Footballer Rilru Paukhauhte Chu...

¢ Hmingsanga

Kan phak tawk leh tlin tawk tlem mah se Mizote hi infiamna lamah hma kan sawn theih dan tur ngaihtuah hian ka lo buai ve em em thin a. Ngaihtuahna a kal ding laklawh phei chuan rualawh a na zual thin. Football khawvela a inkhel thiam leh larte inkhelh laia rilru luah hnem ber chu, Mizo footballer-te hian football khawvelah hian hmun an chang ve ang em tih hi a ni.

Mizo footballer-te hian football khawvelah lang tham khawpin talent an nei tha a. Mahse tlakchham lian tak an nei nia ka hriat ve chu tih hram hramna te, tawrhchhelna te, tumruhna te, beidawng lova beih fan fan peihna te a ni a, mahni inthunun kawngah te tanlak a tul hlein ka hre ve thin. Heng zawng zawng hi football khawvela dam khawchhuahna tura a pawimawhzia chu kan hre theuh awm e. Professional footballer-ho hi an danglam hle a. An professional-na hi an hrechiang em em a. Engtik lai pawhin discipline a tha chu ka ti hauh lo. Mahse an eizawnna ah hian an chiang a. Tih mai mai hi an nei khat hle.

Player tin mai hian first XI ah hmun chan tumin theihtawp an chhuah a. Club khata khel leh ram tana khel player-te hi nasa takin an inel thin. A chang chuan first XI-a hmun chang char charte pawh a chang chuan khelh loh chang pawh an nei ve bawk tih chu a hrechiangtute kan ni awm e. A chang chuan football-ah hian inhliam vang te emaw coach-in a game plan a zir a, player a hman te pawh a awm ve bawk a. Thil chiang tak pakhat erawh chu, an khel phak emaw khel phak lo emaw pawh ni se, kei chu ka thiam tawh, zir belh tur ka nei lo an ti mai mai lo khawp mai.

Indian football ah han lut ve ta ila; Indian footballer-ho zingah chuan la thleng sang bera chhal Bhaichhung Bhutia nunah hian zir tur tam tak kan nei. Ani pawh hian a professional footballer nihna hi a ti mai mai lo khawp mai.

Bhaichung-a hi a thiante tawngka vel atanga ka lo hriat danah chuan mi in-discipline tak mi a ni a, match a neih dawn reng reng chuan eng ang pawn a bulah mi party nasa mah se a mu hmak zel a ni awm e. A tumruhin a beidawng mai mai lo a ni tih kan hriatna chu India football-a super star nih maiah khan a duh tawk lo a, England-ah inzir belh leh turin a la kal leh ta fo a nih kha.

Hetah tak hian Mizo chu ni ta se hetiang khawpa mahni rama lar tawh ram danga inzir belh leh tur chuan a kal peih hi ka ring tawh miah lo. Mahse, ani pawh hmuh theih khawpin a England awm chuan amahah hmasawn rah thar a rawn neih tir leh a, tun thleng hian Indian stiker-ah chuan amah thlaktu tur an la hmu chuang lo a ni ber e. A mimal tak pawha Bhaichung-a mak ka tih em emna chu kum 1996 vel kha a vanglai rawn intan a ni tawh a, mahse tun thleng hian a fit that-a a inhliam loh chuan a pu thin Shubhas Bhowmick meuh paw'n 'foreign stiker kan ngai lo, Bhaichung Bhutia a awm chuan' a ti ngam ngat a nia. He Indian footballer hlawhtling ber a chal ngam nunah hian entawn tur tam tak Mizo teah hian min hnuh chiah niin ka hria.

