Mizo Vrs Tuikuk Friday the 13th, Zarzokima thih ni

Gioachino Antonio Rossini (February 29, 1792 – November 13, 1868) chu "The Italian Mozart" ti hiala koh a ni a, hlaphuahthiam hmingthang, Italian-ho ngaihsan em em a ni.


Italian-pa tih takah Zirtawpni chu vanduaina ni-ah a ngai a, 13 pawh vanduaina number-ah a ngai. A thil hlauh pahnih chu amah nen sawi zawm a ni lo thei ta lo, November ni 13, Zirtawpni-ah tak a thi tlat! Chu chu 1868 kha a ni.

Zirtawpni hi ni 13 a nihin khawvel mi tam takin vanduaina ni-ah an ngai a, Italian-ho phei chu he thil hlau hleah ngaih an ni. Italian chang an ni lo, khawvel hmun hrang hrangah he thil hlau hi an tam hle a, thawnthu pawh a ngah hle.

Sap tawng chuan 'Friday the 13th' an ti a, he thil hlauhna hi 'paraskevidekatriaphobia' tia sawi a ni. Eng tik lai atangin nge he thil hi mihring te'n kan hlauh tih chu hriat a ni lo a, ziak hmuh theih upa ber chu Gioachino Rossini chanchin ziakna bu, 1869-a tihchhuahah a ni. He Italian hlaphuahthiam hi a ni hlauh tak, 'Friday the 13th'-ah a thi a, chu chu a chanchin ziakna bu-ah hian tarlan a ni.

'Friday the 13th'-ah tak chuan Mizoramah pawh thil duhawm lo tak pakhat a thleg; November ni 13, Zirtawpni, 2009-ah Bungthuam tlangval, kum 17-mi Zarzokima a thi!

Lalngilneia fapa Zarzokima, hi Bru Revolutionary Army ni-a inchhalte'n an kaphlum a, Bungthuam leh a chhehvel khaw tlangvalte chuan na an ti hle. Bungthuam khuaah hian an pungkhawm ve nghal a, Tuikuk laka chet ve tum te pawh an awm. Ni 13 zanah lumenpui a ni a, hetah pawh hian khaw thenawm tlangval an thahnem hle.

"He vanduaina an hriat veleh khaw thenawmte an rawn pungkhawm nghal a, kan rilru a na tlang khawp mai. Amaherawhchu, tih theih vak a awm si lo," tiin Bungthuam tlangval Thangchhuahkima chuan a sawi.

Zarzokima hi vawkchaw (dawl) la tura a kal chu, khua atanga kilometre chanve vela hlaah mi tu tih hriat loh te'n an kaphlum a, khua atang pawhin silai ri hi an hre phak a, silai rik hun hi tukthuan eikham dar 9:30 vel a ni.

Ramhnuaiah hian, hla vak lovah Bungthuam tlangval Lalrinsanga a lo awm a, ani hian silai rikna hmun chu a pan nghal a, mahse, a thlen hma deuhin silai a puak leh a, khuaah thil awmzia sawi turin a tlan haw ta nghal niin Bungthuam atanga thudawn chuan a sawi.

"Rinsanga hian Zarzokima hi a va hmu hman a, a hmuh lai chuan a ban pawh a la che a, mahse, tunge a nih tih erawh a hre lo. Silai a ri leh a, zualko turin a rawn tlan haw ta a ni," tiin Thangchhuahkima chuan a sawi.

Kanhmun police te'n an buaipui nghal a, mahse, mipui leh police an thlen hian Zarzokima chu a lo chatthla fel tawh. A nak veilamah lehkha leh silai mu pakhat a lo inzep a, lehkha-ah hian 'he thil hi kan duh reng vanga ti kan ni lo, mahse, a tul a nih chuan a aia na pawhin kan la che leh ang, Mizoram sorkarin fahrawn enkawla min enkawl hi na kan ti' tih hawi zawngin sap tawng ulh takin a lo inziak a ni.

