Hmelchhe bon

Abraham Lincoln-a kha pa hmaifang tha a ni lo; a hmelchhiat thu hi a chanchinah chuan sawi hlawh ber pakhat a ni hial mai thei.

Pa hmelchhia, naupang tana hmel ngainatawm tak ni lo mah se naupang a ngaina em em a, han chhawnchhaih vel pawh a peih hle.

Tum khat pawh pa pakhat hian White House-ah a fanu naupang te mai hi president hmuhpui tumin a rawn hruai a, Lincoln-a chuan naupang chu a lo titipui melh melh mai. Chutah, naupangte chuan a pa hnenah, "Pa, a hmelchhia in ti a, a chhiat tawp loh hi, a tha ka ti lutuk," a ti ta leu leu mai a!

Amah Lincoln-a ngei pawh hi hmelah kher hi chuan a inchhuang lo hle a, fiamthua mahni han insawisak pawh a ching. A chanchin a sawi fo thin pakhat pawh hi a nuihzatthlak asin: "Ukil hna ka thawh lai khan ka zin kual fo thin a. Vawi khat chu khaw pakhatah pa pakhat, hmelchhe tak, ka hriat ngai hauh loh hian, 'Ka pu, i thil tur ka kawl tha reng asin,' min lo ti ringawt a. 'Engtia ka thil tur lo kawl ngawt nge i nih?,' tia ka'n zawh chuan a ipte atangin chemte a rawn phawrh a, 'He chemte hi kei aia hmelchhe zawk ka hmuh hunah ka pe ang, tiin ka lo intiam tawh a, ka tawng ta che a, tun atang chuan i ta a ni ta e,' min ti ta mauh a ni," tih hi!