David Beckham kan hre theuh awm e. 98 World Cup-ah England manager Glenn Hoddle chuan game a in-concentrate tawk a tih vangin England-in game hnih an khelhah chuan a awltir phawt a. Match thumna Colombia nen an khelh tumin hla tak atangin free kick an hmuh chu goal-ah chantirin England chu 2–0 in an chak. Quarter final-ah Argentina nen an inkhelh tumin red card a hmu. He inkhelah hian England chu penalty shoot out-ah chak loin, England chak loh chhan pakhat chu Beckham tiin chanchinbumi leh supporter tam tak ten an ngai. An sawisel luai luai a, London pub thenkhatah phei chuan a lim te pawh an hal hial. United lamah chuan 98-99 season chu kum tha a ni a, United chu Premier League, FA Cup leh Champions League-ah te champion a nihpui a, heti chung pawh hian England fans tam takte chuan World Cup-a hnawhchhuah a nih avang khan demna thu an la chhâk chhuak reng tho. England chhuahsan a duh hial a, mahse amah lo chhertu Manchester United meuh han chhuahsan chu a hreh hle. United-a châm tur chuan thutlukna an siam leh ta rih zawk a.

Sir Alex-a fachuam ti hiala sawi thin David Beckham-a hian a pu hi a tilungawi lo nia sawi a ni. Sir Alex chuan Beckham-a hi Spice Girl-a mi Victoria Adams nen an inneih hnuah footballer nunin a nung tawh lo niin a sawi thin. Footballer ai mahin film star nun ang maiin a nung a ni, a ti. Kum 2000 khan Beckham-a fapa chu a damloh avangin kar khat chhung chu training awlin chawlh an pe a. Mahse hetia dam lohna avanga chawlh an pêk chhung hian Beckham-a chu London Fashion Week tih velah a kal tih chanchinbu lamah a thlalak nen lam an rawn tarlang ta si. A pu Ferguson-a thin a rim kher mai. Hei vang hian kar hnih hlawh £50,000 an cut sak bakah Leeds United nen an inkhelh tumin awltir a ni satliah lo a, squad-ah pawh a hming an telh duh lo. Inkhel pawh mipui zing atanga en turin a ti zui bawk. Hemi hnu hian kum 2003 FA Cup final-ah Arsenal an hneh lo a, hemi tum hian dressing room-ah Sir Alex chuan Beckham-a chu, “Ashley Cole khan a va dah nil chiang che ve. Nep lutuk...!” (A saptawng chuan tawngkam chhe tak a hmang, Mizo tawng chuan dah a rem lo) tih pahin a bula ball boot awm chu an chhuih zui a, chu boot chuan Beckham-a lû-ah tak a va fuh a. A lû a thi zawih zawih a, Beckham-a chuan tap chungin, “Min va han hmusit em em ve,” tiin a chhâng ve bawk. Fergie chuan an club physio chu Beckham-a chu buaipui zawm turin a hrilh a. Beckham-a lu hi hmun hnih laiah thui a ngai nghe nghe.

Chu thil thleng chu chanchinbumiten an hriat an hlau hle na chungin an hre chhuak ta tho. Sir Alex-a chanchin chu khawvel hriatah a thang mawi lo ta hle a nih kha. Beckham-a lah chuan hemi tûk hian Manchester-ah bazar turin a’n chhuak lui ve sak bawk a, a hliam chu thup tumin hair-band hreng mah se tuma’n an hai chuang lo. Sir Fergie lah chuan Beckham-a khawsak dan phung hi a ei lo zual sauh a. “Vawi tam tak footballer nunphung pangngaia nung turin ka hrilh hin a, mahse a nun chu a danglam chuang si lo,” ti te pawhin a sawi chhuak tawh bawk.

A pu nena an inkar boruak a chhe hle. Euro 2000-ah thung chuan England chu mite rin phak bakin a rawn chet thatpui a. Kum 2001-ah chuan BBC Sports Personality of the Year atan thlan a ni. Hemi kum vek hian FIFA World Player of the Year Award-ah Luis Figo pha lovin pahnihna a ni.

Kum 2002-03 season chuan Beckham-a hian United-ah hmun a chang tlem ang reng hle a. Heng thil a thlen hnu thla thumnaah chuan David Bekham-a chuan United chhuahsanin Real Madrid lam a pan a. Kum 11 chhung United a khelh chhung khan match 400 vel khelin goal 85 a thun a ni.