Bungthuam-ah hian khaw chhehvel tlangvalte pawh an pungkhawm nghal a, tlangval engemaw zat chuan Tripura-a Khakchang refugee camp an pan nghal bawk. Mahse, Tripura Police te'n lo dangin kal lo turin an ngen a, 'keini pawhin zawnchhuah kan duh a, min lo ngaichang rawh u' tiin an lo thlem niin a kal ve pakhat chuan a sawi a, Tripura Police te hian 'a tul a nih chuan silai pawh kan pe ang che u' an ti hial niin chu tlangval chuan a sawi nghe nghe.

"Tuikuk-ho hi an lo inralring ve a, hriamhrei te pawh an lo keng a, min hlau lo khawp mai. Tuikuk pawh kan ngam tawh lo," chu tlangval chuan a ti bawk.

Khakchang camp hi Bungthuam atangin ke-a minute 10 vel kal a ni a, Mizoram chhuahsantu Tuikuk-ho an awm a ni.

Bungthuam khaw rama lonei Tuikuk mi 15 vel chu fimkhur thu-ah an hreng ve nghal a, mahse, tharum an lek lo a, in pakhatah khungkhawmin chaw te pawh an pe.

Bungthuam-ah hian Mizo police te an thleng ve nghal a, tlangval thinrimte pawh insum tura ngenin, thil duhawm lo a thlen loh nan an duty a ni.

"Kan MLA Pu Lalrinmawia Ralte, Kanhmun atanga a rawn haw lam an lo chang zawk emaw'n le ti te pawhin a then chuan an ngaihtuah a, MLA an chanchhuah loh avangin midang an hmuh remchan an kap ta te pawh a ni thei. Rinthu vek chu a ni na a, thil ni thei chu a ni," tiin Bungthuam atanga thudawn chuan a sawi.

Aizawl atangin MZP hruaitu mi 25 velin Bungthuam hi an pan ve nghal a, MZP te hian thuchhuah siamin, "He thil hi MZP chuan na a tiin kutthlaktute hi a dem tak zet zet a, Mizoram sorkarin Tuikuk anmahni duh thu ngeia Mizoram chhuahsantute Mizoram mi leh sa ngeite lakluh a tum laia hetiang thil a thleng hi Mizo mipuite zah lohna leh chonaah MZP chuan a ngai tlat a, a rang thei ang bera thuneitute'n Tuikuk misualte hi chhuichhuaka na taka hrem turin MZP chuan sorkar a phut a ni. Sorkarin lakluh a tum laia hetiang thil a thleng hi MZP chuan Tuikuk-te Mizorama an lo luh duh lohzia entirnaah a ngai tlat a ni," an ti.

Bungthuam hi in 150 vel khua a ni a, Mizoram khawthlang lama awm a ni a, Langkaih luiin Tripura nen a dang a ni. Langkaih lui bul Tripura lamah Tuikuk khaw 2, Urie leh Santipur a awm a, he'ng lai velah hian Tuikuk nen an inchen pawlh ang reng hle. Tun hnaiah Thinghlum khaw bulah Tuikuk in 30 vel an pem a, in te an sa a, hei hi Tuikuk lakletnaa sorkar ruahmanna nge tih thu-ah he'ng lai velah hian titi a awm mek.

Zarzokima hi November ni 14, Inrinni chhun dar 11-ah khan vuiliam a ni.

Zarzokima vuinaah hian khaw chhehvel mipui an thahnem hle a, Aizawl atangin MZP hruaitute leh CYMA hruaitute an tel bawk. Thlan lai pawh an thahnem hle.

"Zarzokima vuinaah hian mipui an thahnem a, mi reng reng kha an rilru a na tih a hriat, an ngui nghuai vek mai. Rilru na tak, lungawi lo tak hmel an pu," tiin he huna tel, MZP president VL Krosshnehzova chuan Zozam Weekly a hrilh.

