para of Vanglaini chu amah chauhvin a rawn lir thla bap bap a. Kan lo phar ding a, vanneihthlak takin tools a lo keng hlauh mai. Kan rei deuh dawn avangin Angaiha chu Para hnunga bet mai turin kan ti a.

Tuirial Airfield lam pana tlan liam zut zut ho tawk zawngin bike ke phur chungin Zemabawk lam panin kan tlan let leh ta vuk vuk a.

Bike ke kan siamtir lai chuan nu pakhat chuan Airfield lam pana bike leh lirthei tlan chu tam hi a lo ti tawh khawp mai a. "Tuirial Airfield pawhin a dawl ngut tawh lovang. Zing atang khan chatlak lovin an tlan liam reng mai a, nangni phei chu in lut thei tawh dawn em ni?" a ti. Chutia a sawi laite chuan lirthei chi hrang hrang chu an liam thla hum hum reng a.

Dar 12:00-ah bike ke chu kan vuah pum leh thei hram a. Kan han tlan a, Tuirial Airfield peng thlen hma deuhvin a ke ngai bawk chu a chhe leh ta. In lam atanga lo tlan tur kan nau pakhat chu tube thar rawn lei turin kan chah ta ngawt a. Laltana nen bike intlansiakna lamah kan liam zui a, TP-a erawh bike bulah kan hnutchhiah a.

Kawng chu a zimin a chhe khawp mai a, kan tlan thei tawk tawk a ni. Tuirial Airfield lan theihna kan han thleng chuh, Thangkura'n a maaaka maka tam a tih ang deuh khan, bike chu a maka maka tam a lo insir khup mai a. A hmun thleng thei lo, bike leh car thahnem fe mai chu kawngsir a rem lai laiah a inhung thup mai bawk a. Keini pawh kawngsir a rem laiah kan han inhung ve a, ke-in Airfield kan pan a.

Kawngsir hnimbuk hnuai chu a fai thelh hun hlawm a, hmun thenkhatah chuan thalai hi an lo thu bial laih laih a, daihlim an bel a, dispo cup a lar hle bawk.

Intlansiakna tualzawl kan han thleng thla chu mipui an lo tam khawp mai a. Intlansiakna tur chin rinkual bak chiahah chuan thuah thum thuah li tein an lo ding tlar thup mai a, a thleng hnuhnung tan chuan mihring tukkhum bak hmuh tur a awm meuh lo.

Hmun remchang lai zawngin thui fe kan kal leh a, mi thawlna deuh laiah chuan ka inti huangtau lui ve deuh a, tlar hma lamah ka inhnawh tawlh tawlh a, camera-in ka han hawl kual ve ngial a.

Hei hi Tuirial Airfield-a bike racing ka en vawihnihna chu a ni ta a ni.

Intlansiakte tlanna tur chin rin ki-kiau kha a kawi ve nak nak hle a, hmun thenkhat kha chu a zim hle bawk. Mizo ten kan beisei anga tlan chaka inel ni lovin, tlan thiama inel an ni ber. Kan thlen chinah mi pathum an tlu a, an tawlh ve han han mai. Ka bula mi chu ka zawt a, “In lo thlen hma khan mi panga chu an lo tlu tawh a, pahnih chu ambulance-in an tlanpui,” a ti a. A hnuah official-te ka zawt leh a, hliam tuar zingah na tak an awm lo va, first aid pek ngai chu an awm ve awm e, tih chu ka thu dawn dan a ni leh mai.

Intlansiaka tlan te aimah khan...kei tiamin, safety pek ngai ber mai chu mipui kha kan va ni tehlul em! Hmanhmawh leh chak taka tlan lai bike kha kan kil tuau tuau mai a, hmun thenkhatah kha chuan an tlanna tur kawng kha kan dal lo chauh a ni mai a. Mobile phone handset hmanga thla lo la te khan, midangin an hliah loh nan an lek chhuak duh theuh si a, intlansiak lai te kha an va khawih fuh pha thuak mai awm e tih hial tur a ni.

Security duty-te phalnain rin chhung lamah thla ka la ve bawk a, a ‘den’ duh khawp mai.

Bike racing ka en tawh zawng zawngah a la bon ber awm e!

A technical lam sawi tur ka hre ve vak lo; bike racing huaihawttute leh huaihawt a nih dan chu chanchintharah kan hre kur ngiai nguai tawh a, ka hriat chhun chu - Khati khawpa bike racing kan lo lawm kha ... nau paw chunga kal chu sawi loh, khualzin phur motor eng emawzat kha an rawn peng lut bawk.

Airfield Veng mipuite khan khatiang khawpa tam mikhual kha an thleng leh tawh ngai awm lo ve. An kawtkai lawka lirthei chitin reng mai insir khup leh kawngpui khat mup mup khawpa mipui han insulpel vel kha engtikah tak tawng leh ang maw? Pu SL Sailo tawngkam han hawh lawk ila, "Khawvelah mi chi hnih kan awm a, Builum khua hmu tawh leh hmu ve miah lo tur" a tih angin, kha bike racing kha, "A hmuna hmu leh hmu ve miah lo tur" kan awm ta a ni.

Chawhnu dar 2 velah bike ke chhia siampui turin Airfield kan chhuahsan e kan ti a, keini ang bawka Airfield chhuahsan duh kha an lo tam hman hle mai. Mahse, Airfield lam pana lo kal an la tam avangin, traffic duty awm ta lo chu kawnglakah kan intawk a, tawlh thei bik chuang awm lovin rei mawi tawk tak kan indinchilh a. A lo lut tur lam an insiamrem hret hret a, kawngsirah an lirtheite dahin kein Airfield lam chu an pan ta ringawt mai a ni; Km khat vel chu kea an kal a ngai ve hrim hrim.

Bike racing ka en atanga ka ngaihtuahnaa lo lut chu, Mizote hi bike racing-ah khawvel hriat khawpin kan invawrh chhuak thei ang em tih ai mahin, "Khawpui chhung kawng chep taka bike-a chak tak taka tlan zuai zuai ho kha kha Bike Racing-ah khan an tel ve ang em?" tih chu a ni.

Mipui te hian bike intlansiak hmuh kan chakzia chu bike racing huaihawt a nih atang khan a lang chiang tawh a, intlansiakna hmun ni lo, khawpui chhunga chak tak taka bike tlan te hi mipui hian hmuhnawm kan ti tho ang em tih hi zawhna pakhat chu a ni.

Related Posts :