Real Madrid chuan kum li chhung atan Euro mtd 35-in an lei a. English zinga Real Madrid tana khel tawh Laurie Cunningham leh Steve McManaman te hnung a zui a. Madrid a zawm ni hian Beckham-a Jersey hak tur No 23 chu ni khat thil thuah Euro 624,000 man lai an hralh nghal. Beckham-a hian Manchester United leh England tana a khelh apianga a hak thin No 7 chu Real Madrid-ah hian a chang zui thei ta lo. A chhan chu Madrid-ah hian Raúl chuan contract a ziahnaah No 7 hi ha turin an lo ziah fel tawh avangin Beckham-a chuan basketball star Michael Jordan a ngaihsan avangin No 23 chu a ha ta zawk a ni.

Beckham-a chuan Madrid-ah bul a tan tha phian a, match 16 a khelah goal 5 lai a thun avangin Madrid fans te lawm pawh a hlawh viau. Kum 2006-07 season-ah chuan Madrid coach thar Fabio Capello chuan chuan Beckham-a chu a lawm tehchiam lo. Game a khelhtir ngai mang lo a, a khelh ve chhunah pawh substitute bench atanga luhtir a ni deuh ziah.

January ni 11, 2007 khan English footballer David Beckham-a chuan mite rin loh takin Major League Soccer, LA Galaxy-ah khel turin dollar mtd 275 (£128 million) hlawhin kum nga chhung khel turin contract a ziak fel a. A contract ang chuan kum khatah dollar mtd 50 a hlawh ang a, hei bakah hian sponsorship atang pawhin dollar mtd 25 a hlawh ang a, hei bakah hian merchandising sale-ah leh club-in hlawkna a neiah chan a nei bawk ang. MLS-ah hian hetianga player ropui contract ziahpui hi a la awm ngai lo a. Beckham-a contract hi a hmingah “Beckham’s Rule” tiin an sawi fiam hial a.

2006–07 season chhung khan Beckham-a hian Real Madrid match 25-ah vawi 7 chiah first XI-ah hmun a chang. Real Betis nen an inkhelh tum phei chuan squad-ah pawh telh a ni lo. A hun laia footballer lar khan Real Madrid-ah chuan hmun a chang lo tlat si. Mahse Beckham hian fakawmna em em a nei. An coach game plan-a a lan phak ve tak loh avang khan a beidawng ve rum rum mai thei. Mahse a beidawng hlen lo. First XI-ah hmun a chan theihna turin nasa zawk thawhrim a tul tih a chiang a. World class footballer te chu an thawhrim awm vei nen, chu aia nasa a thawhrim chu a hautak viau ang le. A bei hram hram a. A bul atangin a rawn tan tha leh a nih hi tih mai tur khan a rawn bei tha leh a. A thawkrim em em a. A thawhrimna rah ngei mai chu seng-in Real Madrid-ah chuan koh luh a ni leh chiang kher mai.

Dinhmun khirhkhan leh hrehawm taka a din lai khan Beckham-a rilru put hmang tur kha lo suangtuah chhin ila, mahni tawka football khawvela hming cher ve tawh England captain meuh pawh lo ni tawh, footballer zingah pawh midang aia sum hailut hnem rilru kha a na ngei ang. Kan Mizo rilru chu ni se football chawlhsan nghal daih emaw, zu in emaw, practice-naah pawh tih that peih lohna tham a ni a. Chhuanlam siam duh ni se an coach berin hnawla a paih hnu, 'team-ah pawh ka tel leh awm chuang lo' ti chunga traning pawh kal duh lohna tham a ni. Mahse Beckham chuan theih tawpin a rawn sual chhuak leh a. Real Madrid-ah mai pawh nilo England team-ah ngei pawh koh let leh a ni ta a nih kha.

David Beckham hi a hlawh hnem phenah hian tumruhna leh beidawn duh lohna leh thawhrimna nei a ni tih hi chiang takin a hriat theih awm e.