CYMA vice president C Zoramliana, Langkaih Group YMA president, Hachhek Constituency Development Council aiawh, bialtu MLA Lalrinmawia Ralte leh MZP president te'n thu an sawi a, vui zawhah a ruang hi a duh apiang tana enna hun hawn a ni.

Thlanmuala an vuih zawhah Bungthuam Community Hall-ah mipui an kalkhawm a, Mamit Sub-Hqrs president, Langkaih Group YMA aiawh, Taitesena Group YMA aiawh, CYMA vice president leh MZP president te'n thu an sawi.

He hunah hian mipui lungawi lote hian awm mai mai har an ti hle a, thusawitu leh valupa te'n inbengdai tura an ngen hram hram chung pawhin awmhmunah an insehruh hle.

"Mipuite hi an thin a ur khawp mai a, chet ve dan tur sawiho tura kalkhawm emaw an inti a, che ve tur pawhin an inpeih hle niin a lang. Mahse, hruaitute'n fim taka chet a tul thu an sawi a, thinrim hrithla buan buan lo turin an ngen bawk a," tiin he huna tel pakhat chuan a sawi.

"Khaw chhehvel atanga kalkhawmte hian Mizopa takin iptepui leh chemtum an keng hlawm a, mahse, tharum thawhnan tuma'n an hmang lo," a ti bawk.

"Thusawitute hian an rilru nat thu leh he thil thlengin a thawn thu an sawi hlawm a, he thil thleng hi hriatreng tul an tih thu, mahse, Mizo hnam tana thil tha lo thlentir zawnga chet ve a hlauhawm thu an sawi vek," kalkhawm zinga pakhat chuan a ti.

Zawlnuam police te chuan Zarzokima thih thu-ah hian rinhlelh thilah mi 16 an la nghal a, an zinga a tam zawk chu refugee camp-a awm an ni. Mizo tawng thiam lo pawh an awm.

Bungthuam khawtlang chuan an khaw venhimna hna an thawk ngawrh hle a, zan lamah pawh tlangval an duty thin.

"Tuikuk-ho an rawn che leh ang tih te pawh thil awm thei a ni a, min hlau lo em em a, chuvangin uluk taka duty a ngai," thudawn chuan a ti. Bungthuam-ah hian in tinin zanah bathlar-ah electric light tin-en tur an ti bawk.

Tripura lam, Zampui Hills-a Mizote pawhin he thil thleng vang hian Tuikuk laka inven hna an thawk nghal a, khaw hrang hrangah tlangval chhuakkhawmin an duty hlawm.

Zampui tlangdung-ah hian Mizo khaw 10 a awm a, Tuikuk nen an inchenpawlh avangin, Tuikuk-in an tibuai thei tih hriain fimkhur thu-ah mahni khaw venhim hna hi tlangvalte'n an thawk nghal a ni.

"Nunau chu kan thlabar a, a chhan chu Tuikuk thinrimin min tibuai mai ang tih hi keini tan chuan a hlauhawm khawp mai a, an pawng tual tual mai si a. 1997-a Mizoram atanga an chhuah pawh khan Tripura Mizote chuan kan lo tuar tawh a, khatiang kha a thleng leh ang tih kan hlau a ni," tiin Zampui tlangdung khaw lian Benghliangchhip nula pakhat, Te-i chuan Zozam Weekly a hrilh.

"Zirtawp zanah kha chuan kan la hlau vak lo a, Inrinni zanah khan tlangvalho an duty tan," a ti a, Inrinni zanah chuan ngawrh leh zualin Behliangchhip Branch YMA te an duty ta a ni. Khaw dangah pawh tlangval an duty hlawm.

