O for Onion, G for Gas, B for Buhfai, T for Tui!

2008 kum tir lamah khan NDTV-in an interview tumin India ram prime minister Manmohan Singh chuan India ram mipuite tibuaitu harsatna hrang hrang a ngaihtuahin zan a mut theih loh phah thin niin a sawi. Heta harsatna a tih zinga lian ber pakhat chu nitin eichawp man pung zel chungchang a ni.

Eichawp man pung chungchang sawi nikhuaah India ramah chuan rilru-ah purunsen a lang thin. Purunsen ei nasa tak India ram mipuite hmaah hian purunsen chungchangah politician-te'n thutiam an nei thin a, keini'n eirawngbawlna gas leh buhfai kan buaipui ang hian vaiho chuan purunsen an buaipui ve a ni ti ila kan sawisual tampui lo ang.

Congress-in auhla ber pakhatah an neih a, BJP pawhin chuti tho. Anni chang a ni lo, India ram political party liante chuan auhlaah an neih deuh vek. 1980-a Indiri Gandhi a lo let leh theihna chhan kha purunsen vang niin India ram politics chikmite chuan an sawi a, 1993-a Delhi inthlana BJP chakna pawh khan purunsen thiltihtheihna bawk nia sawi a ni. Vaiho tan - 'O for Onion', Mizote tan - 'G for Gas, B for Buhfai, T for Tui' a ni mai awm e. Keini tan chuan 'S for sawhthing' te pawh a tih theih ang.

1993 inthlana an chak phahna purunsen kha 1998 inthlanah chuan BJP hian Delhi inthlanah an tlakpui ta thung. Sorkar hmasa hun lai khan kum tina kan buaipui thin sawhthing chu kan buaipui kum tin a, an term tawp kum, nikum kum tawp lamah erawh a ziaawm deuh. Tunah sorkar thar kan nei a, sorkar tharin fiahna a hmachhawn hmasakna chu eirawngbawlna gas, buhfai, tui leh eichawp thil hrang hrang man to chungchangah hian a ni awm e. Manmohan Singh-a chu purunsen man a to avangin a mu hlei thei lo a, kan chief minister hi chutiang chu ni ve tak maw!

Tun hnaiah eichawp thil man hrang hrang a to deuh thut a, chhungkaw tam tak an buai hle. Ni tin khawsakna atana thil pawimawh hrang hrang- eirawngbawlna gas a harsa hle a, tui a vang hle a, buhfai man a to bawk. Dal, alu leh eichawp thil a to chak em em mai. Gas leh tui chungchang bik hi chu kan politician-te inbeihna a ni kumkhua a, eichawp thil to leh harsa tih vel erawh kan buaipui lutuk lo. Chhungkaw tin nghawngtu ni si chuti teh chiama kan politics a nghawng lo hi thil mak tak a ni.

Kan politics a nghawng lo a, kan sorkar pawh a che eih lo. Democracy inrelbawlna hmanga kum 50 chuang kan inrelbawl hnu-ah pawh sorkar mawhphurhna kan la hre lo hle tihna a ni.

Ram zalen-ah kan awm a, mahse, heta zalenna kan sawi hi duh dan dana sapa-tal theihna tihna a ni lo. Dan a awm ang a, a lekkawhtute'n an lekkawh ang. Dan chu mipuite tana a tha thei tur ang bera siam, ram leh hnam a him theih nan leh hma kan sawn theih nana siam a ni tur a ni. Chu'ng dan chu uluk taka lekkawh a ni ang a, chumi hnuaiah chuan zalen takin kan awm ang. Chutianga khawsa ta lo chuan kan duh dan danin kan tal ta a, kan zalen ta mah mah ni hialin a lang. Chumiin a nghawng lian tak pakhat chu thil man to hi a ni. Khua leh tuite hi 'consumer' vek kan ni. Thil tha kan lei ang a, ei chi a nih pawhin a him leh ei tlak chauh kan lei ang. A quality mai ni lovin a man lamah thlengin, a man nena inphu tawk zelin thil kan lei ang. Chutiang a nih theih nan chuan mipuite tana ding sorkarin hma a la tur a ni. Chutiang chu sorkar mawhphurhna a ni tih a hriat vangin a ni Manmohan Singh-a chu purunsen man a to changa a mut tui loh thin ni! Mahse, Mizoramah chuan chutiang zawnga hmalakna mumal a awm lo a, a hmalatu tura sorkarin a rawihte pawh chutiang ti tur khawpin kan thuam chak lo. He ram hian 'consumer protection' a ngaihtuah lo, ram hruaitute'n an vei lo. Mipuite paw'n an vei chuang lo niin a lang.

Chutiang chu a ni a, tu pawh sumdawng ila kan hlawk theih dan tur berin kan che mai thei e. A tawpah "rel-in Sairang a thlen chuan thil man a tlawm ang" kan ti leh ringawt a, thil man to chhan hi rel hmanga bungrua kan thiar luh loh vang a ni lo, consumer protection kan ngaihthah vang zawk a ni.

Thil man to chungchang hian kan ram hruaitute lu a ti-hai lem lo niin a lang a, chuti taka consumer-te himna ngaihthah a nihna ramah thil man a to thur thur lo hi a mak zawk asin! Eichawp thil leh ni tin khawsakna atana kan mamawh thil te hi a vang lo ngawt zawk asin!