Jack i hawh duh em ni?

Tûk khat chu thinrim teuh hian ka thianpa pakhat, dàn-hre-mi hi ka va pan a, “Buaina namén lo takin min tlâkbuak a ni,” ka va ti tawng mai a. “Kan thenawm chiaha awmte’n thla khat chawlh hmanga thang bo an tum a. An ui vulh pahnihte erawh hruai ve lo va an kawtkaia thlun mai an tum a. Chhiahhlawh pakhatin chawte pein a rawn ngaihven thin dawn a ni âwm e, a theihnghilh loh chuan... Chutih kára an han bengchhen dàn tùr mawlh mai chu a ni. Niléng zakhua zak khán an bauh emaw a ni ngei ang a. Zànah min timuhil thei lo ang a. Ka ning lutukin ran vulh enkawltute hnênah la bo tùra ka va hrilh hial emaw kha a ngai ang a. A nih loh vêk leh ka thinrimin ka va kâp hlum phiar duh emaw a ni ngei ang. Chutia ka va tih hlauh lah chuan ka thenawmte lo haw chuan min rawn talh ve nghâl duh emaw kha a ni dawn bawk si,” ka’n ti zui bawrh bawrh a.

Ka thianpa chu ham bai bai chung hian a thutthleng a’n tlawh âwn tê tê a. Chutah, “Thawnthu ka’n hrilh teh ang che. I hriat hnu a nih pawhin min lo pawt chat mai lo la. I tán hriat nawn leh a tul rêng rêng a ni,” a han ti a.

“Vawi khat chu zàn rei tawh takah hian tlangval pakhat hi khawpui daifemah hian car-in a tlan a. Vawi-leh-khatah leh... A car ke a puak ta thuai mai. A sawt zui nghâl nawk nawk a. Ang deuh niah niah chung hian a rawn chhuk a. A car ke han thlâk tùrin Jack a lo pai hauh si lo! ‘Hm, In hnai ber pana Jack va hawh mai tùr a nih hi,’ a ti rilru a. Hla deuh taka In pakhat, lo la êng va va a han hmuh chuan, ‘Ka vannei hle mai. Saw lai loneitupa saw a la mu lo hlauh a nih dawn saw. Ka car ke a chhe hlauh mai a, Jack min lo hawhtir thei ang em ka va ti ang a. Tehrêng mai, va hawh tawh. I hman zawhah min rawn kir leh mai dawn nia a lo ti ngei ang,’ tiin amah leh amah chu a inbe mawlh mawlh a.

“Pên hnih khat a pên hman chauh tih chuan a piaha In êng chu a thi ta hlauh mai a. ‘Khai aw, kan mihringa chu a mu hman pek a ni maw! A mu va kaihthawh chu a lo lawm lo nasa khawp ang maw le. A Jack hawh man pawh pawisa a phût ngei tawh ang. Duh leh pawi lo, a thenawm khawveng tih chi loh viau na a, kha Rs. 10 hi ka pe ang che ka ti ang a... Hetiang zanlaiah Rs. 10 chauha min kaihthawh theih i inbeisei rêng rêng emaw ni le? Rs. 50 tal min pe tùr a ni. A nih loh chuan Jack chu hmun danga mi hawh tùr va zawng zâwk mai rawh te pawh a lo ti duh hial ta ve ang...’

“Chutianga an indawr dàn tùr ngaihtuah chuan chu tlangval chu thinrim teuh hian gate bul a va thleng a. ‘Rs. 50, a tha e, ka pe ang che. Chu aia tam zawng ka pe hauh lo vang che. Mi harsatna tawh kára hlâwkna hmuh lo tum. Eng mihring nge maw i nih hrep chu le,’ tiin a rilruin a phun mawlh mawlh a.

“Chutah, kawngkhar a va thleng a. Ring fahran hian kawngka chu a kik ta bur bur mai a.

“Loneitupa chu chhawng chung tukverh atanga lo dâk chhuakin, ‘Tu nge ni? Eng nge i duh tâk?’ a rawn ti da da a. Chu tlangval chuan, ‘I Jack chhe tê kha maw le. I inchhuanpui viau lehnghâl dawn emaw ni...’ thinrim zet hian a han ti ringawt a.”

Ka nuih za lutuk chu kan nuih kiah kiah phawt a, “Chutiang thil chu maw ka lo tih rêng a,” ka han ti a.

Ka thianpa chuan, “Ni ang chu. Nangmah ang bawk hian ka hnêna lo kal tam berte hi chuan thil awm dàn dik tak tlang taka sawi ta mai lo hian, an zeldin thubawl âtthlak pui pui hi an rawn phulpui chiam zêl a. Engtin nge a sumdawn pui pa hi...? Engtin nge a pasal hi a tih dawn...? Engtin nge an pu hian a ro hi a tih dawn? Mi dang khâwmtir a tum ta mai em ni...? tih angrengte hi a phunglung thei ang bera suangtuah kual hian an rawn inngaihtuah lungpuam a. Chutah, keiin he thawnthu hi ka lo hrilh a, an nem zân zêl mai nia.

“A hnua an chanchinte kan han hriat zui leh phei chuan an hlauh ang rêng rêng a lo nih loh thu te, an pu ber lah chuan a ro chu a kim thei ang bera khâwmtir tum a, dàn lam hre mite pawh a lo rawn fo tawh thute a ni nawk mai.”

A dik hle hian ka hria. Mi tam berte hi chuan kan nun kawnga harsatna eng emaw, awlsam taka kan paltlang theihte pawh hi, a bumboh leh a hrehawm záwng hlira hmachhawn kan chîng a. Tharum thawh hreh lo hialin keimahni leh keimahni kan inbual â ta thin a lo ni.

Zirtawpni tlài khat chu ka pisa bang hi khawpui atanga kan In lam panin ka inkhalh haw a. Ka tlài hle mai. Zanriah ei hun lah a pel duai tawh bawk si. Ka nupui lah chu ka phone lâwk hlek lo lehnghâl a. Ka hmanhmawh tehlul nen motor tam lutuk vàngin a hmanhmawh hleihtheih bawk si loh. Ka thin a ur teuh mai. In ka thlen hun chuan— “Ka hmanhmawh tehlul nen traffic jam a nasa lutuk a, ka rawn thleng hmá thei ngang lo a ni.” Kan nu’n, ”Engah nge i rawn chhuah hmá pawhin i tlài tùr thute chu i rawn phone lâwk mai loh,” a lo ti ngei ang. ”Aw, eng nge maw dang chuang le, hei ka lo thleng der tawh tho alawm,” ka ti ang a. “A ni maw, nilêngin i rawn phone beiseiin ka lo awm a,” a ti zui leh ngei ang. “Nang sava no duhawm rawn phone mai loh hi tih tùr dang ka nei lo tih ka hre lo alawm,” ka ti ang a. “Rawn phone ka tum lo hrim hrim a ni ti la a nih chu,” a la ti fo ngei ang. Chutiang vêl suangtuah chuan thinrim teuhin kan kawtkai ka thleng a.

Car atanga chhuk pah chuan ka car kawngkhar chu ka’n khar tau bur mai a. Ka thâwm hriain ka nupui chu chhawng chung tukverhah hian a rawn dâk a.

“Sawi ta che, sawi tùr i neih chu...” tiin kan au nghâl ngawt pek a. Chutah, ka nupui chuan, “Lutuk, Jack i hawh duh em ni?” a rawn ti sap a.

('Want to borrow a Jack', JP Mc Evoy ziak lehlin a ni. —C.Lalawmpuia)