A kaikuang chu
Tripura-ah Tuikuk engemaw zat chu refugee camp-ah India sorkar ruahmannain enkawl an ni a, he'ng Tuikuk-te hian Mizovin an umchuah avanga Tripura-a tlanchhia niin an insawi. India sorkar pawhin raltlan-ah a ngai. Amaherawhchu, Mizoram an chhuahsan lai thil hretute chuan he'ng Tuikuk-ho hi raltlan-ah an ngai thei lo.

Tuikuk chungchang chuan Mizoram a tibuai reng a, silai leh hriamhrei hmanga an tihbuai chu thuhran, raltlan anga an insawi avang ringawt pawh hian Mizoram chu a buai a ni. Hmingchhiat leh tlangrel a phur nasa a, lalet leh tura tha thawh a ngai bawk. Kum 10 chuang a liam ta; mahse, vawiin thlengin chu buaina chu a la kiang thei lo.

Bru National Union (BNU) te'n September ni 23&24, 1997-a Saipuilui khuaa khawmpui an nei kha he buaina lo intan dan tiin a sawi theih awm e.

Saipuilui khawmpui-ah hian hmun hrang hrang atangin palai 400 vel an kalkhawm a, Tripura atang te pawhin an kal. Mizoram-ah Autonomous District Council neih a nih theih nana hmalak an rel a, mei an dep kang tan ta a ni.

Tuikuk-ho thu leh hla chuan Mizo mipuite a thawng hle a, a bikin Tuikuk bit deuhna khawthlang lam a thawng lehzual tiin a sawi theih ang. Hetih lai hian Parliamentary Committee on Petitions-in Mizoramah Chakma te puala UT siam a lo rawt ve mek bawk a, chutah Tuikuk-in ram an lo ngiat ve bawk, Mizo mipuite thin a khei hle. Dan lova rawn pemlutte'n Mizoram an sat hek tur a ni lo tih chu mipui ngaihdan a ni.

Tuikuk-ho thil tum, mumal taka dodal hmasatu chu Mizo Zirlai Pawl, Mamit Headquarters te an ni awm e. October ni 14, 1997-ah Rengdil-ah meeting an nei a, chutah chuan Tuikuk-ho thil ngiat an pawm loh thu leh dodal an tum thu an rel a ni.

Chutianga thil a kal takah chuan a Tuikuk-ho-a tak pawh an thlamuang lo a, Mizoram an chhuahsan tan ta.

Bru National Union leh Bru Students Association (BSA) te chuan an mi leh sate chu Mizoram chhuahsan turin an ti a, Tuikuk khaw hrang hrangah zinkualin, autonomous district council an ngiat zui zel tur thu leh a tul a nih chuan ralthuam pawh an chelek tur thu te sawiin, an mi leh sate chu Mizoram chhuahsan turin an hrilh kual ta. Hetih laia BSA president, Bruno Mesha leh A Sawibuanga Riang te, R Laldawngliana te chu he thila a meizang hlaptu-ah police te chuan an ngai.

BNU hnuaiah chuan ralthuam lek pawl, Bru National Liberation Front (BNLF) tia vuah a ding ta. He pawlin hriat a hlawh tanna chu October ni 21, 1997-a Lalzawmliana an thah kha a ni awm e.

Lalzawmliana hi Damparengpui-a forest game watcher a ni a, October ni 23, 1997-ah BNLF te'n an that tih hi hriatchhuah a ni. Khawtlang mipuiin an zawng a, police te leh BSF te pawh thil tha lo a chhuak ang tih hlauvin ngawrh takin an duty nghal.

Lalzawmliana ruang zawngtute hi police leh BSF te hian thil tha lo a thleng ang tih hlauvin Tuipuibari-ah an dang nghe nghe.

Mizo mipuite chu Tuikuk-ho chungah an lawm lo hle a, an rilru a na hle. Hetih lai hian BNLF lam chu an mi leh sate tlawhin an zinkual a, Tuirum, Khamrang, Falkawn, Hnahthialzawl leh Damparengpui-ah te kalin Tuikuk-te chu a rang thei ang bera Mizoram chhuahsan turin an hrilh a ni. An hrilh mai ni lovin thu an pe a, Mizoram Police te'n Tuikuk an bei dawn niin BNLF te hian an sawi hial.