Cristiano Ronaldo hi kan hre theuh awm e. Kum 11 mi lek a nih laiin Lisbon khawpui, Sporting Lisbon youth team-in training an neihna hmun, Alcochete-ah chuan mutbu a kaih pharh a ngai ve ta mai. Nu leh pa te thlazar hnuaia nitin hun chhiar liam ve mai mai, thliarkar pakhata naupang pakhat ve mai kha khawpui nun hre phak hlek loin kum sawm emaw vel a tei kual ve nawk nawk kha a ni a. Inkhelh chu thiam hle mah se, naupang thang duh tak a nih loh avangin mi thenkhat chuan professional huang chhungah pawh han zuang lut ve mah se a thlen thui tak tak an ring lo. Sporting Lisbon youth team a zawm chuan football khel thiam ni tura zirna tha a dawn bakah, ei leh in lam pawh hnianghnar zawkin a dawn ngei dawn a, chaw tha tinreng dawngin, a taksa pawh chu hmuh theihin a thang. Naupang te tak tê ni thin kha a thang awk awk a. Patê ti-a sawi thin chu pa pangngai tak a ni ve ta. Inkhelh lamah pawh a thiamna chu nasa taka tuaihriam a ni.

Madeira atanga Lisbon a zawm khan kum 11 mi lek a ni a. A unaute leh a nu leh pate a ngai thei lutuk a, “A tir lamah phei chuan ni tin deuh thaw ka tap ni berin ka hria,” a ti.

A lungleng lutuk hnem nan Sporting Lisbon thuneitute pawhin a nu chu thla ruk vel a fapa awmpui turin an youth team training-na hmunah hian an awmtir ve hial a. Hei mai a ni lo, thliarkar atanga kal a ni a, a tawngkauchheh pawh a danglam deuh avangin a awmpui naupang dangte pawhin an hmuhsit phah. Hei vang tak hian tawng pawh a tawng tlem phah reng a. Mahse, chung a tawrhna zawng zawngte chuan football khawvel-a dam khawchhuah theihna turin chhelna nasa tak a siam a ni. Tun dinhmun a thlen theihna pawh hi a tawrhchhelna leh a tumruhna vang liau liau a ni a tih loh theih loh ang.

Euro 2008-ah khan England nen an inkhelh tumin England chhuanvawr Rooney kha Ronaldo vang khan red card a hmuh phah nia ngaiin England chak loh chhan pawh Ronaldo fin phakar vangah ngaiin England fans te huat leh ngei rawn chu Ronaldo kha a ni. Euro 2008 khelh zawhah England-ah Manchester United-ah a kir leh ngei dawn tih a chiang a. Rooney nen khan an khel tlang leh dawn tih pawh a chiang. Rooney red card hmuh chhan kha Ronaldo vang a ni kher lo mai thei. Ronaldo leh Rooney inkarah thudik tawk lo lah a thang nasa. Chutianga hun harsa leh kirh taka a din lai chuan Ronaldo rilru-ah tumruhna leh tawrhchelna a insiam thar a. Kan hre theuh ang a, Euro zawha an rawn inlar leh chiah kha chu a rawn che pui hle a nih kha.

England mipui huat rawn a ni si, dinhmun hrehawm leh khirh taka an awm lai khan media lam mi pakhatin a kawmnaah chuan ti hian a chang a: "England mipui rilru ka hneh leh theihna awm chhun nia ka hriat chu khelmual chhung hi a ni a, chuvang chuan ka ni tin practice-naah theihtawp chhuahin ka bei a, ni tin mai hian thil thar thiam chhuah hi ka tum a, chu chuan tun dinhmun hi min hruai thleng ta a ni," tiin.

Kan Mizo rilru nen chuan a inperhsan hlein ka hre thin. Mizoah chuan tlema han lar deuh hian thiam ta berah kan inngai nghal ringawt a, kan duhtawk deuh ti tih nghal deuh mai a. Ronaldo te anga ni tin thiam belh tum zel hi Mizo footballer zingah an tam lo viau mai thei.

Ronaldo hi a pu hlui Sir Alex ngei pawhin, "Ani hi chu a thawkrimin a tum a ruh em a, hei vang hian a phu a ni -hlawhtlinna," a ti hial a nih kha.

Ronaldo hian harsatna leh hrehawm tam tak a tawrhte chu chhel takin a tuar chhuak a. Hlawhchhuah hlawhtlinna hlimawmzia hrechiangtu a ni. A thawhrimna leh a taimakna zawng zawngte avangin a hming chu khawvel hmun tinah a thang a. Football khawvelah a hming a thang a. A thang zual zel mai thei bawk.

Related Posts :