October ni 23 leh 24, 1997-ah Tripura atanga lo kal BNLF mi leh sa ni-a hriatte'n Zawlpui an tlawh a, a zan la laa Mizoram chhuahsan turin an hrilh a, Tuikuk chhungkaw 30 chuan Tripura an pan nghal. Hei hi Mizoram an chhuahsan tan dan tiin a sawi theih ang.

November ni 23, 1997-ah BNLF te chuan November ni 26, 1997 hmaa Mizoram chhuahsan turin Tuikuk-ho chu an ti zui.

BNLF te hi an tang hle a, November ni 30 zanah Khawhnai-ah an kal a, Tuikuk-ho chu Mizoram chhuahsan nghal turin a vauin an vau. Tuikuk chhungkaw 3 chuan he khua atang hian Mizoram an chhuahsan nghal.

Mahse, BNLF te thu zawm chu awm bawk mah se a zawm lo pawh an tam. BNLF te chu tha thlah lovin an tang a, 1997 November thla tawp lamah chuan 'order' chhuahin, December ni 25, 1997 hmaa Mizoram chhuahsan turin Tuikuk-ho chu an ti leh a, he thupek hi zawmin Tuikuk-ho chuan Mizoram an chhuahsan ta nguah nguah mai.

Chutiang chu Tuikuk-hovin Mizoram an chhuahsan dan chu a ni a, Mizoramah autonomous district council an ngiat laia Mizoram chhuahsan tul an ti mauh mai hi thil mak tak chu a ni.

Mizoram chhuahsantute hian Tripura an pan tlangpui a, an kal kawngah Tripura-a Mizote, Zampui Hills leh Sakhan Hills-a chengte an tibuai hle bawk. Sakhan Hill-a Mizote phei chu an tlanchhuak hial.

India sorkar chuan Tuikuk-ho hi raltlanah pawmin, Mizoramah an him loh vanga tlanchhiaah a ngai a, Tripura-ah hian relief camp 6 siamin Tuikuk-ho chu an enkawl ta a ni.

Bru National Union (BNU) te chu National Human Rights Commission (NHRC) hnenah an zualko nghal a, Akhil Bharatiya Vanvasi Kalyan Ashram te'n an pui bawk. National Human Rights Commission hnena an lehkha thehluhhi union home minister leh Mizoram sorkar-ah a copy an pe bawk.

National Human Rights Commission hnena an zualkonaah hian Tuikuk khaw 41-ah in 1,391 zet Mizote'n an hal a, Tuikuk hmeichhia 44 Mizote'n an pawngsual tiin an ziak. Mandir/temple 29 chu Mizote'n an tichhia a, Tuikuk 8 an that a, chin hriat lohvin mi 8 an awm zui tiin an ziak bawk.

Mizoram Police te chuan BNU te thil sawi hi an chhui zui a, hmeichhe 44 te'n pawngsual an tawk tih thu-ah chuan, pawngsual tuartu nia an sawi mi 28 an kawm a, 'min pawngsual e' titu mi 12 an kawm bawk. He'ngah hian finfiahna engmah hmuhchhuah a ni lo a, hmeichhiate hian police te hmaah sawi tur pawh an hre mumal lo. Mizote tihhmingchhiat tumna mai maiah a ngaih theih tih chu a chhuitute ngaihdan a ni.

Mizote kuttuara thi ni-a an zualkona memorandum-a an tarlan, mi 8-te chungchang pawh police te'n an chhui a, chuta an chhuichhuah dan chu tiang hi a ni:

(i) Radison (70), Tumpanglui: A upa tawhin a chak lo hle a, Mizoram chhuahsan tuma a kal kawngah tluin nikhaw hre lovin a awm zui a, a thi ta.

(ii) Maiisaihti (7) Ramchondor, Kananthar: Maiisaihti te hi Assam-a Gurguthi khuaah an tlanchhia a, he khuaah hian damlohna vangin a thi.

(iii) Parajoy (30) s/o Rindika, Hnahthialzawl: He khuaa mi Bonoy-i chuan an khua hi Mizovin an tibuai lo tih a sawi.

(iv) Kirnojoy (2) s/o Soilena, Hnahthialzawl: Tuikuk nu Nasingrung (57), Zurdoram chuan Kirnojoy hi Tripura-a relief camp-ah natna vangin a thi tih a sawi.

(v) Nobodi (70): Nobodi-a hi Mizote thah a ni lo tih chhuichhuah a ni a, hmeichhe pakhat, Mileti-i, Mizovin an pawngsual nia insawiin an that nia a sawi avangin Nobodi hi Mizovin an that ni-a sawi a ni ta ni-a ngaih a ni.

Mizote kut tuara thi nia memorandum-a an tarlan midang 3-te erawh an chhungte emaw anmahni hrechiangtu emaw zawnchhuah zawh an ni ta lo.

Engpawhnise, Tuikuk-ho chu Tripura-ah raltlan enkawla enkawl an ni ta a, BNLF te'n ralthuam lekin Mizoram an bei zel bawk. BNLF bakah ralthuam lek pawl dang, Bru Liberation Front of Mizoram (BLFM) a ding zui bawk.

Tuikuk vanga Mizote tawrhna
Sakhan tlangdung chu Mizote ram, Mizote chenna a ni. A thlangtla thui pawlte awmna a ni a, mahse, British lak atanga India-in zalenna a neih dawna ramri siam a nih laiin Tripura-ah rinluh a ni. Chu tlangdung-ah chuan Mizo khua 4 a awm a, Sakhan Tlangsang, Sakhan Serhmun, Tualsen leh Lungthir te a ni. He tlangdung khaw pakhat Upper Dosda-ah Mizo engemaw zat an awm bawk.

Huansiam, loneih leh serhmun siam tein Sakhan tlangdunga cheng Mizote hian ei an zawng tlangpui a, mahse, an in leh lo bakah an huan zawng zawng thlengin an chan ta.

1997-ah Mizoram atangin Tuikuk-te chu Tripura-ah an tlanthla a, Tripura-a Mizote, Zampui tlangdung leh Sakhan tlangdunga chengte chu an zu tibuai ta a ni.

Zampui tlangdunga chengte chu an umchhuak em lo a, Sakhan tlengdunga chengte erawhin an hmunhma zawng zawng an chan ta.

Upper Dosda-ah hian Mizote leh hnam dang an chengho a, Mizote chu Tuikuk-ho hian an bei thut a, in chhungah te an luhchilh hial. An bungrua leh huan te an tihchhiatsak a, chu khuaa Mizote chuan hlau bak lengin an in leh lo an tlanchhuahsan ta a ni.

Tuikuk-ho hian khaw danga Mizote pawh an bei a, an huan te, an ser kung te an tihchhiatsak a, khaw 4-a Mizote chu Assam Rifles te venhimna hnuaiah hruaichhuah an ni ta a ni. Upper Dosda tih loh khaw pali-a Mizote hi Ramthar Ni, January ni 11, 1998-ah hruaichhuah an ni.

He'ng mite hi Mizoram-ah an inbengbel zui tlangpui a, Mizoram pawna inbengbel pawh tlem a zawng chu an awm. An in leh lo, an neih zawng zawng chan mah se vawiin thlengin ngaihsak an hlawh lo a, zangnadawmna pawh engmah pek an ni lo.

India sorkar hnenah an dinhmun hi thlenin tanpui turin an ngen thin a, mahse, mahni duh thu ngeia Mizoram chhuahsantu Tuikuk-ho enkawltu India sorkar chuan vawiin thlengin a la tanpui lo.

"Kan neih zawng zawng kan chan a, bungrua mai ni lovin mahni khua kan chan a, hei hi keini tan chuan na tak a ni. Mahse, siki mam pawh kan la dawng lo. Zangnadawmna dawn kan chak a ni lo, zangnadawmna dawn ngai lova mahni khuaa awm kan chak ber. Mahse, kan khua kan tlanchhiatsan ta si a, chuti a nih chuan sorkar chuan min pui ve turah kan ngai," tiin Sakhan tlangdung atanga tlanchhia pakhat chuan Zozam Weekly a hrilh.

###############

Tuikuk vang Mizote tawrhna thenkhat:

* 21/10/97: Bru National Liberation Force te'n forest game watcher Lalzawmliana an that. Zawma thattute hian Zawma thihsan .22 Rifle leh Walkie-Talkie, forest deptt. ta an la.

* 13/1/98: BNLF te'n West Phaileng VCP C Thansiama chu cheng nuai 2 khawn tur leh 30/1/98-a Appeto (Tuiuk) hnena lo hlan turin lehkhain an hrilh.

* 10/2/98: Zan dar 10 velah Damparengpui-a teak huanah BNLF te an lut a, he huan enkawltu hi Rs 700 an chhuhsak. He huan hian Khatla-a cheng K Remmawia ta a ni a, hlawhfa a dah a ni.

* 3/3/98: Zing dar 6 leh dar 7 inkarah Zamuang khaw bulah Mizo hmeichhe pahnih, Zikpuii leh Zairemi te chu Tuikuk tlangval Lalsanga'n tibuaiin sana leh pawisa a chhuhsak.

* 4/3/98: BNLF-ho chu Dinthar leh Zuangzawl-ah an lut a, khaw mite chu an silai hralh lo tura tiin, an hralh a nih chuan silai pakhatah Rs 10,000.00 zel an chawi ang tiin an vau.

* 14/3/98: Tlabung bula Dingthar khuaah BNLF-ho an lut a, Comprehensive Middle School typewriter 1 leh cyclostyle 1 an ruchhuak. Dinthar leh a chhehvel khuaa mite silai an chhuhsak bawk.

* 27/3/98: Tuipuibari leh Chikha khaw inkarah 3rd MAP truck tuichawi chu BNLF te'n hand-grenade hmangin an bei.

* 11/4/98: He truck vek hi tlai dar 5:30 velah BNLF te'n an umbush.

* 20/4/98: Zawlpui VCP hnenah BNLF te'n lehkha thawnin pawisa khawn turin an ti.

23/4/98: Zawlpui leh Putlungasih inkarah BNLF te'n police motor kalna turah bomb an kam a, a tlawlh.

* 15/4/2000: BNLF te'n MST bus tlan tlai tidingin an bei a, a mi chuang mi pahnih an kidnap.

* 19/4/2000: Khantiang khaw bulah BNLF te'n Sumo Pick-Up tlan lai tidingin a mi phurh Lalnunfela an kidnap. Lalnunfela hi 19/4/2000-ah an chhuah leh.

* 15/4/2000: Lalchhanhima leh Lalzawmliana, PHE-a thawkte chu Saithah khaw bulah BNLF te'n an kidnap a, 16/5/2000-ah an chhuah leh. Hemi tum hian Mizoram sorkar chuan palaiah Rev Lalsawma, Rev AK Dawi leh Upa C Hualkunga te tir.

* 30/6/2000: Lunglei District-a Batnasera khaw bulah BNLF te'n police an umbush.

* 5/7/2000: Tlangval pakhat Lalnunfela'n Hriphaw bulah BNLF mi leh sa 9 a hmu. He'ng mite hian Fela hi Zoar khuaah hruaiin an vua.

* 15/7/2000: BNLF mi 16 te'n Hnahva khuaah pawisa an khawn a, missionary Vanlalhlira chu an vaw hrep.

Related Posts :